សិក្ខាសាលាផ្សព្វផ្សាយ​ គោលការណ៍ណែនាំបច្ចេកទេសស្តីពី​ ការធ្វើផែនការ និងការសិក្សាគម្រោងប្រព័ន្ធទឹកកខ្វក់ក្នុងព្រះរាជាណាចក្រកម្ពុជា   សៀមរាប៖ ថ្ងៃព្រហស្បត្តិ៍-សុក្រ ៥-៦រោច ខែជេស្ឋ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី០៨-០៩ ខែមិថុនា ឆ្នាំ២០២៣ ឯកឧត្តម សួន ភារិទ្ធ អគ្គនាយក នៃអគ្គនាយកដ្ឋានប្រព័ន្ធចម្រោះទឹកកខ្វក់ បានអញ្ជើញជាអធិបតីក្នុងពិធីបើក-បិទសិក្ខាសាលាផ្សព្វផ្សាយ​ គោលការណ៍ណែនាំបច្ចេកទេសស្តីពី​ ការធ្វើផែនការ និងការសិក្សាគម្រោងប្រព័ន្ធទឹកកខ្វក់ក្នុងព្រះរាជាណាចក្រកម្ពុជា ដោយមានការអញ្ជើញចូលរួមពីថ្នាក់ដឹកនាំមន្ទីរសាធារណការ និងដឹកជញ្ជូនទាំង២៥ ខេត្ត-រាជធានី ថ្នាក់ដឹកនាំសាលារដ្ឋបាលខេត្តសៀមរាប និងមន្ត្រីបច្ចេកទេស ជាច្រើនរូបផងដែរ។   សិក្ខាសាលានេះ ត្រូវបានរៀបចំឡើងក្នុងគោលបំណងដើម្បីចែករំលែក និងផ្សព្វផ្សាយអំពីសៀវភៅ គោលការណ៍ណែនាំបច្ចេកទេសពី​ ការធ្វើផែនការ និងការសិក្សាគម្រោងប្រព័ន្ធទឹកកខ្វក់ក្នុងព្រះរាជាណាចក្រកម្ពុជា  ដែលបានរៀបចំដោយ ក្រសួងសាធារណការ និងដឹកជញ្ជូន និងក្រុមជំនាញបច្ចេកទេសទីភ្នាក់ងារសហប្រតិបត្តិការអន្តរជាតិជប៉ុន (JICA) ដើម្បីផ្តល់គោលការណ៍ វិធីសាស្ត្រ និងស្តង់ដារ ការណែនាំបច្ចេកទេសចាំបាច់នានា ដែលសមស្របទៅតាមស្ថានភាពជាក់ស្តែងរបស់កម្ពុជា ។ សៀវភៅ គោលការណ៍ណែនាំបច្ចេកទេស ខាងលើ​នេះត្រូវកំណត់ប្រើប្រាស់ជាឯកសារគោល សម្រាប់រៀបចំនូវផែនការអភិវឌ្ឍ និងការសិក្សាគម្រោងដើម្បីសាងសង់ ប្រតិបត្តិការ និងការថែនាំហេដ្ឋារចនាសម្ព័ន្ធប្រព័ន្ធទឹកកខ្វក់នៅក្នុងប្រទេសកម្ពុជា ដើម្បីឱ្យមានសង្គតភាពបច្ចេកទេស។   សៀវភៅគោលការណ៍ណែនាំបច្ចេកទេសស្តីពីការធ្វើផែនការ និងការសិក្សាគម្រោងប្រព័ន្ធទឹកកខ្វក់ក្នុងព្រះរាជាណាចក្រកម្ពុជា ចែកចេញជាពីរផ្នែកធំៗដើម្បីជាជំនួយ និងផ្តល់ការណែនាំបច្ចេកទេស នៅក្នុងការរៀបចំធ្វើផែនការអភិវឌ្ឍ និងការសិក្សាគម្រោងប្រព័ន្ធទឹកកខ្វក់​ និងមានចំនួន៨ជំពូករួមមាន៖ ជំពូកទី១ ទាក់ទងនឹងសេចក្តីណែនាំសំខាន់ៗសម្រាប់ការធ្វើផែនការអភិវឌ្ឍប្រព័ន្ធទឹកកខ្វក់ ហើយចាប់ពីជំពូកទី២ ដល់ជំពូកទី៨ រៀបរាប់លម្អិតទាក់ទងទៅនឹងតម្រូវការបច្ចេកទេសនៃឋបនភ័ណ្ឌសំខាន់នានា ដែលមានដូចជា៖ ប្រព័ន្ធលូ ស្ថានីយបូម អាងប្រពឹត្តកម្ម ស្ថានីយប្រព្រឹត្តកម្មទឹកកខ្វក់ ស្ថានីយប្រព្តឹត្តកម្មសំណល់ភក់ បរិក្ខារអគ្គីសនី ព្រមទាំងបរិក្ខារតេស្តពិសោធន៍​ សម្រាប់ការសិក្សាបច្ចេកទេសលម្អិត ការគណនា ការរចនាគម្រោងប្លង់បច្ចេកទេសប្រព័ន្ធទឹកកខ្វក់ ។   នាពេលបច្ចុប្បន្នស្របគ្នាជាមួយនឹងសន្ទុះនៃការអភិវឌ្ឍ ដែលមានការលូតលាស់ខ្លាំងគួរឱ្យកត់សម្គាល់ កំណើនប្រជាជនដែលបានរស់នៅតាមទីក្រុង និងទីប្រជុំជនធំៗក៏មានការកើនឡើងយ៉ាងច្រើនផងដែរ ជាសមាមាត្រនាំឱ្យការបញ្ចេញទឹកកខ្វក់ក៏មានបរិមាណច្រើនទៅតាមនោះដែរ ដែលទាមទារឱ្យមានការយកចិត្តទុកដាក់ខ្ពស់លើការគ្រប់គ្រងទឹកកខ្វក់ និងសំណល់រាវ ដែលត្រូវបានបញ្ចេញចោល ព្រមទាំប្រព័ន្ធលូបង្ហូរឲឱ្យបានច្បាស់លាស់ សមស្រប និងគ្រប់ជ្រុងជ្រោយដើម្បីទប់ស្កាត់ និងកាត់បន្ថយការបំពុលប្រភពទឹកធម្មជាតិ ទឹកក្រោមដី បរិស្ថានលើកកម្ពស់អនាម័យ សុខភាពសាធារណៈ ព្រមទាំងសោភ័ណភាពទីក្រុង និងទីប្រជុំជនឱ្យបានស្រស់បំព្រង ប្រកបដោយភាពទាក់ទាញផងដែរ។   នៅក្នុងបរិបទនេះ ក្រសួងសាធារណការ និងដឹកជញ្ជូន កំពុងធ្វើការងារយ៉ាងសកម្ម និងមមាញឹក ជាមួយភាគីពាក់ព័ន្ធនានា រួមទាំស្ថាប័នជាតិ វិស័យឯកជន និងដៃគូអភិវឌ្ឍន៍សំខាន់ៗ ក្នុងការស្វះស្វែងរកដំណោះស្រាយចាំបាច់ រួមទាំងការសាងសង់ហេដ្ឋារចនាសម្ព័ន្ធប្រព័ន្ធទឹកកខ្វក់ ស្ថានីយប្រព្រឹត្តកម្មទឹកកខ្វក់ ការរៀបចំនូវគោលនយោបាយយុទ្ធសាស្ត្រ ឯកសារបច្ចេកទេស និងបទដ្ឋានគតិយុត្តិចាំបាច់សំដៅធ្វើយ៉ាងណាឱ្យការគ្រប់គ្រងទឹកកខ្វក់ និងសំណល់រាវនេះអាចធ្វើទៅបានប្រកបដោយបរិយាបន្ន មានប្រសិទ្ធភាពខ្ពស់ និងមាននិរន្តភាព។   បន្ទាប់ពីបញ្ចប់សិក្ខាសាលា សិក្ខាកាមទាំងអស់បានចុះទស្សនកិច្ចស្ថានីយប្រព័ន្ធចម្រោះទឹកកខ្វក់ក្នុងក្រុងសៀមរាប ស្ថានីយបូម ស្ថានីយកាកសំណល់ភក់ និងគម្រោង World Bank៕