ស្ពានកោះនរា ដែលជាស្ពានប្រអប់បេតុងខ្សែកាបឆ្លងកាត់ទន្លេបាសាក់ភ្ជាប់រវាងតំបន់អភិវឌ្ឍកោះពេជ្រ ទៅតំបន់អភិវឌ្ឍកោះនរាត្រូវបានសម្ពោធឱ្យប្រើប្រាស់ជាផ្លូវការនៅរសៀលថ្ងៃទី១៥ ខែ វិច្ឆិកា ឆ្នាំ២០២៣ ក្រោមអធិបតីភាពសម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ ក្រោយពីស្ពានបេតុងខ្សែកាបនេះបានដាក់ឱ្យដំណើរការចរាចរណ៍នោះប្រជាពលរដ្ឋបានសម្ដែងក្តីសប្បាយរីករាយ ដែលទទួលបានសមិទ្ធផលថ្មីមួយទៀត ដែលអាចជួយកាត់បន្ថយការកកស្ទះចរាចរបានមួយកម្រិតថែមទៀត។ សូមលោកអ្នកនាងស្ដាប់បទយកការណ៍របស់វិទ្យុជាតិកម្ពុជា ស្ដីពីបញ្ហានេះ ដូចតទៅ៖ ស្ពានគឺជាការតភ្ជាប់ពីតំបន់មួយទៅតំបន់មួយទៀត ដើម្បីផ្តល់ភាពងាយស្រួលក្នុងការធ្វើដំណើរ និងបង្កើនសេដ្ឋកិច្ចជាតិ។ជាក់ស្តែងពេល នេះស្ពានបេតុង ដែលតភ្ជាប់ពីផ្លូវជាតិលេខ១ ទៅតំបន់អភិវឌ្ឍកោះនរា និងស្ពានបេតុងខ្សែកាបតភ្ជាប់ពីកោះនរាទៅកោះពេជ្រដែលត្រូវបានសាងសង់រួចរាល់នឹងដាក់ឱ្យដំណើរការចរាចណ៍ជាផ្លូវការកាលពីថ្ងៃទី១៥ ខែ វិច្ឆិកា ឆ្នាំ២០២៣នឹងបានជួយសម្រាលបន្ទុកការលំបាកនិងកាត់បន្ថយការចំណាយថវិកាព្រមទាំងពេលវេលាក្នុងការធ្វើដំណើរបានមួយកម្រិត ។ លោកសែន វស្សា ជាប្រជាពលរដ្ឋរស់នៅសង្កាត់និរោធបានសម្ដែងការសប្បាយ រីករាយជាពន់ពេក នៅពេលដែលរាជរដ្ឋាភិបាលបានកសាងស្ពាន១ខ្សែទៀត នៅក្នុងទឹកដី របស់លោកព្រោះថានេះជាសមិទ្ធផលថ្មីមួយទៀត ដែលអាចជួយសម្រាលបន្ទុក ការកកស្ទះចរាចរ នៅពេលដែលប្រជាពលរដ្ឋធ្វើដំណើរទៅមកពីផ្ទះឆ្ពោះមកកាន់រាជធានីភ្នំពេញ។ សំឡេងទី១«ឥឡូវមានផ្លូវ ដែលជួយសម្រួលចរាចរជូនបងប្អូនប្រជាពលរដ្ឋ ដែលមួយរយៈមុន ការឆ្លងកាត់តាមបណ្ដោយផ្លូវជាតិលេខ១មានការកកស្ទះខ្លាំង ដល់ពេលបានស្ពាននេះ បើកដំណើរ ធ្វើឱ្យដំណើរការរលូនជាងមុនឆ្ងាយខាងនោះក៏មិនកក ខាងនេះក៏មិនកក អ៊ីចឹង ចំណេញពេលវេលាទាំងទៅទាំងមក អ៊ីចឹងធ្វើដំណើរដោយការសប្បាយចិត្តទាំងអស់គ្នា ។ ជាពិសេស នៅពេលមានធុរៈបងប្អូនប្រជាពលរដ្ឋដែលមានជំងឺ ស្ត្រីមានផ្ទៃពោះត្រូវការឆ្លងទន្លេ បើគ្មានស្ពានមួយនេះទេ ពិបាកនឹងការឆ្លង ព្រោះការកកស្ទះនៅតំបន់ក្បាលថ្នល់គឺខ្លាំង ដល់ ពេលបានស្ពាននេះមកកាត់បន្ថយការកកស្ទះហើយ ទៅដល់មន្ទីរពេទ្យក៏បានលឿនរហ័ស ដែលកាត់បន្ថយនូវគ្រោះថ្នាក់ផ្សេងៗបានមួយកម្រិតថែមទៀត»។ លោកសែន វស្សាបានលើកឡើងទៀតថា៖ នេះជាសមិទ្ធផលថ្មីលើទឹកដីសន្តិភាព ព្រោះដោយហេតុថាប្រសិន បើគ្មានសន្តិភាពទេក៏គ្មានអ្វីៗដូចថ្ងៃនេះដែរ។ សំឡេងទី២«បើសិនអត់មានសន្តិភាពទេ ការអភិវឌ្ឍន៍ក៏គ្មានដែរ ទោះជាការអភិវឌ្ឍន៍មិនទាន់បាន១០០% តែការអភិវឌ្ឍន៍បានជួយសម្រួលការធ្វើដំណើរ ជីវភាពបងប្អូនប្រជាពលរដ្ឋបានច្រើន សង្ឃឹមថា ទៅថ្ងៃមុខរាជរដ្ឋាភិបាលបន្តការអភិវឌ្ឍន៍បន្ថែមទៅមុខទៀតដើម្បីសេដ្ឋកិច្ច ប្រជាពលរដ្ឋ ដើម្បីការរស់នៅរបស់ប្រជាពលរដ្ឋ។ ក្នុងនាមខ្ញុំជាប្រជាពលរដ្ឋខ្មែរម្នាក់មានការ សប្បាយចិត្ត និងថ្លែងអំណរគុណដល់រដ្ឋាភិបាលកម្ពុជាដែលដឹកនាំដោយសម្ដេចហ៊ុន ម៉ាណែត លោកអភិបាលរាជធានី និងក្រុមហ៊ុនOCIC ដែលបានខិតខំសហការគ្នាសាងសង់ស្ពាននេះ ដែលជួយសម្រួលចរាចរជូនបងប្អូនប្រជាពលរដ្ឋ»។ រីឯអ្នកស្រីសុខ ស្រីនាង ជាអាជីវករលក់ដូរនៅភូមិកោះនរា បានបង្ហាញអារម្មណ៍សប្បាយរីករាយ ដែលរាជរដ្ឋាភិបាលសាងសង់ស្ពានពីកោះនរាទៅកោះពេជ្រ បានផ្ដល់ផល ប្រយោជន៍ច្រើនដល់ប្រជាពលរដ្ឋដែលរស់នៅជុំវិញតំបន់នោះ ជាពិសេសជួយសម្រួលក្នុងការធ្វើ ដំណើរបានលឿនរហ័សជាងមុន។អ្នកស្រីបានបន្តទៀតថា៖ស្ពានថ្មីមួយខ្សែនេះ នឹងធ្វើឱ្យប្រជាពលរដ្ឋធ្វើដំណើរឆ្លងកាត់ទៅលេងកម្សាន្តនៅតំបន់កោះនរាច្រើន ដែលធ្វើឱ្យអាជីវករនៅជិត តំបន់នោះក៏ទទួលបានផលចំណេញដែរ។ សំឡេងទី៣«សម្រាប់ខ្ញុំមានផលល្អច្រើន ដោយសារចរាចរធ្វើដំណើរតាមហ្នឹងច្រើន ការលក់ដូររបស់ខ្ញុំបានប្រសើរជាងមុន ។និយាយរួមទៅតំបន់អភិវឌ្ឍនៅកោះពេជ្រOCIC វាមានទេសភាពស្អាតស្រស់ត្រកាល ចង់និយាយថារំភើបមែនទែនដោយមិននឹកស្មានថាកោះ នរាខ្ញុំពីមុនដែលជាតំបន់ទឹកលិច ផ្លូវពិបាក តែឥឡូវរាជរដ្ឋាភិបាល គាត់មានការអភិវឌ្ឍន៍ខ្លាំងក្លាដល់ កម្រិតនេះ។ហើយខ្ញុំក៏សូមថ្លែងអំណរគុណយ៉ាងខ្លាំងដល់រាជរដ្ឋាភិបាលសព្វថ្ងៃ ដែលមានការអភិវឌ្ឍន៍ ។ខ្ញុំចង់និយាយថាអរគុណសន្តិភាព ដែលមានអ្វីៗគ្រប់យ៉ាង ស្ពានកោះ នរានេះហើយ ដែលធ្វើឱ្យខ្ញុំមានការរំភើប ជាខ្លាំងដែលមិននឹកស្មានថាកោះនរា មានការកែប្រែមុខមាត់ថ្មីដល់កម្រិតនេះ»។ ចំណែកលោកស្រីទូច វលក្ខណ៍ ជាប្រជាពលរដ្ឋរស់នៅភូមិកោះនរា សង្កាត់និរោធ ខណ្ឌច្បារអំពៅមានចំណាប់អារម្មណ៍ដូច្នេះថា៖សំឡេងទី៤«នាងខ្ញុំពិតជាសប្បាយរីករាយណាស់ដែលទទួលបានស្ពានថ្មីនេះសាងសង់ហើយ ដែលជួយកាត់បន្ថយការកកស្ទះផ្លូវហើយជួយឱ្យប្រជាជននៅក្នុងភូមិកោះនរានេះ ងាយស្រួលជាងមុន ។ព្រោះថាពីមុនមកស្ទះផ្លូវខ្លាំងណាស់ នៅស្ពានច្បារអំពៅហើយឥឡូវបានស្ពានថ្មីនេះ ធ្វើឱ្យប្រជាពលរដ្ឋងាយស្រួលទៅធ្វើការបានលឿនរហ័សទាំងទៅទាំងមក។ ខ្ញុំសូមអរគុណចំពោះថ្នាក់ដឹកនាំ ដែលគាត់បានគិតគូរដល់ប្រជាជនដែលរស់នៅប៉ែកភូមិកោះនរាផ្ទាល់ និងផ្លូវជាតិលេខ១»។ នៅក្នុងពិធីសម្ពោធដាក់ឱ្យប្រើប្រាស់ជាផ្លូវការ ស្ពានខ្សែកាបតភ្ជាប់រវាងតំបន់អភិវឌ្ឍកោះនរា និងតំបន់អភិវឌ្ឍកោះពេជ្រ នាថ្ងៃទី១៥ខែវិច្ឆិកា ឆ្នាំ២០២៣ សម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានមានប្រសាសន៍ថា៖ ស្ពានកោះ នរាជាសមិទ្ធផលដ៏ថ្លៃថ្លាក្រោមគំនិតផ្ដួចផ្ដើមរបស់សម្ដេចតេជោ ហ៊ុន សែន អតីតនាយករដ្ឋមន្រ្ដីនៃកម្ពុជា ដោយបានដាក់ចេញនូវយុទ្ធសាស្រ្ដ «ទីក្រុង ចិញ្ចឹមទីក្រុង និងស្លឹកត្នោតខ្ចប់ស្ករត្នោត»។ សម្ដេចធិបតីហ៊ុន ម៉ាណែតបានថ្លែងទៀតថា៖ប្រជាពលរដ្ឋជាច្រើនម៉ឺននាក់ នឹងទទួលបានផលប្រយោជន៍ នៅតំបន់ស្ពាននាគភ្លោះកោះនរា និងស្ពានបេតុងខ្សែកាបតភ្ជាប់តំបន់អភិវឌ្ឍកោះនរា ។ សំឡេងទី៥«ឥឡូវប្រែក្លាយទៅជាតំបន់ពហុសកម្មភាពសេដ្ឋកិច្ច ដូចគេថាដីដែលលិចទៅហើយ ជប់ឡើងវិញឱ្យរីកឡើងកាន់តែខ្ពស់។ រីកនេះគឺរីកនូវផល ប្រែក្លាយទៅជាទីក្រុងមួយមិនចាញ់កោះពេជ្រប៉ុន្មាន។ ការប្រែក្លាយទីនេះទៅជាតំបន់សេដ្ឋកិច្ចឧស្សាហកម្ម ដែលគ្រោង ធ្វើ មានទីផ្សារ កន្លែងធ្វើការ សួនសាធារណៈសម្រាប់ប្រជាពលរដ្ឋកម្សាន្ត។ បងប្អូនប្រជាពលរដ្ឋនឹងអាចបង្កើតអាជីវកម្មនៅទីនេះ ក្រៅពីអ្នកធ្វើការ ក៏អាចបើកជាអាជីវកម្មរកចំណូល អាចមាន លទ្ធភាពបង្កើតសាលាទៅថ្ងៃក្រោយ កន្លែងផ្ដល់សេវាសាធារណៈ ផ្លូវនេះធ្វើហើយសម្រួលចរាចរសាធារណៈ»។ សម្ដេចធិបតីហ៊ុន ម៉ាណែតបានមានប្រសាសន៍ទៀតថា៖ រាជរដ្ឋាភិបាលបានដាក់ទិសដៅជំរុញការអភិវឌ្ឍន៍សេដ្ឋកិច្ចឆ្ពោះទៅទិសខាងកើត ដែលប្រជាពលរដ្ឋរស់នៅតាមបណ្តោយផ្លូវជាតិលេខ១ និងទទួលបានផលប្រយោជន៍ជាច្រើន