កិច្ចប្រជុំគណៈកម្មការត្រៀមរៀបចំសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ ទីស្តីការក្រសួង៖ នារសៀលថ្ងៃចន្ទ ទី១៥ ខែមករា ឆ្នាំ២០២៤ លោកជំទាវ កុយ សុដានី រដ្ឋលេខាធិការប្រចាំការ ក្រសួងសាធារណការ និងដឹកជញ្ជូន និងជាប្រធានគណៈកម្មការ បានអញ្ជើញដឹកនាំកិច្ចប្រជុំគណៈកម្មការរៀបចំសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងសាធារណការ និងដឹកជញ្ជូន ដោយមានការអញ្ជើញចូលរួមពីសំណាក់ ឯកឧត្តម លោកជំទាវ លោក លោកស្រី ជាអនុប្រធាន សមាជិក សមាជិកា គណៈកម្មការជាច្រើនរូបផ្សេងទៀត។ កិច្ចប្រជុំនាឱកាសនេះ ធ្វើឡើងក្នុងគោលបំណងដើម្បីប្រកាសសមាសភាព និងតួនាទីភារកិច្ចរបស់គណៈកម្មការ និងអនុគណៈកម្មការនីមួយៗ។ ក្នុងនោះដែរ លោកជំទាវប្រធានគណៈកម្មការ បានធ្វើការណែនាំដល់សមាជិក សមាជិកានៃគណៈកម្មការ និងអនុគណៈកម្មការទាំងអស់ សហការគ្នាឱ្យបានជិតស្និទ្ធជាមួយភាគីពាក់ព័ន្ធ ផ្តល់ព័ត៌មានទៅវិញទៅមកឱ្យបានគ្រប់ជ្រុងជ្រោយ ជាពិសេស ត្រូវអនុវត្តតាមតួនាទី និងភារកិច្ច ដែលថ្នាក់ដឹកនាំបានប្រគល់ជូន សំដៅធានាឱ្យការរៀបចំពិធីសន្និបាតប្រចាំឆ្នាំរបស់ក្រសួង អាចប្រព្រឹត្តទៅបានដោយរលូន ប្រកបដោយសន្តិសុខ សុវត្ថិភាព សណ្តាប់ធ្នាប់ ជូនដល់គណៈអធិបតី និងភ្ញៀវកិត្តិយស ដែលនឹងអញ្ជើញចូលរួម ទៅតាមផែនការដែលបានគ្រោងទុក។ សូមជម្រាបជូនថា៖ សន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងសាធារណការ និងដឹកជញ្ជូន គ្រោងនឹងប្រព្រឹត្តទៅនៅអំឡុងខែកុម្ភៈ ឆ្នាំ២០២៤ ខាងមុខនេះ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube