លោកនាយករដ្ឋមន្ត្រី ហ៊ុន ម៉ាណែតកាលពីម្សិលមិញសម្ពោធដាក់ឱ្យប្រើប្រាស់ជាផ្លូវការ កំពង់ផែពហុបំណងកំពត នៅខេត្តកំពត ដោយបញ្ជាក់ថា កំពង់ផែនេះនឹងក្លាយជាជំហានដ៏សំខាន់សម្រាប់ការអភិវឌ្ឍសេដ្ឋកិច្ចកម្ពុជា ជំរុញសមត្ថភាពនាំចេញ និងលើកកំពស់ភស្តុភារ។ លោកបានថ្លែងថា វិស័យកំពង់ផែ គឺជាវិស័យអាទិភាពមួយ ក្នុងចំណោមវិស័យអាទិភាពនានា ដែលរដ្ឋាភិបាលបានយកចិត្តទុកដាក់ជំរុញការអភិវឌ្ឍ ដោយត្រូវខិតខំបន្តក្នុងការបង្កើននូវថវិកាសម្រាប់ការវិនិយោគ និងកៀរគរ ព្រមទាំងការពង្រឹងនូវប្រសិទ្ធភាពនៃការប្រើប្រាស់ ដើម្បីបន្តអភិវឌ្ឍន៍ហេដ្ឋារចនាសម្ព័ន្ធកំពង់ផែឱ្យកាន់តែរីកចម្រើនបន្ថែមទៀត។លោកថា កំពង់ផែពហុបំណងនៅខេត្តកំពត ជាកំពង់ដ៏ទំនើប និងដ៏មានសារៈសំខាន់ ដែលនឹងជួយបំពេញបន្ថែមលើមុខងាររបស់កំពង់ផែស្វយ័តក្រុងព្រះសីហនុ រួមទាំងកំពង់ផែស្វយ័តភ្នំពេញថែមទៀតផង។ កំពង់ផែពហុបំណងកំពតដែលសាងសង់រួចរាល់ដំណាក់កាលទី១ តម្លៃប្រមាណ ១៤០លានដុល្លារអាម៉េរិក ជាទុនវិនិយោគដោយផ្ទាល់របស់ក្រុមហ៊ុនកំពតផត ត្រូវបានរដ្ឋាភិបាលអនុញ្ញាតឱ្យបង្កើតឡើងអំឡុងឆ្នាំ២០០៥ និងត្រូវបានក្រសួងសាធារណការ និងដឹកជញ្ជូនអនុញ្ញាតឱ្យអភិវឌ្ឍសាងសង់ហេដ្ឋារចនាសម្ព័ន្ធកំពង់ផែ នៅអំឡុងឆ្នាំ២០១២ លើផ្ទៃដីទំហំសរុប ២០៧ហិកតា ដែលជាកម្មសិទ្ធិរបស់ក្រុមហ៊ុនកំពតផត។ លោកនាយករដ្ឋមន្ត្រីបានបញ្ជាក់ថា “ប្រទេសយើងត្រូវការការរីកចម្រើន គោលដៅរបស់យើងគឺធំ នោះគឺការអភិវឌ្ឍប្រទេសឱ្យក្លាយជាប្រទេសមានចំណូលខ្ពស់នៅឆ្នាំ២០៥០ ដែលជាចំណូលខ្ពស់ជាមធ្យមសម្រាប់ប្រជាពលរដ្ឋ មិនមែនសម្រាប់រដ្ឋទេ។ នេះមានន័យថា ឆ្នាំ២០៥០ គឺយើងចង់ឱ្យប្រជាពលរដ្ឋរបស់យើងមានជីវភាពកាន់តែសម្បូរសប្បាយ ធ្វើយ៉ាងណាឱ្យប្រទេសរបស់យើង ប្រជាជនរបស់យើងជំនាន់ក្រោយគ្រប់ជំនាន់កាន់តែមានសក្តានុពល និងមានលទ្ធភាពនៅក្នុងទទួលបាននូវផលប្រយោជន៍ពីសន្តិភាព ដែលយើងទទួលបាននៅឆ្នាំ១៩៩៨។ “ លោកថា ការធានានូវសុខសន្តិភាព ស្ថិរភាព ទាំងស្ថិរភាពនយោបាយ សង្គម និងសេដ្ឋកិច្ច គឺជាកិច្ចការសំខាន់ ហើយការដាក់ចេញនូវគោលនយោបាយដ៏ត្រឹមត្រូវ គឺជាការចាំបាច់។ លោកនាយករដ្ឋមន្ត្រីបញ្ជាក់ថា៖ «អ៊ីចឹងការដាក់ចេញនូវគោលនយោបាយ ចាំបាច់ត្រូវតែពិនិត្យមើលឱ្យបានច្បាស់លាស់។ ដើម្បីឱ្យប្រទេសកម្ពុជាទាំងមូលមានការរីកចម្រើន វាទាល់តែខេត្ត និងរាជធានីនីមួយៗរីកចម្រើន។ លោកថា “ដើម្បីឱ្យប្រទេសរបស់យើងក្លាយជាប្រទេសដែលមានចំណូលកម្រិតខ្ពស់ ទាល់តែចំណូលរបស់រាជធានីខេត្តនីមួយៗមានកម្រិតខ្ពស់ ដែលនេះគឺជាគោលដៅធំនៃគោលនយោបាយរបស់រាជរដ្ឋាភិបាល ដែលត្រូវធ្វើឱ្យកម្ពុជាក្លាយជាប្រទេសមានចំណូលខ្ពស់នៅឆ្នាំ២០៥០ ដែលមានន័យថាធ្វើឱ្យប្រជាពលរដ្ឋនៅគ្រប់រាជធានីខេត្តទាំងអស់មានចំណូលខ្ពស់នៅឆ្នាំ២០៥០ទៅតាមគោលដៅរបស់យើង»។ លោកនាយករដ្ឋមន្ត្រីបញ្ជាក់ទៀតថា ដើម្បីដាក់ចេញគោលនយោបាយឱ្យបានត្រឹមត្រូវសម្រាប់រាជធានីខេត្តនីមួយៗ គឺត្រូវមានការវិភាគឱ្យបានច្បាស់លាស់ថា រាជធានីខេត្តនីមួយៗមានសក្តានុពលអ្វីខ្លះ ដោយយើងមិនអាចដាក់គោលដៅអភិវឌ្ឍន៍វប្បធម៌ ទេសចរណ៍ខ្លាំងនៅខេត្តកំពតនោះទេ ហើយក៏មិនអាចអភិវឌ្ឍន៍គោលដៅកំពង់ផែបែបនេះសម្រាប់ខេត្តសៀមរាបបាននោះដែរ ព្រោះវាមិនត្រូវនឹងសក្តានុពលរបស់ខេត្ត។ លោក ហ៊ុន ម៉ាណែត បានបន្ថែមថា ដូច្នេះ យើងត្រូវតែមើលឱ្យច្បាស់ថាតើរាជធានីខេត្តនីមួយៗមានអ្វីខ្លះដែលខ្លាំង ដើម្បីយើងអនុវត្តន៍ឱ្យចំសក្តានុពលរបស់រាជធានីខេត្តនោះ ហើយយកមកផ្គុំគ្នា ដើម្បីបានការរីកចម្រើនរួមរបស់ប្រទេសជាតិទាំងមូល៕