ដំណើរទស្សនកិច្ចចុះពិនិត្យវឌ្ឍនការងារនៃគម្រោងធ្វើឱ្យប្រសើរឡើងច្រកទ្វារព្រំដែនអន្តរជាតិបាវិត ខេត្តស្វាយរៀង ស្វាយរៀង៖ នាព្រឹកថ្ងៃព្រហស្បតិ៍ ១២កើត ខែបឋមាសាឍ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី២៩ ខែមិថុនា ឆ្នាំ២០២៣ ឯកឧត្ដម ប៉ែន បូរាណ អនុរដ្ឋលេខាធិការក្រសួងសាធារណការ និងដឹកជញ្ជូន និងក្រុមការងារអគ្គនាយកដ្ឋានភស្តុភារកម្ម បានអញ្ជើញអមដំណើរឯកឧត្ដម Ueno Atsushi ឯកអគ្គរាជទូតជប៉ុនវិសាមញ្ញនិងពេញសមត្ថភាពជប៉ុនប្រចាំព្រះរាជាណាចក្រកម្ពុជា ក្នុងដំណើរ ទស្សនកិច្ចនៅច្រកព្រំដែនអន្តរជាតិបាវិត ខេត្តស្វាយរៀង ដោយមានការអញ្ជើញចូលរួមពីតំណាងភាគី ពាក់ព័ន្ធរួមមាន៖ រដ្ឋបាលខេត្តស្វាយរៀង រដ្ឋបាលក្រុងបាវិត មន្ទីរសាធារណការ និងដឹកជញ្ជូនខេត្តស្វាយរៀង ស្នាក់ការត្រួតពិនិត្យច្រកទ្វារព្រំដែនអន្តរជាតិបាវិត នគរបាលអន្តោប្រវេសន៍ច្រកទ្វារព្រំដែនអន្តរជាតិ បាវិត និងសភាពាណិជ្ជកម្មខេត្តស្វាយរៀងផងដែរ។ ថ្លែងក្នុងដំណើរចុះពិនិត្យនេះ ឯកឧត្ដមអនុរដ្ឋលេខាធិការ បានគូសបញ្ជាក់ពីសារៈសំខាន់នៃការរក្ស ចំណងមិត្តភាពរវាងកម្ពុជា និងជប៉ុន ក្នុងការជួយជ្រោមជ្រែងដល់កម្ពុជាលើគ្រប់វិស័យទាំងអស់ និងបានថ្លែងអំណរគុណយ៉ាងជ្រាលជ្រៅចំពោះមិត្តជប៉ុនដែលតែងតែផ្តល់ការគាំទ្រដល់កម្ពុជារហូតមក និងបានស្នើសុំឱ្យមិត្តជប៉ុនបន្តចូលរួមជាចំណែកក្នុងការអភិវឌ្ឍប្រទេសកម្ពុជាបន្តទៀត។ ជាមួយគ្នានោះដែរ ឯកឧត្ដមឯកអគ្គរាជទូត បានវាយតម្លៃខ្ពស់ចំពោះការអភិវឌ្ឍ និងសក្ដានុពលជាច្រើន ទៀតនៅកម្ពុជា ជាពិសេសនៅតាមបណ្ដាច្រកព្រំដែននានា ដែលជាច្រកទ្វារអាចឱ្យកម្ពុជាបន្តកិច្ចសហប្រតិបត្តិការជាមួយប្រទេសជិតខាងតាមរយៈការនាំទំនិញចេញ-ចូល និងបានសង្កត់ធ្ងន់ផងដែរថា កម្ពុជាត្រូវបន្តសហការជាមួយជប៉ុនបន្ថែមទៀតដើម្បីពង្រីក និងធ្វើទំនើបកម្មប្រព័ន្ធភស្តុភារកម្មនៅកម្ពុជា។ បន្ថែមពីលើនេះ លោកស្រីអគ្គនាយករងភស្តុភារកម្ម សន សុភាវត្តី បានជម្រាបជូនគណៈប្រតិភូផងដែរតាមរយៈបទបង្ហាញសង្ខេបអំពីបច្ចុប្បន្នភាពនៃការធ្វើឱ្យប្រសើរឡើងច្រកព្រំដែនអន្តរជាតិបាវិត ការអភិវឌ្ឍហេដ្ឋារចនាសម្ព័ន្ធនានា ការធ្វើឱ្យប្រសើរឡើងនូវប្រព័ន្ធភស្តុភារកម្មកម្ពុជា ជំហានទី២ និងលទ្ធផលដំណើរទស្សនកិច្ចសិក្សារបស់ប្រតិភូកម្ពុជាទៅកាន់ប្រទេសវៀតណាម ដើម្បីស្វែងយល់ បន្ថែម និងបានបង្ហាញដោយផ្ទាល់ផងដែរអំពីការធ្វើឱ្យប្រសើរឡើងហេដ្ឋារចនាសម្ព័ន្ធ ដោយពង្រីកពី២គន្លងទៅ៧គន្លងនៅតំបន់ទ្រនាប់ (Buffer Zone)ប្រវែង១០០ម៉ែត្រ។ ជាទីបញ្ចប់ គណៈប្រតិភូបានអញ្ជើញទស្សនាគ្រឿងបរិក្ខាផ្សេងៗ និងវឌ្ឍនភាពការងារសម្រេចបាននៅច្រកព្រំដែនអន្តរជាតិបាវិត។ គួរកត់សម្គាល់ថា៖ ច្រកទ្វារព្រំដែនអន្តរជាតិបាវិត ត្រូវបានបន្តធ្វើឱ្យប្រសើរឡើងជាបន្តបន្ទាប់ដូចជា៖ ការពង្រីកផ្លូវនៅតំបន់ទ្រនាប់ជា ៧គន្លង ការដោះស្រាយបញ្ហាកកស្ទះចរាចរណ៍ និងការរៀបចំគម្រោងធ្វើ ឱ្យប្រសើរឡើងច្រកព្រំដែនអន្តរជាតិបាវិតរយៈពេលខ្លី មធ្យម និងវែង។ ជប៉ុនគឺជាប្រទេសមួយដែលបាន យកចិត្តទុកដាក់ក្នុងការអភិវឌ្ឍ និងជួយជ្រោមជ្រែងក្នុងគម្រោងនេះ៕