សម្រាប់បងប្អូនដែលមានបំណងចង់បើកម៉ូតូធំ លើផ្លូវល្បឿនលឿន អាចធ្វើការស្នើសុំលតាបត្រ ឬលិខិតអនុញ្ញាឲ្យធ្វើដំណើរបានដោយ ឥតគិតថ្លៃ ដោយគ្រាន់តែភ្ជាប់ជាមួយនឹងឯកសារទាមទារមួយចំនួន។ សម្រាប់ពលរដ្ឋខ្មែរ គឺទាមទារឲ្យភ្ជាប់មកជាមួយ បណ្ណសម្គាល់យានជំនិះ និងអត្តសញ្ញាណបណ្ណម្ចាស់កម្មសិទ្ធ ហើយសម្រាប់ជនបរទេស គឺត្រូវភ្ជាប់មកជាមួយ បណ្ណសម្គាល់យានជំនិះ លិខិតឆ្លងដែន និងទិដ្ឋាការមានសុពលភាព និងលិខិតបញ្ចាក់ទីលំនៅចេញដោយមេឃុំ/ចៅសង្កាត់។ ក្នុងនោះដែរ ករណីអាសយដ្ឋានអចិន្ដ្រៃយ៍ ខុសពីអាសយដ្ឋានក្នុងអត្តសញ្ញាណបណ្ណ ត្រូវភ្ជាប់មកជាមួយ សៀវភៅគ្រួសារ ឬសៀវភៅស្នាក់នៅ។ បងប្អូនអាចស្នើសុំលតាបត្រនេះ នៅទីតាំងដូចជា មណ្ឌលផ្ដល់សេវាសាធារណៈ ទីស្តីការក្រសួងសាធារណការ និងដឹកជញ្ជូន ផ្លូវលេខ ៥៩៨ (ផ្លូវ ឯកឧត្ដម ជា សុផារ៉ា) សង្កាត់ច្រាំងចំរេះ២ ខណ្ឌប្ញស្សីកែវ រាជធានីភ្នំពេញ និង មណ្ឌលផ្ដល់សេវាសាធារណៈ ផ្សារទំនើប អ៊ីអនម៉លមានជ័យ (AEON3) ជាន់ទី១ ស្ថិតតាមបណ្តោយមហាវិថី សម្តេចតេជោ (ផ្លូវ៦០ម៉ែត្រ) ក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។ ក្នុងនោះដែរ ការស្នើសុំលតាបត្រនេះ គឺប្រព្រឹត្តទៅដោយឥតគិតថ្លៃ។ សូមបញ្ជាក់ថា មានតែទោចក្រយានយន្ដដែលមានទំហំស៊ីឡាំង ចាប់ពី ៥០០cc ឬ កម្លាំងម៉ូទ័រ ២៧ kW ឡើងទៅ តែប៉ុណ្ណោះ ដែលអនុញ្ញាតឲ្យចរាចរណ៍លើផ្លូវល្បឿនលឿន ដោយទោចក្រយានយន្ដធម្មតា ដែលមានទំហំស៊ីឡាំងទាបជាងនេះ គឺមិនអនុញ្ញាតឲ្យបើកបរលើផ្លូវល្បឿនលឿននោះទេ។ ហើយសម្រាប់ល្បឿនអនុញ្ញាតឲ្យបើកបរគឹពី ៦០គម/ម៉ (អប្បបរមា) ទៅ ១០០គម/ម៉ (អតិបរមា) និងទុកគម្លាតចន្លោះសុវត្ថិភាពប្រមាណ ៦០ ម៉ែត្រ ពីយានយន្ដខាងមុខក្នុងពេលបើកបរ។ បន្ថែមពីនេះ មុនពេលបើកបរលើផ្លូវល្បឿនលឿន សូមពិនិត្យមើលលក្ខណៈបច្ចេកទេសយានជំនិះ ឲ្យបានគ្រប់ជ្រុងជ្រោយ និងយល់ដឹងពីសេចក្ដីណែនាំពីការបើកបរលើផ្លូវល្បឿនលឿន ឲ្យបានច្បាស់លាស់ដើម្បីសុវត្ថិភាព ក៏ដូចជា ជៀសវាងការមានបញ្ហាតាមផ្លូវផងដែរ។