កែប៖ ផ្លូវបេតុងអាមេ០១ខ្សែប្រវែង ៧៨០ម៉ែត្រ ទទឹង១០ម៉ែត្រ និងដើមឈើប្រណិតប្រភេទ បេង ធ្នង់ នាងនួន និងដើមក្ងោក១៩០ដើម ស្ថិតនៅសង្កាត់កែប ក្រុងកែប ខេត្តកែប ត្រូវបានសម្ពោធដាក់ឲ្យប្រើ ប្រាស់ជាផ្លូវការ ក្រោមអធិបតីភាព ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេក វិទ្យា និងនវានុវត្តន៍ ឯកឧត្តម សំ សារីន ប្រធានក្រុមប្រឹក្សាខេត្ត ឯកឧត្តមបណ្ឌិត សោម ពិសិដ្ឋ អភិបាលខេត្តកែប នៅព្រឹកថ្ងៃទី ២៧ ខែមិថុនា ឆ្នាំ ២០២៣ នេះ។ ឯកឧត្តមបណ្ឌិត សោម ពិសិដ្ឋ អភិបាលខេត្តកែប ថ្លែងថា ផ្លូវបេតុងអាមេមួយខ្សែដែលត្រូវបានសម្ពោធដាក់ឲ្យប្រើប្រាស់ជាផ្លូវការនាពេល នេះ តភ្ជាប់ពីរុក្ខវិថីទេពបុប្ផាប្រសិទ្ធដែលព័ទ្ធជុំវិញឧទ្យានជាតិកែប ផ្លូវបេតុងថ្មីនេះ នឹងបំពេញតម្រូវការ មមាញឹក ជូនបងប្អូនប្រជាពលរដ្ឋក្នុងតំបន់នេះ ក៏ដូចជាភ្ញៀវទេសចរមកពីភ្នំពេញ និងបណ្ដាខេត្តផ្សេងៗ អាចធ្វើដំណើរឆ្លងកាត់ដោយភាពងាយស្រួល និងបញ្ច្រៀសការកកស្ទះ ស្របតាមកំណើនភ្ញៀវទេសចរ ដែលនិយមមកលេងកម្សាន្ត ខេត្តកែបដែលកើនពីមួយឆ្នាំទៅមួយឆ្នាំ ។ ឯកឧត្តមបណ្ឌិតបញ្ជាក់ថា ខេត្តកែបបច្ចុប្បន្ននេះមានការអភិវឌ្ឍន៍លើហេដ្ឋារចនាសម្ព័ន្ធជាច្រើន និងជាបន្តបន្ទាប់ ខេត្តកែបបាននិងកំពុងប្រឹងប្រែងកសាងជួសជុលផ្លូវជាតិ ផ្លូវលំ រៀបចំរមណីយដ្ឋានទេសចរណ៍ ឲ្យកាន់តែមានភាពស្រស់បំព្រង និងអនាម័យបរិស្ថានល្អ ខ្យល់អាកាសបរិសុទ្ធ ជាមួយការបំពាក់ភ្លើង បំភ្លឺផ្លូវគួរជាទីទាក់ទាញភ្ញៀវទេសចរជាតិ និងបរទេស ចូលមកសម្រាកលម្ហែកម្សាន្ត នៅទឹកដីខេត្តកែប ឲ្យកាន់តែមានសន្ទុះខ្លាំងឡើង។ នាឱកាសនោះ ឯកឧត្តមកិត្តិសេដ្ឋាបណ្ឌិត ចម ប្រសិទ្ធ មានប្រសាសន៍ថា នៅគ្រប់កាលៈទេសៈ រាជរដ្ឋាភិ បាលក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ជានិច្ចកាលសម្តេចតែងតែគិតគូរ ដល់សុខទុក្ខរបស់បងប្អូនប្រជា ពលរដ្ឋ ហើយបានជួយដោះស្រាយគ្រប់រាល់បញ្ហាប្រឈមនានាទូទាំងប្រទេស ជាក់ស្តែងថ្ងៃនេះ ក្រោមដំបូលនៃសុខសន្តិភាព ខេត្តកែបទទួលបាននូវសមិទ្ធផលថ្មីៗជាបន្ត បន្ទាប់ លើការពង្រីកហេដ្ឋារចនា សម្ពន្ធ ជាប្រយោជន៍សម្រាប់បម្រើឲ្យវិស័យសេដ្ឋកិច្ច សង្គមកិច្ច មានភាពងាយស្រួសដល់ការ ធ្វើចរាចររបស់បងប្អូនប្រជាពលរដ្ឋ សិស្សានុ សិស្ស ពិសេសជួយសម្រួលការកកស្ទះដល់ភ្ញៀវទេសចរដែលមកកម្សាន្តនៅខេត្តកែបនេះផងដែរ។ ឯកឧត្តមបន្តថា កត្តានៃការអភិវឌ្ឍន៍ហេដ្ឋារចនាសម្ព័ន្ធទាំងអស់នេះ កើតឡើងដោយប្រទេសមានសុខសន្តិភាព ដូច្នេះយើងទាំងអស់គ្នាត្រូវតែរួមគ្នារក្សាការពារនូវ សុខសន្តិភាព ដែលយើងកំពុងមានដូចបច្ចប្បន្ននេះ កុំជឿការញុះញង់ បង្កអសន្តិសុខ និងអនាធិបតេយ្យក្នុងសង្គមជាតិរបស់យើងអោយសោះ។ ទន្ទឹមនេះ ឯកឧត្តមក៏បានផ្តាំផ្ញើដល់បងប្អូនប្រជាពលរដ្ឋទាំងអស់ ត្រូវខិតខំថែរក្សាសុខភាព ហូបស្អាត ផឹកស្អាត រស់នៅស្អាត ឯកឧត្តមបានរំលឹកដល់ពលរដ្ឋ នៅថ្ងៃទី២៣ ខែកក្កដា ឆ្នាំ២០២៣ ត្រូវទៅចូលរួមបោះឆ្នោតឲ្យបានគ្រប់ៗគ្នា៕