កំពង់ឆ្នាំង: រដ្ឋបាលស្រុកជលគីរីកំពុងធ្វើផ្លូវបេតុងបីខ្សែក្នុងឃុំព្រៃគ្រី ដែលមានប្រវែង៤៦៩ម៉ែត្របន្ទាប់ពីបានសម្ពោធដាក់ឱ្យប្រើប្រាស់ផ្លូវមួយខ្សែប្រវែង៥៥៥ម៉ែត្រកន្លងទៅ។ លោក ដូវ គឹមស៉ិន អភិបាលស្រុកជលគីរីបានឱ្យដឹងនៅល្ងាចថ្ងៃទី២០ខែសីហាថាស្រុកជលគីរីក្នុងចំណោមស្រុក ក្រុងទាំងប្រាំបីក្នុងខេត្តដែលនៅឆ្ងាយជាងគេខណ្ឌដោយទន្លេនៅរដូវវស្សាធ្វើដំណើរដោយកាណូត ឬ តាមផ្លូវគោកដោយ ត្រូវធ្វើដំណើរទៅតាមស្រុកបាធាយខេត្តកំពង់ចាមដែលមានព្រំប្រទល់ជាប់គ្នា។នៅរដូវវស្សាប្រកបរបរនេសាទជាលក្ខណ:គ្រួសារ។ នៅរដូវប្រាំងវិញប្រជាជនធ្វើស្រូវរប្រាំង។ លោកអភិបាលស្រុកជលគីរីបានឱ្យដឹងទៀតថា ផ្លូវបេតុងបីខ្សែនៅក្នុងឃុំព្រៃគ្រីដែលត្រូវស្ថាបនា មានប្រវែង៤៦៩ម៉ែត្រដែលបានតចេញពីផ្កូវចាស់៥០ម៉ែត្រនិងខ្សែទីពីរនៅក្នុងភូមិតាចាន់១១០ម៉ែត្រនិងខ្សែទី៣ភូមិព្រៃគ្រីជើង៣០៥ម៉ែត្រ។ផ្លូវមានទទឹង៥ម៉ែត្រ,កម្រាស់០.១៥ម៉ែត្រជាថវិកាមូលនិធិឃុំព្រៃគ្រីឆ្នាំ២០២៣។ ការកសាងផ្លូវនេះចាប់ផ្តើមនៅថ្ងៃទី៣ខែសីហាដោយគ្រោងនិងបញ្ចប់ការសាងសង់ថ្ងៃទី៣១សីហាខាងមុខនេះ។ចំពោះគម្រោងរបស់ស្រុកក្នុងឆ្នាំ២០២៣នេះបានអនុវត្តន៍រួចរាល់ហើយ ។ ចំពោះផែនការឆ្នាំ២០២៤ស្រុកគ្រោងនឹងសាងសង់ផ្លូវបេតុងប្រវែងមួយពាន់ម៉ែត្រនិងមូលនិធិឃុំព្រៃគ្រីប្រវែង៥០០ម៉ែត្រនៅខាងមុខសាលាស្រុក។ លោកអភិបាលស្រុកជលគីរីក្នុងពេលចុះពិនិត្យការដ្ឋានបានណែនាំដល់ក្រុមហ៊ុនធ្វើយ៉ាងណាធ្វើផ្លូវនេះឪ្យធានាបាននូវគុណភាពផ្លូវតាមកិច្ចសន្យា៕