ស្ទឹងត្រែង៖រាជរដ្ឋាភិបាលបានផ្តល់ស្ពានបេតុង សាងសង់ជាបណ្តាញតភ្ជាប់ផ្លូវទៅទីរួមស្រុកសេសាន និងតំបន់ទំនប់វារីអគ្គិសនីសេសានក្រោមពី ដើម្បីបម្រើចរន្តការងាររបស់ប្រជាពលរដ្ឋពីភូមិឃុំមួយទៅឃុំមួយទៀត និងបានជំរុញកំណើនសេដ្ឋកិច្ចនៅខេត្តភាគឦសាន្តនេះ ។ ក្នុងឱកាសចុះពិនិត្យសកម្មភាពសាងសង់ស្ពានបេតុងឆ្លងកាត់អូរសាមឃួយ និងស្ពាននៅឃុំភ្លុក ស្រុកសេសានខេត្តស្ទឹងត្រែង ថ្ងៃទី០៥កញ្ជា២០២៣ ឯកឧត្តមស្វាយសំអ៊ាងអភិបាលខេត្តមានប្រសាសន៍ថា៖ នេះយុទ្ធសាស្ត្ររបស់រាជរដ្ឋាភិបាល បង្កើនការអភិវឌ្ឍហេដ្ឋារចនាសម្ព័ន្ធនៅខេត្តភាគឦសាន្តនៃប្រទេសកម្ពុជា អភិវឌ្ឍ ស្ពាន ថ្នល់ ចេញពីទីក្នុងស្ទឹងត្រែងទៅទីរួមស្រុកសេសាន និងទៅតាមតំបន់ផ្សេងៗទៀត ប្រយោជន៍បម្រើសេចក្តីត្រូវការរបស់ប្រជាជនឱ្យទៅដល់ទីជនបទ ។ ឯកឧត្តមមានប្រសាសន៍បន្តថា៖ស្ពានចាស់ចំនួន៨ត្រូវបានផ្លាស់ប្តូរជាស្ពានបេតុងថ្មីសាងសង់តាមបណ្តោយផ្លូវជួរមាត់ទន្លេសេសាន ហើយក្រុមបច្ចេកទេសនៃមន្ទីរសាធារណៈការនិងដឹកជញ្ជូនខេត្ត ពន្លឿនការសាងសង់ឱ្យហើយ ចប់សព្វគ្រប់នៅចុងឆ្នាំ២០២៣នេះដើម្បីធ្វើឱ្យសម្រេចទៅតាមផែនការដែលបានគ្រោងទុក ប្រជាពលរដ្ឋស្រួលធ្វើចរាចរណ៍ទៅមក ។ លោកឃីចាន់ មេឃុំភ្លុកតំណាងឱ្យប្រជាពលរដ្ឋនៅស្រុកសេសានបានគាំទ្រ យុទ្ធសាស្ត្ររបស់រាជរដ្ឋាភិបាល ក៏ដូចជាដល់ការយកចិត្តទុកដាក់ពីសំណាក់ឯកឧត្តមអភិបាលខេត្ត ព្រោះសមិទ្ធផលដែលសម្រេចបាននេះ បង្ហាញឱ្យឃើញនៅការអភិវឌ្ឍទ្វេឡើង ធ្វើឱ្យប្រជាពលរដ្ឋយើងពេញចិត្ត។ សំឡេង៖ " សប្បាយចិត្តមែនទែនបានការយកចិត្តទុកដាក់ពីឯកឧត្តមអភិបាលខេត្តបានជួយទំនុកបំរុង ព្រោះតាំងពីដូនតាយើងមកមិនដែលបានស្ពានល្អប៉ុណ្ណឹងទេ ឥឡូវត្រេកអរណាស់ប្រជាពលរដ្ឋទូទាំងឃុំគាត់សប្បាយចិត្ត អបអរសាទរទទួលបានសមិទ្ធផលដ៏ធំធេង ដែលមិនធ្លាប់មានពីដូនតាមក ហើយក្នុងនាមអាជ្ញាធរគឺជំរុញចលនាអប់រំប្រជាពលរដ្ឋជួយការពារថែរក្សានិងឱ្យបានគង់វង្សស្ថិតស្ថេរ"។ លោកគង់ សុធា អនុប្រធានមន្ទីរសាធារណៈការនិងដឹកជញ្ជូនខេត្តបានបញ្ជាក់ថា៖ក្រុមការងារបច្ចេកទេសបានពន្លឿនការសាងសង់ស្ពានបេតុងនេះឱ្យរួចរាល់ នៅខែវិច្ឆិកាចុងឆ្នាំនេះដើម្បីបញ្ចប់គម្រោងផែនការ អភិវឌ្ឍផ្លូវស្ពាន មកកាន់ទីរួមស្រុកសេសាន។ លោកថា៖ ចាប់តាំងពីឆ្នាំ២០២០មក តំបន់នេះមានផ្លូវកៅស៊ូ ស្ពានបេតុង ស្រួលធ្វើចរាចរណ៍ ជាអំណោយរបស់រាជរដ្ឋាភិបាល ធ្វើឱ្យមូលដ្ឋានមានសោភ័ណភាពប្រជាពលរដ្ឋគាត់សប្បាយចិត្ត បានដឹកកសិផលចេញចូលទៅមកស្រួល ហើយភ្ញៀវទេសចរក៏មកលេងច្រើន ។ សូមបញ្ជាក់ថា៖ស្ពានបេតុងឆ្លងកាត់អូរសាមឃួយកំពុងសាងសង់នេះ មានប្រវែង៦០ម៉ែត្រ ទទឹង៨ម៉ែត្របានផ្តើមសាងសង់ ចាប់ពី ខែមិនាឆ្នាំ២០២៣មក និងគ្រោងបញ្ចប់នៅចុងខែវិច្ឆិកា ដែលស្ពានចុងក្រោយនៅតាមបណ្តាយផ្លូវកៅស៊ូ តាមជួរមាត់ទន្លេសេសាននេះ៕