កិច្ចប្រជុំពិភាក្សាលើការផ្សព្វផ្សាយអនុក្រឹត្យស្តីពីប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ(Port EDI) ទីស្តីការក្រសួង៖ ថ្ងៃអង្គារ ១០រោច ខែជេស្ឋ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី១៣ ខែមិថុនា ឆ្នាំ២០២៣ ឯកឧត្តម អៀង វ៉េងស៊ុន រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញ ដឹកនាំ កិច្ចប្រជុំពិភាក្សាអំពីការផ្សព្វផ្សាយអនុក្រឹត្យស្តីពីប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ ដោយមានការចូលរួមពីឯកឧត្តមអនុរដ្ឋលេខាធិការ ចាន់ តារា ឯកឧត្តម ម៉ក់ ស៊ីដេត អគ្គនាយក នៃ អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ តំណាងអគ្គនាយកដ្ឋានអន្តោប្រវេសន៍ តំណាង អគ្គនាយកដ្ឋានគយ និងរដ្ឋាករកម្ពុជា តំណាងអគ្គនាយកដ្ឋានបច្ចេកទេសសុខាភិបាល តំណាង អគ្គនាយកដ្ឋានរដ្ឋបាល និងហិរញ្ញវត្ថុ តំណាងអគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ តំណាងកំពង់ផែស្វយ័តភ្នំពេញ តំណាងកំពង់ផែស្វយ័តក្រុងព្រះសីហនុ លោកប្រធាននាយកដ្ឋាននាវា ជំនួញសមុទ្រ និងមន្ត្រីពាក់ព័ន្ធ។ អង្គប្រជុំបានឯកភាពដូចតទៅ៖ ១) រៀបចំសិក្ខាសាលាផ្សព្វផ្សាយអនុក្រឹត្យស្តីពីប្រព័ន្ធផ្លាស់ប្តូរទិន្នន័យ អេឡិចត្រូនិកកំពង់ផែដល់ក្រសួង-ស្ថាប័នពាក់ព័ន្ធ គ្រប់កំពង់ផែឯកជន ក្រុមហ៊ុននាវា និងក្រុមហ៊ុន ភ្នាក់ងារនាវា ចំនួនពីរលើក ក្នុងនោះ៖ លើកទី១ គ្រោងរៀបចំនៅកំពង់ផែស្វយ័តភ្នំពេញ និងលើកទី២នៅ កំពង់ផែស្វយ័តក្រុងព្រះសីហនុ ២) រៀបចំវគ្គបណ្តុះបណ្តាលបន្ថែមដល់មន្ត្រីថ្មីៗ សម្រាប់ការប្រើប្រាស់ ប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ (Port EDI) ៣) រៀបចំកិច្ចប្រជុំកម្រិតបច្ចេកទេស រវាង តំណាងក្រសួងសាធារណការ និងដឹកជញ្ជូន អគ្គនាយកដ្ឋានអន្តោប្រវេសន៍ អគ្គនាយកដ្ឋានគយ និង រដ្ឋាករកម្ពុជា អគ្គនាយកដ្ឋានបច្ចេកទេសសុខាភិបាល កំពង់ផែស្វយ័តភ្នំពេញ និងកំពង់ផែ ស្វយ័តក្រុងព្រះសីហនុ ដើម្បីពិភាក្សាលើបញ្ហាប្រឈមនៃការអនុវត្តប្រព័ន្ធPort EDI៕