អបអរសាទរ ព្រះរាជពិធីបុណ្យខួបគម្រប់ ១៩ព្រះវស្សា នៃការយាងគ្រងព្រះបរមសិរីរាជសម្បត្តិរបស់ ព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ថ្ងៃអាទិត្យ ១៥កើត ខែអស្សុជ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២៩ ខែតុលា ឆ្នាំ២០២៣។ ក្នុងវរោកាសដ៏មហាមង្គលវិសេសវិសាលនេះ ទូលព្រះបង្គំយើងខ្ញុំ តាងនាមថ្នាក់ដឹកនាំ មន្ត្រីរាជការ មន្ត្រីកិច្ចសន្យា និងបុគ្គលិកគ្រប់លំដាប់ថ្នាក់ ក្រោមឱវាទ សូមព្រះបរមរាជានុញ្ញាត ធ្វើអភិវន្ទនកិច្ច ថ្វាយព្រះសព្ទសាធុការពរបវរមហាប្រសើរ និងសូមលើកហត្ថប្រណមបួងសួង ដល់គុណបុណ្យព្រះរតនត្រ័យ វត្ថុស័ក្តិសិទ្ធិទាំងឡាយក្នុងលោក មានទេវតារក្សាព្រះមហាស្វេតច្ឆត្រ ទេវតារក្សាឆ្នាំថោះ បញ្ចស័ក ព្រះនាមកិមិរាទេវី ព្រះបារមីដួងព្រះវិញ្ញាណក្ខន្ធអតីតព្រះមហាក្សត្រ ព្រះមហាក្សត្រិយានីខ្មែរគ្រប់ព្រះអង្គ ជាពិសេស ព្រះបារមីដួងព្រះវិញ្ញាណក្ខន្ធ ព្រះបរមរតនកោដ្ឋ សូមតាមបីបាច់អភិបាលរក្សា ប្រោះព្រំសព្ទសាធុការពរ បវរមហាប្រសើរថ្វាយ ព្រះករុណាជាអម្ចាស់ជីវិតលើត្បូង សូមទ្រង់មានព្រះរាជសុខភាពបរិបូរ ព្រះរាជកាយពលមាំមួន ព្រះរាជបញ្ញាញាណឈ្លាសវៃ ព្រះជន្មាយុយឺនយូរ ដើម្បីគង់ប្រថាប់ក្នុងព្រះបរមសិរីរាជសម្បត្តិ ជាព្រះម្លប់ដល់អាណាប្រជានុរាស្ត្រខ្មែរគ្រប់រូប និងសូម ព្រះករុណាថ្លៃវិសេស ព្រះអង្គទ្រង់សមប្រកបដោយ ព្រះពុទ្ធពរដ៏ឧត្តុង្គឧត្តមប្រពៃថ្ឡៃថ្លាទាំងបួនប្រការគឺ អាយុ វណ្ណៈ សុខៈ និង ពលៈ ជាភិយ្យោភាពតរៀងទៅ៕