វគ្គបណ្តុះបណ្តាលស្តីពីការប្រើប្រាស់ប្រព័ន្ធ ArcGIS Enterprise ទីស្ដីការក្រសួង៖ នាថ្ងៃចន្ទ ទី២៦ ខែសីហា ឆ្នាំ២០២៤ ឯកឧត្ដម ហ៊ាង វុត្ថា អគ្គនាយក នៃអគ្គនាយកដ្ឋានបច្ចេកទេស បានអញ្ជើញជាអធិបតីភាព បើកវគ្គបណ្តុះបណ្តាល ស្តីពីការប្រើប្រាស់ប្រព័ន្ធ ArcGIS Enterprise ដោយមានការចូលរួមពីមន្ត្រីជំនាញ នៃអគ្គនាយកដ្ឋានបច្ចេកទេស អគ្គនាយកដ្ឋានសាធារណការ និងអគ្គនាយកដ្ឋានប្រព័ន្ធចម្រោះទឹកកខ្វក់។ វគ្គបណ្តុះបណ្តាលនេះ រៀបចំឡើងក្នុងគោលបំណង បញ្ជ្របការយល់ដឹងកាន់តែស៊ីជម្រៅ ពីការពិនិត្យ បញ្ចូលទិន្នន័យ រក្សាទុកទិន្នន័យ នៃគម្រោងស្ថាបនា ស្តារ ជួសជុល និងថែទាំហេដ្ឋារចនាសម្ព័ន្ធផ្លូវថ្នល់ ដោយប្រើប្រាស់ថវិកាជាតិ ទៅតាមបណ្តាឆ្នាំនីមួយៗនៃគម្រោង ព្រមទាំងអាចរៀបចំផែនទីគម្រោង និងផែនទីបណ្តាញហេដ្ឋារចនាសម្ព័ន្ធផ្លូវថ្នល់ ដែលស្ថិតក្រោមការគ្រប់គ្រងរបស់ក្រសួងសាធារណការ និងដឹកជញ្ជូនបានទៀតផង។ ថ្លែងនាឱកាសនោះ ឯកឧត្ដមអគ្គនាយក បានមានមតិផ្ដាំផ្ញើឱ្យសិក្ខាកាមទាំងអស់ ខិតខំប្រឹងប្រែង យកចិត្តទុកដាក់ស្ដាប់ នូវការធ្វើបទបង្ហាញរបស់គ្រូឧទ្ទេសនាម ដើម្បីក្លាយជាជនបង្គោល សម្រាប់ការបណ្ដុះបណ្ដាលផ្ទៃក្នុងអង្គភាព និងត្រៀមរៀបចំវគ្គបណ្ដុះបណ្ដាលនេះបន្តទៀត នៅតាមបណ្ដារាជធានី ខេត្ត ក្រុង ផងដែរ។ សូមបញ្ជាក់ជូនថា៖ ArcGIS Platform ដែលអង្គភាពគ្រប់គ្រង និងប្រមូលទិន្នន័យផ្លូវថ្នល់ (Road Data Collection and Management Unit – RDCMU) នៃគម្រោងគ្រប់គ្រងទ្រព្យសម្បត្តិផ្លូវថ្នល់ ជំហានទី២ (RAMP-II) បានសហការរៀបចំជាមួយអគ្គនាយកដ្ឋានបច្ចេកទេស នៅពេលនេះ គឺជាកម្មវិធីប្រព័ន្ធព័ត៌មានភូមិសាស្ត្រ (GIS) ឈានមុខគេមួយ ត្រូវបានបង្កើតឡើងប្រកបដោយភាពច្នៃប្រឌិត និងសមត្ថភាពក្នុងការគាំទ្រដល់អ្នកប្រើប្រាស់ អាចរក្សា និងគ្រប់គ្រងទិន្នន័យបច្ចេកទេស នៃហេដ្ឋារចនាសម្ព័ន្ធផ្លូវថ្នល់ បែបឌីជីថល តាមរយៈស្មាតឌីវ៉ាយ (Smart Device) ក្នុងការបំពេញការងារប្រកបដោយប្រសិទ្ធភាព៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube