វគ្គបណ្តុះបណ្តាលគាំទ្របច្ចេកទេស ស្តីពី “ការពិនិត្យឡើងវិញ និងការវិភាគមុខងារ និងរចនាសម្ព័ន្ធក្រសួង ស្ថាប័ន” ទីស្តីការក្រសួង៖ នារសៀលថ្ងៃអង្គារ ទី១១ ខែមិថុនា ឆ្នាំ២០២៤ ឯកឧត្តម ស៊ុយ សាន រដ្ឋលេខាធិការ និងជាប្រធានក្រុមការងារកែទម្រង់រដ្ឋបាលសាធារណៈ នៃក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងវគ្គបណ្តុះបណ្តាលស្តីពី ការពិនិត្យឡើងវិញ និងការវិភាគមុខងារ និងរចនាសម្ព័ន្ធក្រសួង ស្ថាប័ន ដោយមានការចូលរួមពី ឯកឧត្តម លោកជំទាវ លោក លោកស្រី ជាអនុប្រធាន សមាជិក សមាជិកាក្រុមការងារដឹកនាំ និងសម្របសម្រួលការពិនិត្យឡើងវិញ និងការវិភាគមុខងារ និងរចនាសម្ព័ន្ធក្រសួងសាធារណការ និងដឹកជញ្ជូន ព្រមទាំងសមាជិក សមាជិកាលេខាធិការដ្ឋានចំណុះ ចូលរួមសរុបចំនួន ២៣៩នាក់។ វគ្គបណ្តុះបណ្តាលនេះត្រូវបានសហការរៀបចំដោយនាយកដ្ឋានបុគ្គលិក រួមជាមួយក្រុមការងារបច្ចេកទេសគាំទ្រវិស័យសេដ្ឋកិច្ច នៃអគ្គលេខាធិការដ្ឋានគណៈកម្មាធិការកែទម្រង់រដ្ឋបាលសាធារណៈ ក្នុងគោលបំណងលើកកម្ពស់ប្រសិទ្ធភាព និងស័ក្កិសិទ្ធិភាពនៃការបំពេញមុខងារ និងបេសកកម្មរបស់ក្រសួង ស្ថាប័ន ឆ្លើយតបទៅនឹងយុទ្ធសាស្ត្របញ្ចកោណដំណាក់កាលទី១ នៃរាជរដ្ឋាភិបាល ក៏ដូចជាការធ្វើទំនើបកម្មមន្ត្រីរាជការ ការពង្រឹង និងពង្រើកសមត្ថភាពមន្ត្រីរាជការ មន្ត្រីកិច្ចសន្យា ជាពិសេសការពិនិត្យ និងរៀបចំឡើងវិញលើការវិភាគមុខងារ តួនាទី ភារកិច្ច ឱ្យបានត្រឹមត្រូវ ធ្វើយ៉ាងណាមិនឱ្យមានតួនាទីជាន់គ្នានៅក្នុងក្រសួង ស្ថាប័ន និងមានភាពប្រទាក់ក្រឡាគ្នារវាងស្ថាប័នមួយ ទៅស្ថាប័នមួយទៀត សំដៅឱ្យការអនុវត្តការងារប្រកបដោយភាពស្អាតស្អំ។ តាមរយៈវគ្គបណ្តុះបណ្តាលនេះ រំពឹងថាសិក្ខាកាមដែលបានចូលរួម នឹងទទួលបានចំណេះដឹង បទពិសោធន៍ល្អៗ វិធីសាស្ត្រសម្រាប់រៀបចំ ក្នុងការពិនិត្យឡើងវិញ ក៏ដូចជាជំនួយដល់ការវិភាគមុខងារ និងរចនាសម្ព័ន្ធរបស់អង្គភាពខ្លួន ដើម្បីបញ្ជូនឯកសារនានា ទៅកាន់នាយកដ្ឋានបុគ្គលិក និងក្រុមការងារកំណែទម្រង់ក្រសួង ឱ្យបានទាន់ពេលវេលាកំណត់ និងត្រឹមត្រូវតាមការគ្រោងទុក៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube