ខេត្តកោះកុងទទួលបាននូវសមិទ្ធផលថ្មីមួយទៀត គឺកំពង់ផែកោះកុង ផត មេនេចម៉ិន (Koh Kong Port Management Co Ltd) ដែលបានលេចចេញជារូបរាងឡើងនាពេលនេះ ក្នុងចំណោមសមិទ្ធផលជាច្រើនទៀត ដែលរាជដ្ឋាភិបាលកម្ពុជា និងក្រុមហ៊ុនវិនិយោគ បានកសាងឡើងសម្រាប់សម្រួលដល់វិស័យដឹកជញ្ជូន។ លោកស្រី អ៊ី នារីនេត អភិបាលរង នៃគណៈអភិបាលខេត្តកោះកុង បានអញ្ជើញជាអធិបតី ក្នុងពិធីកាត់ខ្សែបូដាក់ឱ្យដំណើរការសាកល្បង និងទទួលស្វាគមន៍នាវាទីមួយ ចូលមកកាន់កំពង់ែផ កោះកុង ផត មនចម៉ិន ឯ.ក ស្ថិតនៅភូមិកោះស្តេច ឃុំកោះស្តេច ស្រុកគិរីសាគរ ខេត្តកោះកុង។ កំពង់ផែថ្មីនេះ នឹងដើរតួនាទីយ៉ាងសំខាន់ដើម្បីសម្រួលដល់ការដឹកជញ្ជូនទំនិញ ឬផលកសិកម្ម របស់បងប្អូនប្រជាពលរដ្ឋ ដែលបាននិងកំពុងតែប្រកបរបរកសិកម្មនៅមូលដ្ឋាន សំដៅលើក កម្ពស់ជីវភាពរបស់ប្រជាកសិករនៅក្នុងខេត្តកោះកុង ឱ្យកាន់តែមានភាពល្អប្រសើរ និងទទួលបាន ជីវភាពធូរធារជាងមុន ព្រោះថា ផ្លូវ ស្ពាន និងកំពង់ផែ គឺជាសរសៃឈាម សេដ្ឋកិច្ចដ៏សំខាន់ចាំបាច់បំផុត មិនអាចខ្វះបានក្នុងការអភិវឌ្ឍសេដ្ឋកិច្ចជាតិ និងការលើកស្ទួយជីវភាពរបស់ប្រជាពលរដ្ឋ។ កំពង់ផែដឹកទំនិញខ្នាត ២ម៉ឺនតោន និងកំពង់ផែចតនាវាកម្សាន្ត កំពង់ផែដឹកទំនិញមានមុខងារ អាចចតនាវាដឹកភ្ញៀវទេសចរបាន។ កំពង់ផែកោះកុងផតមេនេចម៉ិន ឯ.ក នេះ នឹងមានការតភ្ជាប់ជាមួយផ្លូវជាតិលេខ៤៨ ដែលជាសរសៃឈាមសេដ្ឋកិច្ចដ៏សំខាន់ចាំបាច់ភ្ជាប់ពីក្រុងខេមរភូមិន្ទទៅកាន់ផ្លូវជាតិលេខ៤។ ក្រៅពីកំពង់ផែ ខេត្តកោះកុងមានអាកាសយានដ្ឋានអន្តរជាតិតារាសាគរដំណាក់កាលទី១ខ្នាត4E សាងសង់លើផ្ទៃដីសរុប ២១៨ ហិកតា ហើយមានការសាងសង់នូវ អគារស្ថានីយ៍អ្នកដំណើរ និងស្ថានីយ៍គ្រប់គ្រង ចរាចរណ៍ផ្លូវអាកាស មានក្រឡាផ្ទៃសំណង់ ៥៧០០ម៉ែត្រការ៉េ ផ្លូវរត់ប្រវែង ៣២០០ម៉ែត្រអាចឲ្យយន្តហោះដឹកអ្នកដំណើរផ្លូវ ឆ្ងាយខ្នាតធំ ដូចជា Boeing 777 Airbus A340 ជាដើម អាចចុះចតបាន។ សាងសង់អាងស្តុកទឹកពាមកាយ ដែលអាចស្តុកទឹក២០លានម៉ែតគូបមួយទៀត បន្ថែមពីលើ អាងស្តុកទឹកព្រែកស្មាច់ ដែលអាចស្តុកទឹកបាន ៥លានម៉ែត្រគូប ដែលមានស្រាប់ ដូច្នេះទំហំស្តុកទឹក ក្នុងតំបន់កើនឡើងដល់ ២៥លានម៉ែត្រគូប។ ហើយបច្ចុប្បន្ននេះ អាងស្តុកទឹកត្រូវបានសាងសង់រួចជា ស្ថាពរ ហើយឈានដល់តម្រូវការ ស្តុកទឹក និងការសាងសង់នូវសណ្ឋាគារ ទីលានវាយកូនហ្គោល សម្រាប់បម្រើដល់វិស័យទេសចរណ៍ និងមានគម្រោងជាច្រើនផ្សេងៗទៀតផងដែរ។