កិច្ចប្រជុំបន្តពិនិត្យពិភាក្សាលើសេចក្ដីព្រាងអនុក្រឹត្យស្ដីពីការរៀបចំ និងការប្រព្រឹត្តទៅរបស់គណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ ទីស្ដីការក្រសួង៖ នារសៀលថ្ងៃចន្ទ ទី២២ ខែមេសា ឆ្នាំ២០២៤ ឯកឧត្តម ប៉ាល់ ចន្ទតារា រដ្ឋលេខាធិការក្រសួងសាធារណការ និងដឹកជញ្ជូន និងប្រធានក្រុមការងារទី១ នៃគណៈកម្មការចំពោះកិច្ចដោះស្រាយបញ្ហាប្រឈមពាក់ព័ន្ធនឹងការងារត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ និងឯកឧត្តម យិត បុណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំជាសហប្រធាន បន្តពិនិត្យនិងពិភាក្សាលើសេចក្ដីព្រាងអនុក្រឹត្យស្ដីពីការរៀបចំ និងការប្រព្រឹត្តទៅរបស់គណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ ដោយមានការអញ្ជើញចូលរួមពីថ្នាក់ដឹកនាំក្រសួង និងមន្ត្រីជំនាញពាក់ព័ន្ធក្រោមឱវាទក្រសួង។ កិច្ចប្រជុំនេះ ត្រូវបានរៀបចំឡើងក្នុងគោលបំណងបន្តពិនិត្យនិងពិភាក្សាលើសំណើសុំផ្តល់ធាតុចូល និងចូលរួមផ្តល់យោបល់ខ្លឹមសារលើមាត្រាមួយចំនួននៃសេចក្តីព្រាងអនុក្រឹត្យនេះ ព្រមទាំងពិនិត្យផ្ទៀងផ្ទាត់ ពាក្យពេចន៍ ឃ្លាឃ្លោង និងខ្លឹមសារ ដើម្បីឱ្យមានអត្ថន័យគ្រប់ជ្រុងជ្រោយ និងមានសង្គតិភាព ព្រមទាំងអាចអនុវត្តបានតាមការរីកចម្រើន និងការអភិវឌ្ឍសង្គមជាតិជាក់ស្តែង មុននឹងដាក់ជូនក្រសួងពាក់ព័ន្ធ ប្រជុំពិនិត្យ និងពិភាក្សា និងបន្តដាក់ជូនគណៈកម្មការចំពោះកិច្ចដោះស្រាយបញ្ហាប្រឈមពាក់ព័ន្ធនឹងការងារត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ ពិនិត្យ និងសម្រេច ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube