កិច្ចប្រជុំតុមូលស្តីពី “ការបើកទ្វារកំណើន តាមរយៈការអភិវឌ្ឍន៍ហេដ្ឋារចនាសម្ព័ន្ធនៅកម្ពុជា” ដែលរៀបចំឡើងនៅមជ្ឈមណ្ឌលសន្និសីទ Suntec ប្រទេសសឹង្ហបុរី! ប្រទេសសឹង្ហបុរី៖ ថ្ងៃទី០៤-០៥ ខែមិថុនា ឆ្នាំ២០២៤ ឯកឧត្តម ហេង ណន រដ្ឋលេខាធិការ តំណាងឯកឧត្តម ប៉េង ពោធិ៍នា រដ្ឋមន្ដ្រីក្រសួងសាធារណការ និងដឹកជញ្ជូន បានដឹកនាំគណៈប្រតិភូកម្ពុជាអញ្ជើញចូលរួមវេទិកាហេដ្ឋារចនាសម្ព័ន្ធអាស៊ីឆ្នាំ២០២៤ (AIF-2024) នៅប្រទេសសឹង្ហបុរី និងសហការរៀបចំកម្មវិធីកិច្ចពិភាក្សាគម្រោង ស្ដីអំពីការអភិវឌ្ឍហេដ្ឋារចនាសម្ព័ន្ធកម្ពុជា ក្រោមប្រធានបទ “ការបើកទ្វារកំណើន តាមរយៈការអភិវឌ្ឍន៍ហេដ្ឋារចនាសម្ព័ន្ធនៅកម្ពុជា”។ វេទិកាទាំង២ថ្ងៃនេះ បានពិភាក្សាលើចំណុចខ្លាំង ចំណុចខ្សោយ បញ្ហាប្រឈមនិងដំណោះស្រាយជុំវិញហេដ្ឋារចនាសម្ព័ន្ធ និងកង្វះការផ្លាស់ប្តូររហូតមកដល់បច្ចុប្បន្ន។ សូមបញ្ជាក់ផងដែរថា វេទិកានេះរៀបចំឡើង ក្នុងគោលបំណងបង្កើតជាវេទិកាប្រមូលផ្តុំមន្រ្តីសំខាន់ៗរបស់រដ្ឋាភិបាល ដៃគូអភិវឌ្ឍន៍ ផ្នែកឯកជន និងហិរញ្ញប្បទានញឹក (Financiers) ដើម្បីពិភាក្សា-ផ្លាស់ប្តូរយោបល់ ក្នុងការអភិវឌ្ឍវិស័យ ហេដ្ឋារចនាសម្ព័ន្ធនៅអាស៊ី។ តាមរយៈវេទិកានេះ ប្រទេសចូលរួមនីមួយៗអាចធ្វើការផ្សព្វផ្សាយគម្រោងហេដ្ឋារចនាសម្ព័ន្ធដែលជាអាទិភាពរបស់ខ្លួន ដើម្បីទាក់ទាញវិនិយោគិន។ ជាមួយគ្នានេះផងដែរ តាមរយៈការរៀបចំកម្មវិធីកិច្ចពិភាក្សាគម្រោង ស្ដីអំពីការអភិវឌ្ឍហេដ្ឋារចនាសម្ព័ន្ធកម្ពុជា ដែលប្រព្រឹត្តនៅក្នុងថ្ងៃទី២នៃកម្មវិធី តំណាងអគ្គនាយកដ្ឋានជំនាញ និងស្ថាប័នអនុវត្តគម្រោងបានធ្វើបទបង្ហាញស្តីពី៖ (១) ផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣៣ (២) គម្រោងអភិវឌ្ឍកំពង់ផែតូច និងមធ្យមសម្រាប់ការដឹកជញ្ជូនកសិផលកម្ពុជា (៣) គម្រោងមជ្ឈមណ្ឌលភស្តុភារកម្មភ្នំពេញ (PP LC) (៤) គម្រោងមជ្ឈមណ្ឌលភស្តុភារកម្មព្រះសីហនុ (SHV LC) និង (៥) គម្រោងកែលម្អ និងពន្លឿនប្រព័ន្ឋទឹកកខ្វក់និងគម្រោងសាងសង់ទីលានទុកដាក់សំរាម។ គួរបញ្ជាក់ថា ការធ្វើបទបង្ហាញគម្រោងដែលមានសក្តានុពលខាងលើនេះ គឺធ្វើឡើងក្នុងគោលបំណងផ្សព្វផ្សាយ ជំរុញ កៀគរហិរញ្ញប្បទាន សម្រាប់ការអនុវត្តគម្រោង ពីប្រទេសដៃគូ អភិវឌ្ឍន៍ ស្ថាប័នអន្តរជាតិ និងវិនិយោគិននៅក្នុងតំបន់។