[Swift news daily] - សម្តេចតេជោ ហ៊ុន សែន នឹងអញ្ជើញចូលរួមពិធីបើកការដ្ឋានសាងសង់ស្ពានអាកាស និងផ្លូវក្រោមដី នៅរង្វង់មូលចោមចៅ នាព្រឹកថ្ងៃទី២៩មិថុនា
2018-06-28
ទៅកាន់ទំព័រចុះផ្សាយក្នុង Swift news daily
(ភ្នំពេញ)៖ នៅព្រឹកថ្ងៃសុក្រ ទី២៩ ខែមិថុនា ឆ្នាំ២០១៨ សម្តេចតេជោ នាយករដ្ឋមន្ត្រី ហ៊ុន សែន នឹងអញ្ជើញចូលរួមក្នុងពិធីបើកការដ្ឋានសាងសង់ស្ពានអាកាស និងផ្លូវក្រោមដី នៅរង្វង់មូលចោមចៅ ក្នុងរាជធានីភ្នំពេញ។ ស្ពានអាកាសចោមចៅ ជាស្ពានអាកាសទី៦ នៅក្នុងរាជធានីភ្នំពេញ។
នារសៀលថ្ងៃទី២៨ ខែមិថុនា ឆ្នាំ២០១៨ លោក ឃួង ស្រេង អភិបាលរាជធានីភ្នំពេញ នឹងដឹកនាំមន្ត្រីគ្រប់ជាន់ថ្នាក់ រៀបចំពិធីក្រុងពាលី មុនពិធីបើកការដ្ឋានស្ពានអាកាស និងផ្លូវក្រោមដី ចោមចៅ។
ស្ពានអាកាស និងផ្លូវក្រោមដី ចោមចៅ នឹងត្រូវសាងសង់ឡើង ដើម្បីដោះស្រាយបញ្ហាកកស្ទះចរាចរណ៍ នៅរង្វង់មូលចោមចៅ ដែលជាចំណុចប្រសព្វរវាងផ្លូវចោមចៅ ផ្លូវជាតិលេខ៣ ផ្លូវជាតិលេខ៤ និងមហាវិថីសហព័ន្ធរុស្ស៊ី។
អាជ្ញាធររាជធានីភ្នំពេញ មិនទាន់បញ្ជាក់ពីទំហំទឹកប្រាក់ សម្រាប់សាងសង់ស្ពានអាកាស និងផ្លូវក្រោមដីនៅចោមចៅនេះទេ។ តែទឹកប្រាក់សាងសង់ស្ពានអាកាសទី៦នេះ គឺសាលារាជធានីភ្នំពេញ ជាអ្នកធានារ៉ាប់រង។
តាមគម្រោង ស្ពានអាកាស និងផ្លូវក្រោមដីនៅរង្វង់មូលចោមចៅ នឹងត្រូវចំណាយពេលសាងសង់ប្រមាណជា ៣០ ខែ។
សូមបញ្ជាក់ថា គិតត្រឹមខែមិថុនា ឆ្នាំ២០១៨ នៅរាជធានីភ្នំពេញ មានស្ពានអាកាស ចំនួន ៥ រួមមាន៖
១-ស្ពានអាកាសក្បាលថ្នល់ នៅអតីតរង្វង់មូលក្បាលថ្នល់៖
ស្ពានអាកាសក្បាលថ្នល់ ជាស្ពានអាកាសដំបូងគេ នៅភ្នំពេញ និងនៅប្រទេសកម្ពុជា ត្រូវបានបើកសម្ពោធដាក់ឲ្យប្រើប្រាស់ កាលពីព្រឹកថ្ងៃទី២៤ ខែមិថុនា ឆ្នាំ២០១០ មានបណ្ដោយ ៣០៨ ម៉ែត្រ ទទឹង ១៤,២ ម៉ែត្រ ចំណាយថវិកាអស់ ៦.៤៤០.២១៦ ដុល្លារសហរដ្ឋអាមេរិក។
២-ស្ពានអាកាស ៧មករា ស្ថិតនៅស្តុបពេទ្យលោកសង្ឃ ៖
