ពិធីបិទកម្មវិធីតម្រង់ទិសសិស្សមធ្យមសិក្សា ឆ្ពោះទៅកាន់ជំនាញវិជ្ជាជីវៈឧត្តមសិក្សា សម្រាប់សិស្សថ្នាក់ទី១២ នៃវិទ្យាល័យព្រះស៊ីសុវត្ថិ រាជធានីភ្នំពេញ ដោយទទួលបានការចាត់តាំងពី លោកនាយកស្តីទី វិទ្យាស្ថានតេជោសែន សាធារណការ និងដឹកជញ្ជូន លោក សយ សេរីសុវឌ្ឍនៈ នាយករងវិទ្យាស្ថាន បានអញ្ជើញជាអធិបតី ក្នុងពិធីបិទកម្មវិធីតម្រង់ទិសសិស្សមធ្យមសិក្សា ឆ្ពោះទៅកាន់ជំនាញវិជ្ជាជីវៈឧត្តមសិក្សា សម្រាប់សិស្សថ្នាក់ទី១២ នៃវិទ្យាល័យព្រះស៊ីសុវត្ថិ រាជធានីភ្នំពេញ ដោយមានការអញ្ជើញចូលរួមផងដែរពី ឯកឧត្តម តុង វណ្ណៈ ប្រធានសមាគមអប់រំ និងតម្រង់ទិសសិស្សមធ្យមសិក្សាកម្ពុជា មន្ត្រីវិទ្យាស្ថាន និងសិស្សានុសិស្សសរុបប្រមាណ ៤០០នាក់ ដែលបានប្រព្រឹត្តទៅនាថ្ងៃសុក្រ ៧រោច ខែភទ្របទ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី០៦ ខែតុលា ឆ្នាំ២០២៣ ណៅវិទ្យាល័យព្រះស៊ីសុវត្ថិ រាជធានីភ្នំពេញ។ កម្មវិធីនេះរៀបចំឡើងក្នុងគោលបំណង ដើម្បីជួយតម្រង់ទិសសិស្សានុសិស្សនៅកម្រិតមធ្យមសិក្សា ឱ្យមានគោលដៅច្បាស់លាស់ក្នុងការចាប់យកជំនាញ ស្របតាមតម្រូវការទីផ្សារ និងបំណងប្រាថ្នាពិតប្រាកដរបស់ពួកគេ នៅតាមគ្រឹះស្ថានឧត្តមសិក្សានានា ក្រោយពីបញ្ចប់ថ្នាក់មធ្យមសិក្សាទុតិយភូមិ។ ជាមួយគ្នានេះ មន្ត្រីការិយាល័យសិក្សា របស់វិទ្យាស្ថាន ក៏បានធ្វើបទបង្ហាញលើប្រធានបទស្តីអំពីវិទ្យាស្ថាន និងការជ្រើសរើសជំនាញនៅថ្នាក់ឧត្តមសិក្សាឱ្យបានត្រឹមត្រូវ និងមានប្រសិទ្ធភាព។ គួរបញ្ជាក់ថា វិទ្យាស្ថានតេជោសែន សាធារណការ និងដឹកជញ្ជូន គ្រោងនឹងបើកទទួលនិស្សិតជំនាន់ទី៤ ចំនួន៣០០នាក់ សម្រាប់ឆ្នាំសិក្សា ២០២៣-២០២៤ ខាងមុខនេះ លើជំនាញទាំង០៦ ក្នុងនោះរួមមាន៖ ១. ជំនាញសំណង់ផ្លូវថ្នល់ ផ្លូវល្បឿនលឿន ស្ពាន ផ្លូវដែក និងកំពង់ផែ ២. ជំនាញប្រព័ន្ធចម្រោះទឹកកខ្វក់ ៣. ជំនាញសេដ្ឋកិច្ច និងគ្រប់គ្រងដឹកជញ្ជូនផ្លូវគោក ៤. ជំនាញគ្រប់គ្រងភស្តុភារកម្ម និងខ្សែច្រវ៉ាក់ផ្គត់ផ្គង់ ៥. ជំនាញបើកបរនាវា ៦. ជំនាញម៉ាស៊ីននាវា៕