កិច្ចប្រជុំត្រួតពិនិត្យវឌ្ឍនភាព នៃការអនុវត្តគម្រោងធ្វើឱ្យប្រសើរឡើងនៃការគ្រប់គ្រងសំរាម សំណល់រឹង និងសំណល់ផ្លាស្ទិក ដំណាក់កាលដំបូង ក្នុងប្រទេសកម្ពុជា កាលពីថ្ងៃទី២៥ ដល់ថ្ងៃទី៣០ ខែមករា ឆ្នាំ២០២៤ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានដឹកនាំគណៈប្រតិភូក្រសួង ចូលរួមកិច្ចប្រជុំនៃការចាប់ផ្តើមបេសកកម្មលើកទី២ របស់ក្រុមការងារធនាគារពិភពលោក ដឹកនាំដោយ លោកស្រី Katelijn van den Berg អ្នកឯកទេសជាន់ខ្ពស់ផ្នែកបរិស្ថាន និងជាប្រធានក្រុមការងារ ដើម្បីគាំទ្រការអនុវត្តគម្រោងធ្វើឱ្យប្រសើរឡើង នៃការគ្រប់គ្រងសំរាម សំណល់រឹង និងសំណល់ផ្លាស្ទិក នៅប្រទេសកម្ពុជា។ បេសកកម្មនេះ បានប្រព្រឹត្តទៅនៅក្នុងភូមិសាស្រ្តខេត្តសៀមរាប កណ្តាល និងខេត្តកំពង់ស្ពឺ។ កិច្ចប្រជុំ និងបេសកកម្មលើកទី២នេះ មានការអញ្ជើញចូលរួមពី ឯកឧត្តមតំណាងក្រសួងបរិស្ថាន ឯកឧត្តមតំណាងក្រសួងមហាផ្ទៃ លោក លោកស្រី នាយកគម្រោង ប្រធានគ្រប់គ្រង សមាជិក សមាជិកានៃគម្រោង ក្រុមការងាររបស់ធនាគារពិភពលោក (World Bank - WB) មន្ត្រីរដ្ឋបាលខេត្តគោលដៅទាំង៣ និងមន្ត្រីពាក់ព័ន្ធជាច្រើនរូបផ្សេងទៀត។ គណៈប្រតិភូបានពិនិត្យមើលវឌ្ឍនភាពនៃការអនុវត្តគម្រោងក្នុងដំណាក់កាលដំបូង រួមទាំងលទ្ធផលដែលសម្រេចបានឆ្លើ យតបទៅនឹងផែនការសកម្មភាពដែលបានឯកភាពនៅក្នុងរបាយការណ៍ ក៏ដូចជាពិនិត្យមើលលើបញ្ហាប្រឈម និងចំនុចខ្វះខាតដែលបានធ្វើការកែលម្អ។ បន្ថែមពីនោះ គណៈប្រតិភូ និងក្រុមការងារពាក់ព័ន្ធបានចុះពិនិត្យទីលានទុកដាក់សំរាមដែលមានស្រាប់ និងទីតាំងដែលបានស្នើឡើង សម្រាប់រៀបចំធ្វើជាទីលានទុកដាក់សំរាមរបស់គម្រោងនៅក្នុងខេត្តគោលដៅទាំង៣ ដូចបានរៀបរាប់ខាងលើ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube