ភ្នំពេញ៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានទទួលជួបពិភាក្សាការងារ និងជម្រាបលា ពីសំណាក់ លោកស្រី Sarah Taylor ឯកអគ្គរដ្ឋទូតវិសាមញ្ញ និងពេញសមត្ថភាព នៃប្រទេសកាណាដាប្រចាំព្រះរាជាណាចក្រកម្ពុជា ។ លោកទេសរដ្ឋមន្ត្រី បានថ្លែងអំណរគុណយ៉ាងជ្រាលជ្រៅ ដល់កិច្ចសហប្រតិបត្តិការ និងទំនាក់ទំនងដ៏ល្អ កន្លងមក រវាងប្រទេសទាំងពីរ ជាពិសេសចំពោះជំនួយរបស់ ប្រទេសកាណាដា តាមរយៈធនាគារអភិវឌ្ឍន៍អាស៊ី (ADB) លើការស្តារឡើងវិញ ផ្លូវរថភ្លើងភាគខាងជើង និងខាងត្បូង។ ទទ្ទឹមនឹងនេះ លោកទេសរដ្ឋមន្រ្តី បានលើកឡើង ពីការរីកចម្រើន និងការកសាងឥតឈប់ឈរ លើវិស័យហេដ្ឋារចនាសម្ព័ន្ធ ក្នុងព្រះរាជាណាចក្រកម្ពុជា ជាពិសេសការដាក់ដំណើរការ និងគម្រោងសាងសង់ផ្លូវល្បឿន លឿននានានិងគម្រោងព្រែកជីកហ្វូណនតេជោ។ លោកទេសរដ្ឋមន្រ្តី ក៏បានលើកឡើង ពីតម្រូវការគោលនយោបាយ និងយុទ្ធសាស្រ្តលើ ការគ្រប់គ្រង យានយន្តអគ្គិសនី ដើម្បីចូលរួមចំណែក ក្នុងការកាត់បន្ថយការបំភាយ ឧស្ម័នកាបូន ទៅក្នុងបរិយាកាសផែនដីផងដែរ។ ឯកឧត្តមទេសរដ្ឋមន្ត្រី ក៏បានជម្រាបលោកស្រី ឯកអគ្គរដ្ឋទូត បន្ថែមពីវិទ្យាស្ថានតេជោសែន សាធារណការ និងដឹកជញ្ជូន ដែលបានកំពុងអភិវឌ្ឍន៍ធនធានមនុស្ស ឱ្យក្លាយជាវិស្វករ នាថ្ងៃអនាគត យ៉ាងពិតប្រាកដ មានជំនាញច្បាស់លាស់ ដើម្បីបន្តអភិវឌ្ឍ ក្នុងវិស័យហេដ្ឋា រចនាសម្ព័ន្ធ និងដឹកជញ្ជូន របស់កម្ពុជា ឱ្យកាន់តែរីកចម្រើនថែមទៀត។ ក្នុងឱកាសនោះ លោកទេសរដ្ឋមន្រ្តី​ បានស្នើសុំឱ្យប្រទេសកាណាដា ពិនិត្យលទ្ធភាព​សហប្រតិបត្តិការ លើការអភិវឌ្ឍន៍ធនធានមនុស្ស តាមរយៈវិទ្យាស្ថានតេជោសែន សាធារណការ និងដឹកជញ្ជូន ដោយបណ្តុះបណ្តាលបន្ថែម តាមប្រព័ន្ធ Zoom ពីសាស្រ្តាចារ្យជំនាញ ផ្នែកហេដ្ឋារចនាសម្ព័ន្ធ និងដឹកជញ្ជូន នៃប្រទេសកាណាដា។ ក្នុងឱកាសនេះដែរ លោកស្រី​ ឯកអគ្គរដ្ឋទូត បានសម្តែងនូវអំណរគុណ ចំពោះរដ្ឋាភិបាល នៃព្រះរាជាណាចក្រកម្ពុជា ក៏ដូចជាក្រសួងសាធារណការ និងដឹកជញ្ជូន ដែលតែងតែ ផ្តល់នូវ កិច្ចសហការល្អ ជាមួយប្រទេសកាណាដា។ លោកស្រី បានគោរពអញ្ជើញ លោកទេសរដ្ឋមន្រ្តី ចូលរួមទិវាបុណ្យជាតិ ប្រទេសកាណាដា នាដើមខែកក្កដា ឆ្នាំ២០២៣ ខាងមុខ ព្រមទាំងបានលើកឡើងពីបំណង នៃកិច្ចសហការអភិវឌ្ឍ ធនធានមនុស្ស តាមរយៈការចុះអនុស្សរណៈ នៃការយោគយល់ រវាងវិទ្យាស្ថានតេជោសែន សាធារណការ និងដឹកជញ្ជូន ជាមួយនឹងសាលា ឬស្ថាប័នជំនាញ ផ្នែកហេដ្ឋរចនាសម្ព័ន្ធ នៃប្រទេសកាណាដា។ លោកស្រី​ក៏បានលើកពីបច្ចេកវិទ្យា និងមូលនិធិហិរញ្ញវត្ថុ សម្រាប់ហេដ្ឋារចនាសម្ព័ន្ធ ដែលប្រទេសកាណាដា បានអនុវត្តនៅតាមតំបន់មួយចំនួន លើពិភពលោក៕