កិច្ចប្រជុំគណៈកម្មការរៀបចំយុទ្ធនាការធ្វើតេស្តរកសារធាតុញៀននៅក្នុងក្របខណ្ឌក្រសួងសាធារណការ និងដឹកជញ្ជូន ទីស្ដីការក្រសួង៖ នាព្រឹកថ្ងៃសុក្រ ទី០៥ ខែកក្កដា ឆ្នាំ២០២៤ ឯកឧត្ដម ប៉ាល់ ចន្ទតារា រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគណៈកម្មការ បានអញ្ជើញដឹកនាំកិច្ចប្រជុំគណៈកម្មការរៀបចំយុទ្ធនាការធ្វើតេស្តរកសារធាតុញៀននៅក្នុងក្របខណ្ឌក្រសួងសាធារណការ និងដឹកជញ្ជូន ដោយមានការចូលរួមពីថ្នាក់ដឹកនាំក្រសួង និងមន្ត្រីរាជការជាសមាជិក-សមាជិកាទាំងអស់។ កិច្ចប្រជុំនេះត្រូវបានរៀបចំឡើង ក្នុងគោលបំណងពិនិត្យលើវឌ្ឍនភាពការងាររៀបចំផ្សេងៗ និងការបែងចែកតួនាទីភារកិច្ចជូនក្រុមការងារជំនាញតាមផ្នែកនីមួយៗ ដែលត្រូវបានបង្កើតឡើងរួចរាល់ហើយ ដើម្បីអនុវត្តតួនាទីឱ្យមានប្រសិទ្ធភាព និងការទទួលខុសត្រូវខ្ពស់។ ឯកឧត្ដមប្រធានគណៈកម្មការ បានគូសបញ្ជាក់ថា៖ នេះជាការចូលរួមក្នុងការបំពេញកាតព្វកិច្ចទាំងអស់គ្នា ក៏ដូចជាសម្រាប់ជាគំរូដល់ក្រសួង ស្ថាប័ន រដ្ឋបាលថ្នាក់ក្រោមជាតិ និងអង្គភាពដទៃទៀតផងដែរ ដែលនេះជាកិច្ចការសំខាន់រួមចំណែក ក្នុងយុទ្ធនាការ ដើម្បីសម្រេចឱ្យបាននូវការប្តេជ្ញាចិត្ត «កម្ពុជាជាប្រទេសគ្មាន គ្រឿងញៀន និងរក្សាគ្រួសារនីមួយៗ ជាគ្រួសារស្អាតស្អំ គ្មានគ្រឿងញៀន តាមទស្សនវិស័យ ចូលរួមទាំងអស់គ្នាដើម្បីជីវិត និងសហគមន៍គ្មានគ្រឿងញៀន»។ សូមជម្រាបជូនផងដែរថា ដោយអនុវត្តតាមបទបញ្ជាដ៏ខ្ពង់ខ្ពស់របស់ប្រមុខរាជរដ្ឋាភិបាល និងសេចក្តីណែនាំរបស់អាជ្ញាធរជាតិប្រយុទ្ធប្រឆាំងគ្រឿងញៀន ក្នុងយុទ្ធនាការ “សម្អាតផ្ទះយើង” ក្រសួងសាធារណការ និងដឹកជញ្ជូន គ្រោងនឹងរៀបចំយុទ្ធនាការធ្វើតេស្តគ្រឿងញៀននេះ ជូនថ្នាក់ដឹកនាំ មន្រ្តីរាជការ បុគ្គលិកជាប់កិច្ចសន្យា នៅក្នុងក្របខណ្ឌក្រសួងទាំងមូល ដោយការងារនេះគ្រោងនឹងរៀបចំរយៈពេល ៣ថ្ងៃ គឺថ្ងៃទី១០ ១១ និង១២ ខែកក្កដា ឆ្នាំ២០២៤នេះ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube