ក្រសួងសាធារណការ និងដឹកជញ្ជូន និងក្រសួង-ស្ថាប័ន ៤ផ្សេងទៀត កំពុងរៀបចំនីតិវិធីកំណត់ពេលវេលា ក្នុងការប្រឡងជ្រើសរើសមន្ត្រីរាជការ ជាមួយយន្តការគុណាធិបតេយ្យ អ្នកចេះគឺជាប់ ដោយមានការសម្របសម្រួលពី ក្រសួងមុខងារសាធារណៈ រាជធានីភ្នំពេញ៖ នាព្រឹកថ្ងៃចន្ទ ទី១២ ខែកុម្ភៈ ឆ្នាំ២០២៤ ឯកឧត្តម ប៉ាល់ ច័ន្ទតារា រដ្ឋលេខាធិការ រួមជាមួយ ឯកឧត្តម លុច្ស រចនា រដ្ឋលេខាធិការ និងជានាយកខុទ្ទកាល័យ ឯកឧត្តមរដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញដឹកនាំប្រតិភូក្រសួង ចូលរួមកិច្ចប្រជុំត្រៀមរៀបចំនីតិវិធី និងការកំណត់ពេលវេលា ក្នុងការប្រឡងជ្រើសរើសមន្ត្រីរាជការស៊ីវិល ដើម្បីឱ្យចូលបម្រើការងារនៅក្នុងក្របខណ្ឌក្រសួង-ស្ថាប័នចំនួន៥ សម្រាប់ឆ្នាំ២០២៣ ដោយបានប្រព្រឹត្តទៅនៅ ទីស្តីការក្រសួងមុខងារសាធារណៈ ក្រោមកិច្ចដឹកនាំរបស់ ឯកឧត្តម ឱម យិនទៀង ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានអង្គភាពប្រឆាំងអំពើពុករលួយ និង ឯកឧត្តម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ។ កិច្ចប្រជុំនាឱកាសនេះ មានការអញ្ជើញចូលរួមពី ឯកឧត្តម លោកជំទាវ ជាថ្នាក់ដឹកនាំក្រសួងមុខងារសាធារណៈ ក្រសួងសេដ្ឋកិច្ច និងហិរញ្ញវត្ថុ ក្រសួងសាធារណការ និងដឹកជញ្ជូន ក្រសួងអប់រំ យុវជន និងកីឡា ក្រសួងកសិកម្ម រុក្ខាប្រមាញ់ និងនេសាទ ក្រសួងអភិវឌ្ឍន៍ជនបទ អង្គភាពប្រឆាំងអំពើពុករលួយ ព្រមទាំងលោក លោកស្រី ជាមន្ត្រីពាក់ព័ន្ធសរុបប្រមាណ ៩០រូប។ អង្គប្រជុំបានពិភាក្សាពីការកំណត់ពេលវេលា ដើម្បីប្រឡងជ្រើសរើសមន្ត្រីរាជការស៊ីវិល ដើម្បីឱ្យចូលបម្រើការងារនៅក្នុងក្របខណ្ឌ សម្រាប់ក្រសួងស្ថាប័នខាងលី ស្របតាមអនុសាសន៍ដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលបានលើកឡើងថា ការរៀបចំឱ្យមានការប្រឡងជាយន្តការរួម ដោយមានកិច្ចសហការជាមួយក្រសួងជំនាញ គឺដើម្បីធានាឱ្យបាននូវសង្គតភាព ភាពត្រឹមត្រូវ តម្លាភាព និងយុត្តិធម៌ ពិសេស ធានាឱ្យបាននូវគុណាធិបតេយ្យ ពោលគឺ “អ្នកចេះគឺជាប់” ។ សូមជម្រាបថា៖ ក្រសួងស្ថាប័នទាំង៥ ដែលកំពុងរៀបចំនីតិវិធីក្នុងការប្រឡងជ្រើសរើសមន្ត្រីរាជការស៊ីវិល ដើម្បីឱ្យចូលបម្រើការងារនៅក្នុងក្របខណ្ឌរបស់ខ្លួន រួមមាន៖ (១)ក្រសួងសាធារណការ និងដឹកជញ្ជូន (២)ក្រសួងអប់រំ យុវជន និងកីឡា (៣)ក្រសួងកសិកម្ម រុក្ខាប្រមាញ់ និងនេសាទ (៤)ក្រសួងអភិវឌ្ឍន៍ជនបទ និង (៥)អង្គភាពប្រឆាំងអំពើពុករលួយ ដោយមានការសម្របសម្រួលពីក្រសួងមុខងារសាធារណៈ។ ក្នុងនោះ ក្រសួងសាធារណការ និងដឹកជញ្ជូន នឹងមានការជ្រើសរើសមន្ត្រីឱ្យចូលបម្រើការចំនួន ៩៩កន្លែង សម្រាប់ក្របខណ្ឌឆ្នាំ២០២៣៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube