ពិធីប្រកាសសមាសភាពគណៈកម្មាធិការប្រតិបត្តិក្លឹបហែលទឹក និងសំណេះសំណាលជាមួយក្រុមកីឡាករក្លឹបកីឡាហែលទឹក នៃក្រសួងសាធារណការ និងដឹកជញ្ជូន ទីស្តីការក្រសួង៖ នារសៀលថ្ងៃអង្គារ ទី២៣ ខែកក្កដា ឆ្នាំ២០២៤ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាធិបតីក្នុងពិធីប្រកាសសមាសភាពគណៈកម្មាធិការប្រតិបត្តិក្លឹបហែលទឹក និងជួបសំណេះសំណាលផ្តល់ថវិកាឧបត្ថម្ភជូនគ្រូ-កីឡាករហែលទឹកក្លឹបក្រសួង ដោយមានការចូលរួមពីសំណាក់ ឯកឧត្តមប្រធានគណៈកម្មាធិការប្រតិបត្តិក្លឹប ឯកឧត្តម លោកជំទាវ ជាថ្នាក់ដឹកនាំ និងមន្ត្រីពាក់ព័ន្ធជាច្រើនរូបផងដែរ។ ឯកឧត្តមរដ្ឋមន្រ្តី បានថ្លែងអំណរគុណទៅដល់គ្រូបង្វឹក ក៏ដូចជាកីឡាករ ដែលបានចំណាយពេលវេលា ក្នុងការបង្ហាត់ និងការហ្វឹកហាត់សម្រាប់ការប្រកួតនានាកន្លងមក ដែលបានទទួលនូវមេដាយមាស ប្រាក់ និងសំរិទ្ធ ជាច្រើនក្នុងការប្រកួតកីឡាហែលទឹក "ជ្រើសរើសជើងឯកថ្នាក់ជាតិ ២០២១" និងជំរុញលើកទឹកចិត្តឱ្យផ្ដោតបន្ថែមលើការខិតខំប្រឹងប្រែងទាំងវិស័យកីឡា និងការសិក្សារៀនសូត្របន្ថែម ឱ្យអស់ពីលទ្ធភាព និងសមត្ថភាពដែលខ្លួនមាន ដើម្បីទទួលបានលទ្ធផលល្អប្រសើរ ក្លាយជាទំពាំងដ៏ល្អ ដើម្បីចូលរួមកសាងប្រទេសជាតិ ជាមួយរាជរដ្ឋាភិបាល។ បន្ថែមពីនេះឯកឧត្តមរដ្ឋមន្រ្តី ក៏បានប្រគល់ជូននូវថវិកាឧបត្ថម្ភមួយចំនួនជូនដល់គ្រូ និងកីឡាករហែលទឹកក្លឹប៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube