ក្រុមការងារការិយាល័យសុវត្ថិភាពចរាចរណ៍ផ្លូវគោក នៃមន្ទីរសាធារណការ និងដឹកជញ្ជូនខេត្តស្វាយរៀង បានចុះផ្សព្វផ្សាយច្បាប់ស្ដីពីចរាចរណ៍ផ្លូវគោក ក្នុងឱកាសបុណ្យចូលឆ្នាំប្រពៃណីជាតិខ្មែរនាពេលខាងមុខ នាព្រឹកថ្ងៃសុក្រ ទី៥ ខែមេសា ឆ្នាំ២០២៤ ក្រោមការចង្អុលបង្ហាញពី លោក នួន លីហួន ប្រធានមន្ទីរសាធារណការ និងដឹកជញ្ជូនខេត្តស្វាយរៀង លោកប្រធានការិយាល័យសុវត្ថិភាពចរាចរណ៍ បានដឹកនាំមន្ត្រីក្រោមឱវាទ ចុះអប់រំផ្សព្វផ្សាយច្បាប់ស្តីពីចរាចរណ៍ផ្លូវគោក និងចងបដាអប់រំសុវត្ថិភាពចរាចរណ៍ចំនួន ០២ផ្ទាំង តាមបណ្តោយផ្លូវជាតិលេខ១ ស្ថិតនៅក្នុងភូមិសាស្រ្តខេត្តស្វាយរៀង គោលបំណងដើម្បីបង្ការ និងទប់ស្កាត់គ្រោះថ្នាក់ចរាចរណ៍ផ្លូវគោក និងពញ្ញាក់ស្មារតី ដល់បងប្អូនប្រជាពលរដ្ឋ អាជីវករ និងសាធារណៈជន យល់ដឹងអំពីច្បាប់សុវត្ថិភាពចរាចរណ៍ផ្លូវគោក គឺត្រូវពាក់មួកសុវត្ថិភាពទាំងអ្នកបើកបរ និងអ្នករួមដំណើរឱ្យបានត្រឹមត្រូវរាល់ពេលអ្នកបើកបរ ចេះអធ្យាស្រ័យគ្នា ការបើកបរមិនស្ថិតក្រោមឥទ្ធិពលនៃគ្រឿងស្រវឹង និងមិនបើកបរលើសល្បឿនកំណត់ គោរពសិទ្ធិអាទិភាពនៅផ្លូវប្រសព្វ ដើម្បីចូលរួមទប់ស្កាត់កាត់បន្ថយបាត់បង់អាយុជីវិត រងបួស ពិការភាព និងការខូចខាតទ្រព្យសម្បត្តិ ដោយសារគ្រោះថ្នាក់ចរាចរណ៍ផ្លូវគោក ក្នុងភូមិសាស្រ្តខេត្តស្វាយរៀង ។នាឱកាសនោះក្រុមការងារក៍បានធ្វើការចែកជូនសម្ភារសុវត្ថិភាពចរាចរណ៍ផ្លូវគោក រួមមានដូចខាងក្រោម ៖ -ស្ទីកឃ័រចំណាំងផ្លាត ចំនួន ៣០សន្លឹក -សៀវភៅស្តីពីច្បាប់ចរាចរណ៍ផ្លូវគោក ចំនួន ២០ក្បាល -ខិតប័ណ្ណអ្វីដែលអ្នកបើកបរត្រូវយល់ដឹង ចំនួន២០សន្លឹក -ខិតប័ណ្ណជំនួយស្មារតីស្តីពីច្បាប់ចរាចរណ៍ផ្លូវគោក ចំនួន ២០សន្លឹក -សៀវភៅអ្វីដែលអ្នកបើកបរទោចក្រយានយន្តត្រូវយល់ដឹង ចំនួន ២០ក្បាល ។ ភ្ជាប់ទំនាក់ទំនងជាមួយមន្ទីរសាធារណការ និងដឹកជញ្ជូនខេត្តស្វាយរៀង (DPWTSVR) - Facebook: https://www.facebook.com/dpwtsvayrieng - Telegram: https://t.me/dpwtsrv