សិក្ខាកាមប្រមាណ ៩០រូប ចូលរួមសិក្ខាសាលា បច្ចេកទេសរួមគ្នារវាង កម្ពុជា-ជប៉ុន ស្តីពី " វិស័យប្រព័ន្ធលូ និងប្រព័ន្ធទឹកកខ្វក់" ភ្នំពេញ ៖ ថ្ងៃទី២២ ខែកក្កដា ឆ្នាំ២០២៤ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកសិក្ខាសាលាបច្ចេកទេសរួមគ្នារវាង កម្ពុជា-ជប៉ុន ស្តីពី " វិស័យប្រព័ន្ធលូ និងប្រព័ន្ធទឹកកខ្វក់" ដោយមានអ្នកចូលរួមប្រមាណ ៩០ រូប។ សិក្ខាសាលានេះមានការអញ្ជើញចូលរួមពី ពីខាងភាគីជប៉ុន មាន ឯកឧត្តម MASUBARA Hidenori ជំនួយការឯកឧត្តអនុរដ្ឋមន្ត្រី និងជាលេខាផ្ទាល់ឯកឧត្តរដ្ឋមន្ត្រីនៃក្រសួងដែនដី ហេដ្ឋារចនាសម្ព័ន្ធដឹកជញ្ជូន និងទេសចរណ៍(MLIT) នៃប្រទេសជប៉ុន ឯកឧត្តម KURBAYASHI Takanori ជាលេខាទី១ ស្ថានទូតជប៉ុនប្រចាំនៅកម្ពុជា កញ្ញា MIURA Yoshiko តំណាងជាន់ខ្ពស់នៃការិយាល័យ JICA ប្រចាំនៅកម្ពុជា បណ្តាក្រុមហ៊ុនជប៉ុនពាក់ព័ន្ធ ឯកឧត្តម ឯក ឃុនដឿន អភិបាលរងនៃគណអភិបាលរាជធានីភ្នំពេញ តំណាងក្រសួងសេដ្ឋកិច្ច និងហិរញ្ញវត្ថុ តំណាងក្រសួងបរិស្ថាន តំណាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និង ឯកឧត្តមអនុរដ្ឋលេខាធិការទទួលបន្ទុក ឯកឧត្តមអគ្គនាយក ថ្នាក់ដឹកនាំ មន្ត្រីរាជការ នៃអគ្គនាយកដ្ឋានប្រព័ន្ធចម្រោះទឹកកខ្វក់ ព្រមទាំងមន្ត្រីរាជការមកពីមន្ទីរសាធារណការ និងដឹកជញ្ជូន រាជធានី-ខេត្ត ផងដែរ។ សិក្ខាសាលានេះធ្វើឡើងក្នុងគោលបំណងចែករំលែកនូវបទពិសោធន៍ការអនុវត្តកិច្ចការងារអំពីវិស័យប្រព័ន្ធលូ និងប្រព័ន្ធទឹកកខ្វក់ រវាងប្រទេសទាំងពីរ ដើម្បីធ្វើឱ្យមានភាពកាន់តែប្រសើរឡើង និងសម្រេចឱ្យបាននូវការគ្រប់គ្រងបច្ចេកទេសកិច្ចការងារខាងប្រព័ន្ធលូទឹកកខ្វក់ ប្រកបដោយប្រសិទ្ធភាពខ្ពស់ ក្នុងការលើកកម្ពស់ការពារបរិស្ថានទឹកនៅតាមតំបន់ទីប្រជុំជននានា ដែលត្រូវពង្រឹងសមត្ថភាពចំពោះការគ្រប់គ្រងថែទាំបណ្តាញលូមានស្រាប់ឱ្យបានត្រឹមត្រូវ និងពង្រឹងសមត្ថភាពផ្នែកទន់ ដោយត្រូវរៀបរៀងផែនទីគោល ទិសដៅសកម្មភាពការងារដែលត្រូវអនុវត្តបន្ត ដើម្បីផ្តល់ភាពងាយស្រួលតាមដាន ការហ្វឹកហាត់វិធានការឆ្លើយតបបានទាន់ពេលផងដែរ៕