ហើយនៅតំបន់កោះនរា រាជរដ្ឋាភិ បាលបានគ្រោងសាងសង់អគារដែលខ្ពស់ជាងគេនៅក្នុងតំបន់ ដែលមានកម្ពស់រហូតដល់ជាង៥០០ម៉ែត្រ។ សំឡេងទី៦« ការតភ្ជាប់ស្ពានកោះនរានៅទីនេះ រួមផ្សំគ្រោងធ្វើហេដ្ឋារចនាសម្ពន្ធមួយចំនួន ទៀត។ ឥឡូវយើងមានស្ពាន៨ ដែលបានកសាងរួចហើយនៅកម្ពុជា ឥឡូវគ្រោងថែម៣ខ្សែទៀត ខ្សែធំស្ពានអរិយក្សត្រ ទៅផ្សាររាត្រីនៅផ្សារចាស់ ស្ពានមិត្តភាពកម្ពុជា កូរ៉េ ព្រែកប្រា ដែលចរចារួចហើយ គ្រោងនឹងបុកគ្រឹះនៅឆ្នាំនេះ និងស្ពានមេគង្គក្រោម ចាក់អង្រែលើមួយទៀត ។ចឹងយើងសង្ឃឹមថា បើស្ពានទាំងអស់នេះតភ្ជាប់ទៀត យើងនឹងជំរុញកំណើនសេដ្ឋកិច្ច ជាពិសេសតាមបណ្ដោយផ្លូវជាតិលេខ១ អ្នកច្បារអំពៅ រហូតទៅដល់ស្ពានអ្នកលឿង នឹង ឃើញនូវផ្លែផ្កានៃសេដ្ឋកិច្ច និងការរីកចម្រើនក្នុងតំបន់របស់ខ្លួន នេះហើយជាអ្វីដែលសំខាន់។តាមការឱ្យដឹងរបស់ឯកឧត្ដមឃួង ស្រេង អភិបាលនៃគណៈអភិបាលរាជធានីភ្នំពេញ បានបញ្ជាក់ថា៖ គម្រោងស្ពានកោះនរា មានប្រវែងសរុប ៨២៤ម៉ែត្រ ទទឹងស្ពានសរុប ២៤,៥ម៉ែត្រ។ បណ្តោយតួស្ពានមានប្រវែង ៤៨៣ម៉ែត្រ, ផ្លូវតភ្ជាប់ក្បាលស្ពានត្រើយខាងកោះពេជ្រ មានប្រវែង ២៤៩ម៉ែត្រ ផ្លូវតភ្ជាប់ក្បាលស្ពានកោះនរា មានប្រវែង ៩២ម៉ែត្រ។ស្ពាននេះមានចរាចរទ្វេទិស មានគន្លងសម្រាប់រថយន្តចំនួន ២ទៅ និង ២មក ដែល ១គន្លងមានទទឹង ៣,២៥ម៉ែត្រ និងមានគន្លងសម្រាប់ទោចក្រយានយន្តចំនួន ១ទៅ និង១មក ដែលមានទទឹង ១,២៥ម៉ែត្រសងខាង ។រីឯការចំណាយថវិកាសាងសង់វិញនោះអស់ចំនួន ៣៨លានដុល្លារអាមេរិក និងសាងសង់ដោយក្រុមហ៊ុនវិនិយោគទុន OCIC ដោយបានចាប់ផ្ដើមសាងសង់កាលពីថ្ងៃទី២៦ ខែតុលា ឆ្នាំ២០២០ ។ សមិទ្ធផលលើទឹកដីអភិវឌ្ឍកោះនរា គឺជាសមិទ្ធផលប្រវត្តិសាស្ត្រ ថ្មីមួយទៀតសម្រាប់រាជធានីភ្នំពេញ និងសម្រាប់ជាតិកម្ពុជា។សមិទ្ធផលនេះ បានដើរតួនាទីយ៉ាងសំខាន់ ក្នុងការរួមចំណែកកាត់បន្ថយការកកស្ទះចរាចរលើកំណាត់មហាវិថីព្រះនរោត្តម ពីស្ពានអាកាសក្បាលថ្នល់ចូលមកកណ្តាលរាជធានីភ្នំពេញ ក៏ដូចជាអ្នកធ្វើដំណើរពីខណ្ឌច្បារអំពៅ។ ស្ពាននេះ ក៏បានរួមចំណែកកាត់បន្ថយការកកស្ទះចរាចរមួយផ្នែកធំលើកំណាត់ផ្លូវជាតិលេខ១ និងផ្លូវជាតិលេខ២ ដែលជាច្រកចេញចូលរាជធានីភ្នំពេញផងដែរ៕