ដូចការគ្រោងទុក នារសៀលថ្ងៃទី០៧ ខែមិថុនា ឆ្នាំ២០២៣នេះ លោកស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន តំណាងរាជរដ្ឋាភិបាលកម្ពុជា បានចុះហត្ថលេខាលើកិច្ចព្រមព្រៀងក្របខ័ណ្ឌ (Framework Agreement – FA) គម្រោងសាងសង់ផ្លូវល្បឿនលឿនតភ្ជាប់ពីរាជធានីភ្នំពេញ-សៀមរាប-ប៉ោយប៉ែត ជាមួយតំណាងក្រុមហ៊ុនសាជីវកម្មស្ពាន និងថ្នល់ចិន (CRBC)។ ការចុះហត្ថលេខាលើកិច្ចព្រមព្រៀងនេះ គឺបន្ទាប់ពីលោកនាយករដ្ឋមន្រ្តី ហ៊ុន សែន បានប្រកាសក្នុងពិធីបើកការដ្ឋានគម្រោងសាងសង់ផ្លូវល្បឿនលឿន តភ្ជាប់ពីរាជធានីភ្នំពេញទៅក្រុងបាវិតនាព្រឹកថ្ងៃដដែលថា រាជរដ្ឋាភិបាលកម្ពុជានឹងចុះហត្ថលេខាលើកិច្ចព្រមព្រៀងក្របខ័ណ្ឌគម្រោងសាងសង់ផ្លូវល្បឿនលឿនតភ្ជាប់ពីរាជធានីភ្នំពេញ-សៀមរាប-ប៉ោយប៉ែត ដែលជាផ្លូវល្បឿនលឿនខ្សែទី៣ជាមួយក្រុមហ៊ុនចិន។ លោក ហ៊ាង សុទ្ធាយុត្តិ អ្នកនាំពាក្យក្រសួងសាធារណការ និងដឹកជញ្ជូន បានថ្លែងប្រាប់វិទ្យុវាយោថា ពេលដែលផ្លូវល្បឿនលឿនទី៣នេះសាងសង់រួចហើយ វានឹងផ្តល់អត្ថប្រយោជន៍ច្រើនមកដល់សេដ្ឋកិច្ចកម្ពុជា។ អ្នកនាំពាក្យរូបនេះបានសង្កត់ធ្ងន់ថា ពេលដែលផ្លូវនេះធ្វើហើយនឹងកាត់បន្ថយអត្រាគ្រោះថ្នាក់ចរាចរណ៍នៅក្នុងប្រទេសកម្ពុជាបានមួយកម្រិតទៀត។ ទាក់ទិននឹងការសាងសង់ផ្លូវល្បឿនលឿនភ្នំពេញ-សៀមរាប-ប៉ោយប៉ែតនេះ លោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុបានឱ្យដឹងដែរថា ជាធម្មតាការអនុវត្តគម្រោងសាងសង់ផ្លូវល្បឿនលឿនទី៣នេះ គឺរដ្ឋាភិបាលបានគិតច្បាស់លាស់ពីផលចំណេញសម្រាប់សេដ្ឋកិច្ច សង្គម។ សម្រាប់លោកបណ្ឌិត គី សេរីវឌ្ឍន៍ ប្រធានមជ្ឈមណ្ឌលសិក្សាចិន និងជាអ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជាក៏បានលើកឡើងដែរថា ការកសាងហេដ្ឋារចនាសម្ព័ន្ធផ្លូវល្បឿនលឿននឹងផ្តល់ផលប្រយោជន៍ច្រើនដល់វិស័យសេដ្ឋកិច្ចកម្ពុជា។ លោកថា បច្ចុប្បន្ននេះផ្លូវល្បឿនលឿននៅកម្ពុជាបានជួយសម្រួលដល់ការធ្វើចរាចរណ៍របស់ប្រជាពលរដ្ឋ និងបានរួមចំណែកក្នុងការកាត់បន្ថយការកកស្ទះចរាចរណ៍ និងបានកាត់បន្ថយអត្រាគ្រោះថ្នាក់ចរាចរណ៍។ រីឯលោក លី សុវណ្ណារិទ្ធ អភិបាលរងខេត្តបន្ទាយមានជ័យ បានថ្លែងប្រាប់វិទ្យុវាយោថា ពេលដែលផ្លូវល្បឿនលឿននេះសាងសង់រួច វានឹងក្លាយជាជម្រើសម្រាប់ប្រជាពលរដ្ឋ និងជាផ្នែកមួយដែលអាចជំរុញល្បឿនសេដ្ឋកិច្ចជាតិ។ គួរបញ្ជាក់ថា បើតាមលោក ស៊ុន ចាន់ថុល រដ្ឋមន្រ្តីក្រសួងសាធារណការ បានបញ្ជាក់ឱ្យដឹងដែរថា ក្រុមហ៊ុនសាជីវកម្មស្ពាន និងថ្នល់ចិននឹងត្រូវការពេលវេលាសិក្សាលំអិតយ៉ាងយូរ៦ខែទៀត។ លោកថា គណកម្មការអន្តរក្រសួង មិនចង់ឱ្យមានការចំណាយថវិកាច្រើនលើការដោះស្រាយផលប៉ះពាល់ជាមួយប្រជាពលរដ្ឋនោះទេ។ លោករដ្ឋមន្រ្តីក្រសួងសាធារណការបានបន្តទៀតថា តាមការប៉ាន់ស្មានការសាងសង់ផ្លូវល្បឿនលឿននេះនឹងត្រូវចំណាយថវិការប្រមាណ២,៥០០លានដុល្លារ។ សូមជម្រាបថា គម្រោងសាងសង់ផ្លូវល្បឿនលឿនតភ្ជាប់ពីរាជធានីភ្នំពេញ-សៀមរាប-ប៉ោយប៉ែតនឹងក្លាយជាផ្លូវល្បឿនលឿនខ្សែទី៣ បន្ទាប់ពីផ្លូវល្បឿនលឿនខ្សែទី១ ភ្នំពេញ-ព្រះសីហនុ ដែលកំពុងបើកឱ្យដំណើរការចរាចរណ៍ និងផ្លូវល្បឿនលឿនខ្សែទី២ ភ្នំពេញ-បាវិត ទើបត្រូវបានបើកការដ្ឋានសាងសង់កាលពីព្រឹកថ្ងៃទី៧ ខែមិថុនា ឆ្នាំ២០២៣នេះ។ ផ្លូវល្បឿនលឿនទី៣នេះឆ្លងកាត់រាជធានីខេត្តចំនួន៦រួមមានរាជធានីភ្នំពេញ ខេត្ដកណ្ដាល ខេត្ដកំពង់ចាម ខេត្ដកំពង់ធំ ខេត្ដសៀមរាប និងខេត្តបន្ទាយមានជ័យ៕