គម្រោងលើកកម្រិតផ្លូវជាតិលេខ៤៨ និង​គម្រោង​សាង​សង់​ផ្លូវ​ជាតិ​លេខ​១០ ពន្លឿនការងារសាងសង់ឱ្យរួចរាល់នៅឆ្នាំ២០២៥។ នេះបើយោងតាមក្រសួងសាធារណការនិងដឹកជញ្ជូន នៅថ្ងៃទី១៧​ ខែធ្នូ ឆ្នាំ២០២៣។ ក្រសួងសាធារណការនិងដឹកជញ្ជូន ពន្លឿនការងារ គម្រោងសាងសង់ និងលើកកម្រិតគុណភាពផ្លូវជាតិលេខ៤៨ (ស្រែអំបិល-កោះកុង) នៅក្នុងរដូវប្រាំងនេះ ឱ្យសម្រេចបានតាមផែនការគម្រោងដែលបានកំណត់ សំដៅធ្វើឱ្យខ្សែផ្លូវនេះមានគុណភាព អាចប្រើប្រាស់បានយូរអង្វែង ដោយធ្វើការសហការគ្នាដើម្បីអាចបញ្ចប់ការងារសាងសង់បាននៅចុងខែមេសា ឆ្នាំ២០២៥ ខាងមុខ។ គម្រោង​សាង​សង់​ផ្លូវ​ជាតិ​លេខ​១០​ ដែលមានប្រវែងប្រមាណជិត ២០០គីឡូម៉ែត្រ តភ្ជាប់​ពី​ស្រុក​សំឡូត ខេត្តបាត់ដំបង ទៅភ្ជាប់ស្រុកវាលវែង-អូរសោម នៃខេត្តពោធិ៍សាត់ និងរហូត​ដល់​ខេត្ត​កោះកុង សម្រេចបានប្រមាណ ៧៣%ហើយ គម្រោង​នេះ​គ្រោង​បញ្ចប់ការសាងសង់ទាំងស្រុងនៅក្នុងកំឡុងឆ្នាំ២០២៥។ នេះបើយោងតាម ទូរទស្សន៍ BTV ។ សូមជម្រាប​ថា គម្រោងលើកកម្រិតគុណភាពផ្លូវជាតិលេខ៤៨ តភ្ជាប់ខេត្តព្រះសីហនុ ទៅកាន់ខេត្តកោះកុងប្រវែង១៤៨គីឡូម៉ែត្រ។ គម្រោងផ្លូវនេះ រួមមាន៖ ផ្លូវ២គន្លង មានប្រវែង ១២២.៩គីឡូម៉ែត្រ ទទឹងផ្លូវ ១១ម៉ែត្រ និង ផ្លូវ៤គន្លង មានប្រវែង ២៥.១គីឡូម៉ែត្រ ទទឹងចាប់ពី ១៨.៥ម៉ែត្រ ដល់ ២១.៥ម៉ែត្រ។ ចំណែកឯ គម្រោងសាងសង់ផ្លូវជាតិលេខ១០ មានទទឹងតួផ្លូវសរុបចំនួន៩ម៉ែត្រ ជាប្រភេទផ្លូវកៅស៊ូពីរស្រទាប់ (DBST) សាងសង់ស្ពានចំនួន២៨កន្លែងប្រវែង​ ១.៧២១,៤៦ម៉ែត្រ ដែលក្នុងនោះមានស្ពានខ្ពស់ជាងគេមួយដែលមានកម្ពស់៧៥ម៉ែត្រ បណ្តោយ៥៣០ម៉ែត្រ និងទទឹង១០ម៉ែត្រ។ លើសពីនេះ ផ្លូវមួយខ្សែនេះគឺជាសរសៃឈាមដ៏សំខាន់ក្នុងការធ្វើដំណើរនិងជញ្ជូន សំរាប់ប៉ូលសេដ្ឋកិច្ចទីបួន រួមមាន ខេត្តពោធិ៍សាត់ ខេត្តបាត់ដំបង ខេត្តបន្ទាយមានជ័យ និងប៉ៃលិន។​