ភ្នំពេញ៖ រដ្ឋាភិបាលជប៉ុន បានផ្តល់ប្រាក់កម្ចីប្រមាណ ១៨៨លាន ដុល្លារ​អាមេ​រិក ដើម្បីកែលម្អផ្លូវជនបទ៣៨ខ្សែ និងពង្រីកសមត្ថភាពផ្គត់ផ្គង់​ទឹកនៅ​ខេត្តសៀមរាប។ ពិធីចុះហត្ថលេខាផ្តល់កម្ចីនេះបានធ្វើឡើងនៅព្រឹកថ្ងៃទី២០ ខែមិថុនា ឆ្នាំ២០២៣នេះ រវាងលោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ និងលោក UENO Atsushi ឯកអគ្គរាជទូតជប៉ុនប្រចាំកម្ពុជា។ យោងតាមក្រសួងការបរទេស បានឱ្យដឹងថា ប្រាក់កម្ចីខាងលើនេះ សម្រាប់​អនុវត្តគម្រោងចំនួនពីរដូចខាងក្រោម៖ ទី១៖ គម្រោងកែលម្អការតភ្ជាប់ផ្លូវជនបទ៖ គម្រោងនេះ មានគោល​បំណង​កែ​លម្អស្ថានភាពផ្លូវចំនួន ៣៨ ខ្សែ ចាប់ពីផ្លូវក្រួស ដល់ផ្លូវក្រាលកៅស៊ូ កសាង​ស្ពាន និងដំឡើងបំពង់លូ ដែលមានប្រវែងសរុប ៥២៩.៧គីឡូម៉ែត្រ ដែល​តភ្ជាប់​​ទៅផ្លូវជាតិលេខ៥ ដោយកាត់ខេត្តចំនួន៤ គឺខេត្តកំពង់ឆ្នាំង ពោធិ៍សាត់ បាត់ដំបង និងបន្ទាយមានជ័យ។ គម្រោងនេះ ស្របតាមគោលនយោបាយអភិវឌ្ឍន៍ជនបទ​របស់រាជ​រដ្ឋា​ភិបាល​កម្ពុជា សម្រាប់ឆ្នាំ២០១៩-២០២៣។ ការកែលម្អផ្លូវជនបទទាំងនោះ នឹងជួយ​សម្រួលដល់ការធ្វើដំណើរជាប្រចាំថ្ងៃ របស់ប្រជាពលរដ្ឋក្នុងតំបន់ និងការដឹក​ជញ្ជូន​កសិផលរបស់ពួកគេទៅកាន់ទីផ្សារ សំដៅរួមចំណែក​ដល់ការបង្កើន​សកម្ម​ភាពសេដ្ឋកិច្ច និងលើកកម្ពស់ជីវភាពរស់នៅរបស់ប្រជាជន​នៅតំបន់​ទាំងនោះ។ ទី២៖ គម្រោងពង្រីកសមត្ថភាពផ្គត់ផ្គង់ទឹកនៅខេត្តសៀមរាប ដំណាក់​កាល​ទី៣៖ គម្រោងនេះ នឹងទទួលបានថវិកាបន្ថែម ដើម្បីសាងសង់រោងចក្រ​បន្សុទ្ធ​ទឹក ដែលមានសមត្ថភាពបន្សុទ្ធទឹកចំនួន ៦០,០០០ម៉ែត្រគូបក្នុងមួយថ្ងៃ ព្រមទាំងស្ថានីយ៍បូមទឹក និងប្រព័ន្ធចែកចាយទឹក សំដៅជួយធ្វើឲ្យប្រសើរឡើង​នូវ​លទ្ធភាពទទួលបានការផ្គត់ផ្គង់ទឹកស្អាត នៅក្នុងខេត្តសៀមរាប។ តាងនាមឲ្យរាជរដ្ឋាភិបាល និងប្រជាជនកម្ពុជា ឧបនាយករដ្ឋមន្ត្រី ប្រាក់ សុខុន បានថ្លែងអំណរគុណជប៉ុន ចំពោះការបន្តផ្ដល់ជំនួយដល់កម្ពុជា។ កាយវិការនេះឆ្លុះបញ្ចាំងយ៉ាងច្បាស់ ពីទំនាក់ទំនងយូរអង្វែង និងកិច្ចសហប្រតិបត្តិការ​ជិតស្និទ្ធរវាងប្រទេសទាំងពីរ ក៏ដូចជាការប្តេជ្ញាចិត្តយ៉ាងមុតមាំរបស់ជប៉ុន ក្នុងការគាំទ្រឥតងាករេ សម្រាប់ការអភិវឌ្ឍសេដ្ឋកិច្ច-សង្គមនៅកម្ពុជា។ ឧបនាយករដ្ឋមន្រ្តី ប្រាក់ សុខុន ក៏បានថ្លែងអំណរគុណយ៉ាងស្មោះសរជូនចំពោះលោកឯកអគ្គរាជទូត UENO Atsushi និងសហការី នៅស្ថានទូតជប៉ុន ព្រមទាំងមន្រ្ដីនៃទីភ្នាក់ងារសហប្រតិបត្តិការអន្តរជាតិជប៉ុន ដែលបានចូលរួមចំណែកយ៉ាងសកម្ម និងខិតខំប្រឹងប្រែងមិនខ្លាចនឿយហត់ ក្នុងកិច្ចគាំទ្រដល់ការអភិវឌ្ឍរយៈពេលវែងនៅកម្ពុជា ព្រមទាំងធ្វើឲ្យកាន់តែស៊ីជម្រៅ និងពង្រីកនូវទំនាក់ទំនង និងកិច្ចសហប្រតិបត្តិការទ្វេភាគីរវាងប្រទេសទាំងពីរ៕