ក្នុងរយៈពេល៥ឆ្នាំចុងក្រោយនេះ ក្រសួងសាធារណៈការ និងដឹកជញ្ជូន បានសម្រេចនូវសមិទ្ធផលជាច្រើនជូនប្រជាពលរដ្ឋ តាមរយៈការ​សាងសង់​ហេដ្ឋារចនាសម្ព័ន្ធជាច្រើននៅក្នុងផ្ទៃប្រទេស។ សំណង់អគារ វិទ្យាស្ថានសិក្សាបច្ចេកទេស ផ្លូវថ្នល់ ស្ពាន បានជួយសម្រួលដល់ការ​ដឹក​ជញ្ជូនកាន់តែមានភាពងាយស្រួល និងលឿនជាងមុន កំពុងរីក​ស្គុះស្គាយជាបន្តបន្ទាប់។ ប្រែក្លាយពីប្រទេសដែលមិនមានផ្លូវធ្វើដំណើរសមរម្យទៅជាប្រទេសដែលមានផ្លូវល្បឿនលឿន ដែលរយៈពេលនៃការធ្វើដំណើរត្រូវ​បានកាត់​បន្ថយស្ទើតែពាក់កណ្ដាល។ ការធ្វើពាណិជ្ជកម្មក្នុងប្រទេស និងជាមួយប្រទេសជិតខាងក៏មានភាពល្អប្រសើរជាងមុន ដោយសារការដឹកជញ្ជូន​មានភាពងាយស្រួលជាមុន។ បើទោះបីជាយ៉ាងនេះក្ដី គោលដៅក្នុងការអភិវឌ្ឍហេដ្ឋារចនាសម្ព័ន្ធក៏មិនទាន់ឈប់ត្រឹមនេះដែរ ដោយគោលដៅ​បន្ទាប់គឺត្រូវធ្វើឱ្យមានគុណភាព និងអាចឱ្យប្រជាជនប្រើប្រាស់បានយូរអង្វែង។ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូនបានថ្លែងយ៉ាងដូច្នេះថា ៖ “ទិសដៅបន្តគឺយើងនៅតែបន្តកសាងផ្លូវ ស្ពាន ហេដ្ឋារចនាសម្ព័ន្ធទាំងអស់។ ឧទាហរណ៍ ផ្លូវ​កំពង់ធំ កំពង់ឆ្នាំង ផ្លូវលេខ៥០C ខណៈដែលសម្ដេចបានប្រកាសហើយថា ឆ្នាំ២០២៤ យើងសាងសង់ផ្លូវតភ្ជាប់ពីកំពង់ឆ្នាំង ទៅកំពង់ធំ ដែលមានស្ពាន៤ប្រវែងគីឡូម៉ែត្រ។” ឯកឧត្តមបន្តថា ផ្លូវតភ្ជាប់ពីបាត់ដំបងទៅសៀមរាប ក៏ក្រសួងត្រៀមនឹងធ្វើដែរ ដោយផ្អែកលើ​មូលហេតុថា សព្វថ្ងៃបើចង់ធ្វើដំណើរពីសៀមរាប ទៅបាត់ដំបង គឺត្រូវធ្វើដំណើរឆ្លងកាត់​ក្រុងសេរីសោភ័ណ្ឌ (ខេត្តបន្ទាយមានជ័យ) ដែលមានចម្ងាយរហូតទៅដល់ ១៨០គីឡូឯណោះ។ ប៉ុន្តែប្រសិនបើមានផ្លូវធ្វើដំណើរត្រង់ពីសៀមរាបទៅបាត់ដំបងតែម្ដង ហើយអ្នកដំណើរអាចចំណេញ​បានជិត​១០០គីឡូម៉ែត្រឯណោះ។ ឯកឧត្តមបន្តគូសបញ្ជាក់ផងដែរថា ៖ “ផ្លូវមួយចំនួនទៀតដែលយើងត្រូវលើកកម្រិតទៅជា AC ផ្លូវមួយចំនួនដែលមាន២គន្លង យើងលើក​ឱ្យ​ទៅ​ជា ៤គន្លង ឡានក៏នឹងកើនឡើង អីចឹងយើងគិត​គូរឱ្យហើយ…យើងត្រូវរៀបចំប្រព័ន្ធដឹកជញ្ជូនសាធារណៈនៅរាជធានីភ្នំពេញ ដើម្បីការពារ​ទុក​​ឱ្យហើយ ព្រោះ ៥ ឆ្នាំ ១០ឆ្នាំទៅមុខទៀត នឹងមានឡាន ម៉ូតូច្រើន ហើយវានឹងស្ទះ។” ក្រៅតែពីហេដ្ឋារចនាសម្ព័ន្ធផ្លូវគោកនេះទៅ ឯកឧត្តមក៏បានរំលេចអំពីគម្រោងខាងផ្លូវទឹកផងដែរ។ ជាក់ស្ដែង ផ្នែកកំពង់ផែក៏កំពុងត្រូវ​បាន​រៀបចំ​ដើម្បីឱ្យការដឹកជញ្ជូនតាមផ្លូវទឹកមានភាពទូលំទូលាយជាងមុន ជាពិសេសកែប្រែកំពង់ផែខេត្តព្រះសីហនុទៅជាកំពង់ផែទឹកជ្រៅដែល​អាច​មានលទ្ធភាពទទួលយកនាវាធំៗរបស់អន្តរជាតិ។ ម្យ៉ាងទៀត ក្រសួងក៏គ្រោងនឹងរៀបចំប្រព័ន្ធទឹកកខ្វក់ថែមទៀត ព្រោះបើមិនដូច្នេះទេ ទន្លេ បឹងបួរ និងសមុទ្រ ច្បាស់ជាមិនអាចប្រើការបាន ទេសចរងូតក៏មិនអាចងូតទឹកកើត ដែលវាប៉ះពាល់ដល់វិស័យសេវាកម្មបន្តទៀត។ ជាចំណុចដែលសំខាន់ផងដែរ គឺការបណ្ដុះបណ្ដាលធនធានមនុស្សផ្នែកនេះឱ្យបានច្រើន ដើម្បីកសាងសមត្ថិភាពមនុស្សជំនាន់ក្រោយ ដើម្បីឱ្យពួកគេមានស្នាដៃក្នុងការសាងសង់ហេដ្ឋារចនាសម្ព័ន្ធរបស់ខ្លួនដោយមិនពឹងផ្អែកទាំងស្រុងលើធនធានមនុស្សពីក្រៅប្រទេស។ ឯកឧត្តម ស៊ុន ចាន់ថុល បានបញ្ជាក់យ៉ាងដូច្នេះថា ៖ “អីចឹងយើងត្រូវរៀបចំឱ្យត្រឹមត្រូវ អនាគតត្រូវតែធ្វើឱ្យបាននូវផ្នែក បណ្ដុះបណ្ដាល​ធនធាន​មនុស្សឱ្យបានច្រើន ធ្វើផ្លូវឱ្យមានគុណភាព យើងត្រូវធ្វើផ្លូវឱ្យបានរឹងមុំា ឱ្យបានយូរអង្វែងជូនប្រជាពលរដ្ឋយើង ហើយចង់ឱ្យថាខ្មែរយើងអាចធ្វើបានគ្រប់បែបយ៉ាង​ដោយខ្លួនឯង និងមិនពឹងផ្អែកលើគេពេកទេ ត្រូវមានសមត្ថភាពដោយខ្លួនឯង៕”