ស្ពានអាកាសទី២នេះ មានបណ្តោយប្រវែង ៣៤៥ ម៉ែត្រ ទទឹង ១៥,២០ ម៉ែត្រ លើមហាវិថីសហព័ន្ធរុស្ស៊ី និងមានខ្នែងជាដៃស្ពាន ទៅមហាវិថីកម្ពុជាក្រោម មានប្រវែង ១៦០ ម៉ែត្រ និងទទឹង ៦,៥ ម៉ែត្រ។ ចំណាយថវិកា ជាង ៨,៧ លានដុល្លារ ជាថវិកាជួលដី នៅតំបន់កោះពេជ្រ បានសម្ពោធដាក់ឲ្យប្រើប្រាស់ នៅថ្ងៃទី៦ ខែមករា ឆ្នាំ២០១២។
៣-ស្ពានអាកាសស្ទឹងមានជ័យ៖
ស្ពានអាកាសស្ទឹងមានជ័យ ត្រូវបានបើកសម្ពោធដាក់ឲ្យប្រើប្រាស់ កាលពីថ្ងៃទី៣១ ខែកក្កដា ឆ្នាំ២០១៤ មានប្រវែងសរុប ១.១៣៤ ម៉ែត្រ និងផ្លូវវាងក្រោមដី ប្រវែង ៤៨៧ ម៉ែត្រ ទទឹងជាង ៦ ម៉ែត្រ។ ស្ពានអាកាសស្ទឹងមានជ័យ ជាស្ពានអាកាសទី៣ នៅភ្នំពេញ ចំណាយ ១៩ លានដុល្លារសហរដ្ឋអាមេរិក ដោយប្រើប្រាស់កញ្ចប់ថវិកាដែលបានមកពីការវិនិយោគតំបន់អភិវឌ្ឍន៍ជ្រោយចង្វាររបស់ក្រុមហ៊ុន OCIC។
៤-ស្ពានអាកាសទី៤ តិចណូ ឬ ស្ពានអាកាស ៥មករា៖
ជាស្ពានអាកាស ស្របនឹងមហាវិថីសហព័ន្ធរុស្ស៊ី ក្នុងខណ្ឌទួលគោក រាជធានីភ្នំពេញ ដោយចំណាយថវិកាជាង ១៤,៥ លានដុល្លារ ដែលបានមកពីគម្រោងវិនិយោគកោះពេជ្ររបស់ក្រុមហ៊ុន OCIC។ ស្ពានអាកាសតិចណូនេះ មានទាំងផ្លូវក្រោមដី នៅប្រសព្វមហាវិថី គីម អ៊ីលស៊ុង និងមហាវិធីម៉ៅសេទុង និងបានសម្ពោធដាក់ឲ្យដំណើរការ កាលពីថ្ងៃទី៥ ខែមករា ឆ្នាំ២០១៦។
៥-ស្ពានអាកាស ស្តុបផ្សារដីហុយ៖
ស្ពានអាកាសផ្សារដីហុយ មានបណ្ដោយ ៦១០ម៉ែត្រ ទទឹង ១៦,៥ ម៉ែត្រ មាន ០៤គន្លង (២គន្លងទៅ ២គន្លងមក) ផ្លូវក្រោមកាត់ស្ពាន ២៣ម៉ែត្រ និងកម្ពស់ ៥,៥ម៉ែត្រ។ ស្ពាននេះ ត្រូវបានសាងសង់ដោយក្រុមហ៊ុនសំណង់ សៀងហៃ គ្រុប និងត្រួតពិនិត្យបច្ចេកទេសសាងសង់ដោយក្រុមហ៊ុនទីប្រឹក្សាសំណង់ក្វាងចូវវ៉ានអាន ចំណាយថវិកាអស់ប្រមាណ ១៦,៧៨ លានដុល្លារ។ ស្ពានអាកាស ផ្សារដីហុយ គ្រោងសម្ពោធដាក់ឲ្យប្រើប្រាស់ជាផ្លូវការ នៅថ្ងៃទី០២ ខែកក្កដា ឆ្នាំ២០១៨ បន្ទាប់ពីបើកឲ្យដំណើរការបណ្តោះអាសន្ន ចាប់តាំងពីថ្ងៃទី១២ ខែមេសា ឆ្នាំ២០១៨៕
