កែបៈ ដោយសង្កេតឃើញការស្ថាបនាផ្លូវ ប្របមាត់សមុទ្រ ឆ្ពោះទៅឆ្នេរអង្កោល ទើបតែសម្រេចបាន ប្រមាណ ៨០ ភាគរយនោះ អភិបាលខេត្តកែប បានជំរុញដល់ក្រុមអ្នកម៉ៅការ ត្រូវពន្លឿនសកម្មភាពរបស់ខ្លួន ដើម្បីឱ្យអ្នកដំណើរទូទៅ បានប្រើប្រាស់ មុនពិធីបុណ្យសមុទ្រ ចូលមកដល់។ ផ្លូវមួយខ្សែនេះ មានប្រវែង ១១ គីឡូម៉ែត្រ ចាប់ពីចំណុចផែទេសចរណ៍ កោះទន្សាយ ដល់តំបន់កម្សាន្តឆ្នេរអង្កោល ដោយប្រើប្រាស់មូលនិធិ របស់ធនាគារអភិវឌ្ឍន៍អាស៊ី ក្នុងទំហំទឹកប្រាក់ ប្រមាណ ១០,៥ លានដុល្លារ។ បញ្ជាក់ឱ្យដឹងនាពេលថ្មីៗនេះ លោក ពិសិដ្ឋ អភិបាលខេត្តកែប បានមានប្រសាសន៍ថា ផ្លូវប្របមាត់សមុទ្រ​ចេញពីចំណុចផែទេសចរណ៍កោះទន្សាយ ឆ្ពោះទៅកាន់តំបន់ កម្សាន្តឆ្នេរអង្កោល នឹងក្លាយជាបណ្តាញគមនាគមន៍ដ៏សំខាន់ សម្រាប់ប្រជាពលរដ្ឋ ទូទៅ។ ផ្លូវនេះ បានតភ្ជាប់ រវាងឆ្នេរកែប និងឆ្នេរអង្កោល ដែលជាចរន្តធ្វើឱ្យមាន កំណើនទេសចរ មកទស្សនាខេត្តកែប កាន់តែច្រើន ហើយក៏ជាផ្នែកសំខាន់ ក្នុងការបញ្ចៀសការកកស្ទះចរាចរ នៅឆ្នេរកែប ទៀតផង។ លោកអភិបាលខេត្ត បានបន្តថា ក្នុងនាមរដ្ឋបាលខេត្ត លោកសូមជំរុញដល់ក្រុមហ៊ុន ម៉ៅការសាងសង់ ធ្វើយ៉ាងណា ពន្លឿនសកម្មភាពរបស់ខ្លួន​ដើម្បីឱ្យពលរដ្ឋប្រើប្រាស់ ផ្លូវបានស្រួលជាងនេះ ពិសេសសម្រាប់ត្រៀមទទួលភ្ញៀវទេសចរ ដែលនឹងមកលម្ហែ កម្សាន្ត នាដើមខែធ្នូ ខាងមុខ ស្របពេលខេត្តកែប ត្រូវធ្វើជាម្ចាស់ផ្ទះរៀបចំ ពិធីបុណ្យសមុទ្រ លើកទី១០ ជុំទី៣នោះ។ សូមបញ្ជាក់ដែរថា ការស្ថាបនាផ្លូវប្របឆ្នេរសមុទ្រខាងលើ គឺជាការអនុគម្រោងមួយ ក្នុងចំណោមគម្រោងហេដ្ឋារចនាសម្ព័ន្ធទេសចរណ៍ សម្រាប់កំណើនប្រកបដោយ បរិយាប័ន្ននៃមហាអនុតំបន់មេគង្គ ជំហានទី២ របស់ធនាគារអភិវឌ្ឍន៍អាស៊ី។ នៅខេត្តកែប មានអនុគម្រោងចំនួន ២ ទៀត គឺទីលានទុកដាក់សំរាម ដែលបាន សម្ពោធ រួចរាល់ និងផ្ទេរឱ្យរដ្ឋបាលខេត្ត គ្រប់គ្រងបន្ត នាពេលកន្លងមក និងគម្រោង កំពង់ផែលើកោះទន្សាយ៕