វគ្គបណ្តុះបណ្តាលស្ដីពីការប្រើប្រាស់កម្មវិធី Autodesk AutoCAD Civil 3D ក្នុងវិស័យហេដ្ឋារចនាសម្ព័ន្ធ ទីស្ដីការក្រសួង៖ នាថ្ងៃចន្ទ ទី២ ខែកញ្ញា ឆ្នាំ២០២៤ ឯកឧត្ដម ហ៊ាង វុត្ថា អគ្គនាយក នៃអគ្គនាយកដ្ឋានបច្ចេកទេស បានអញ្ជើញជាអធិបតីភាព បើកវគ្គបណ្តុះបណ្តាល ស្តីពីការប្រើប្រាស់កម្មវិធី Autodesk AutoCAD Civil 3D ដោយមានការចូលរួមពី លោកអគ្គយករងបច្ចេកទេស លោកប្រធាននាយកដ្ឋាន ក្រោមឱវាទអគ្គនាយកដ្ឋាន និងមន្ត្រីជំនាញពាក់ព័ន្ធជាច្រើនរូប ព្រមទាំងសិក្ខាកាមមកពី អគ្គនាយកដ្ឋានសាធារណការ អគ្គនាយកដ្ឋានដឹកជញ្ជូនទឹក សមុទ្រ និង និងអគ្គនាយកដ្ឋានប្រព័ន្ធចម្រោះទឹកកខ្វក់។ វគ្គបណ្តុះបណ្តាលនេះ រៀបចំឡើងក្នុងគោលបំណង ដើម្បីបញ្ជ្រាបការយល់ដឹងដល់វិស្វករ អ្នកបច្ចេកទេស និងមន្ត្រីជំនាញពាក់ព័ន្ធ ក្នុងការសិក្សាស្វែងយល់បន្ថែមឱ្យកាន់តែច្បាស់ពីសារៈសំខាន់នៃការប្រើប្រាស់កម្មវិធី Autodesk AutoCAD Civil 3D ក្នុងវិស័យសំណង់សាធារណការ លើការងារររៀបចំផ្ទៃដី ប្រព័ន្ធប្រឡាយទឹក ការបង្កើត និងប្រើប្រាស់ និងទាញយក Template របស់គម្រោងទៅតាមស្តង់ដារបស់ស្ថាប័នរដ្ឋ-និងឯកជន ការរចនាប្លង់ពំនុះទទឹង និងបណ្តោយ (Prile & Cross Section) ការគណនាមាឌដី និងការកំណត់ព្រំដី ការរចនាប្លង់មេ (Master Plan) ជាដើម។ ថ្លែងនាឱកាសនោះ ឯកឧត្ដមអគ្គនាយក បានមានមតិផ្ដាំផ្ញើឱ្យសិក្ខាកាមទាំងអស់ ត្រូវខិតខំប្រឹងប្រែង យកចិត្តទុកដាក់ស្ដាប់ នូវការធ្វើបទបង្ហាញរបស់គ្រូឧទ្ទេសនាម ដើម្បីក្លាយជាជនបង្គោល សម្រាប់ការបណ្ដុះបណ្ដាលផ្ទៃក្នុងអង្គភាព និងត្រៀមរៀបចំវគ្គបណ្ដុះបណ្ដាលនេះបន្តទៀត ដល់មន្ត្រីជំនាញពាក់ព័ន្ធនៅថ្នាក់ក្រោមជាតិ តាមបណ្ដារាជធានី ខេត្ត ក្រុង ដែលជាតំបន់គោលដៅផងដែរ។ សូមជម្រាបជូនថា វគ្គបណ្តុះបណ្តាលស្ដីពីការប្រើប្រាស់កម្មវិធី Autodesk AutoCAD Civil 3D ក្នុងវិស័យហេដ្ឋារចនាសម្ព័ន្ធ គឺជាការបោះជំហានទៅមុខមួយកម្រិតទៀតឱ្យស្របទៅនឹងស្ថានភាព និងការអនុវត្តការងារជាក់ស្ដែង សំដៅជួយជំរុញ និងពន្លឿនការកសាង និងពង្រឹងសមត្ថភាពក្នុងការសិក្សាគំនូរប្លង់បច្ចេកទេសគម្រោងក្នុងវិស័យហេដ្ឋារចនាសម្ព័ន្ធ ព្រមទាំងរួមចំណែកឱ្យអង្គភាពពាក់ព័ន្ធកាន់តែមានភាពប្រសើរឡើង និងប្រកបដោយប្រសិទ្ធភាព និងប្រសិទ្ធផលខ្ពស់៕ :: ភ្ជាប់ទំនាក់ទំនងជាមួយ (MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube