កិច្ចប្រជុំ Wrap up Meeting ជាមួយក្រុមអ្នកជំនាញការ Asian Infrastructure Investment Bank (AIIB) ដើម្បីពិភាក្សាលទ្ធផលនៃការចុះបេសកកម្មក្នុងការពិនិត្យមើលទីតាំងជាក់ស្តែង និងដំណើរការបន្តនៃការរៀបចំគម្រោងជំរុញការតភ្ជាប់ហេដ្ឋារចនាសម្ព័ន្ធច្រកទ្វារព្រំដែនក្នុងព្រះរាជាណាចក្រកម្ពុជា (3CEP) ទីស្តីការក្រសួង៖ នាថ្ងៃសុក្រ ទី០៥ ខែកក្កដា ឆ្នាំ២០២៤ ឯកឧត្តម វ៉ាស៊ឹម សុរិយា អនុរដ្ឋលេខាធិការក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ លោកជំទាវ ឥម នីថារ៉ា រដ្ឋលេខាធិការ និងជានាយកគម្រោង 3CEP បានអញ្ជើញដឹកនាំកិច្ចប្រជុំ ដើម្បីពិភាក្សាលទ្ធផលនៃការចុះបេសកកម្មទៅកាន់ទីតាំងអនុវត្តគម្រោង និងបន្តពិភាក្សាលើវឌ្ឍនភាពការងារនៃការរៀបចំគម្រោងជំរុញការតភ្ជាប់ហេដ្ឋារចនាសម្ព័ន្ធច្រកទ្វារព្រំដែន ក្នុងព្រះរាជាណាចក្រកម្ពុជា (3CEP) ដោយមានការចូលរួមពី ឯកឧត្តម លោក លោកស្រី មន្រ្តីបច្ចេកទេស សមាជិក សមាជិកា និងមន្ត្រីពាក់ព័ន្ធជាច្រើនរូប។ កិច្ចប្រជុំនេះរៀបចំឡើងក្នុងគោលបំណងពិនិត្យ និងពិភាក្សាអំពីផែនការ និងការអនុវត្តការងារបន្ត បន្ទាប់ពីក្រុមការងារបច្ចេកទេសរបស់ MPWT/PMU និង AIIB បានចុះបេសកកម្មទៅកាន់ទីតាំងអនុវត្តគម្រោងកាលពីថ្ងៃទី០២- ០៤ ខែកក្កដា ឆ្នាំ២០២៤ កន្លងទៅនេះ។ ចំពោះទិដ្ឋភាពនៃការអនុវត្តគម្រោង កិច្ចប្រជុំបានសម្រេចលើការអនុវត្តជាជំហានៗ ទៅតាមផែនការ និងគោរពតាមស្តង់ដាលក្ខខណ្ឌរបស់ដៃគូអភិវឌ្ឍន៍ ធ្វើយ៉ាងណាឱ្យគម្រោងនេះអាចអនុវត្តបានឆាប់ និងប្រកបដោយប្រសិទ្ធភាព ដែលនឹងបម្រើដល់ការអភិវឌ្ឍសេដ្ឋកិច្ចឆ្លងកាត់ព្រំដែន (The Cross-Border Economies) នៃព្រះរាជាណាចក្រកម្ពុជា ។ សូមជម្រាបជូនថា៖នេះក៏ជាបេសកកម្មដ៏មានសារ:សំខាន់របស់ AIIB ដែលបានអញ្ជើញមកជួបប្រជុំ និងបំពេញបេសកកម្មដោយផ្ទាល់ ជាមួយអង្គភាពគ្រប់គ្រងគម្រោងនៃក្រសួងសាធារណការ និងដឹកជញ្ជូន (MPWT/PMU) ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube