ថ្ងៃអាទិត្យ ៩រោច ខែជេស្ន ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៧ ខែមិថុនា ឆ្នាំ២០១៨ នៅ ទីស្តីការក្រសួងសាធារណការ និងដឹកជញ្ជូន ឯកឧត្តមទេសរដ្ឋមន្ត្រី ស៊ុន ចាន់ថុល បានអញ្ជើញជា អធិបតីក្នុងពិធីរំលឹកខួបលើកទី៦៩ទិវាកុមារអន្តរជាតិ១មិថុនា ខួបលើកទី១៧ទិវាពិភពលោកប្រឆាំងពល កម្មកុមារ១២មិថុនា និងទិវាកុមារកម្ពុជាឆ្នាំ២០១៨ ដោយមានការចូលរួមពីមន្ត្រីជាន់ខ្ពស់ក្រសួង សាធារណការ និងការដឹកជញ្ជូន មាតាបិតានិងអាណាព្យាបាលសិស្សផងដែរ។ កម្មវិធីទាំងបីនេះប្រព្រឹត្តទៅក្រោមប្រធានបទ៖ “រួមគ្នាការពារកុមារដើម្បីអភិវឌ្ឍន៍គ្រួសារ និងសង្គមជាតិ និងទប់ស្កាត់គ្រោះថ្នាក់ការងារ និងភាពងាយរងគ្រោះផ្នែកសុខភាពសម្រាប់កម្មករនិយោជិតវ័យក្មេងដើម្បី លុបបំបាត់ពលកម្មកុមារ” ដែលជាការស្តែងចេញពីឆន្ទះប្រកបដោយក្តីស្រឡាញ់ និងការគិតគូរយ៉ាង ពិតប្រាកដពីសំណាក់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃរាជរដ្ឋាភិបាល កម្ពុជា ដែលតែងតែយកចិត្តទុកដាក់លើកុមារជាទំពាំងស្នងឬស្សី។ ឯកឧត្តមទេសរដ្ឋមន្ត្រី ស៊ុន ចាន់ថុល បានផ្តាំផ្ញើរដល់មាតាបិតា អាណាព្យាបាលសិស្សឱ្យបន្ត និងបង្កើន ការយកចិត្តទុកដាក់ប្រៀនប្រដៅ និងបង្កលក្ខណៈឱ្យអស់លទ្ធភាពដើម្បីថែទាំសុខភាព និងបញ្ជូនកូនចៅ ទៅសិក្សាឱ្យបានគ្រប់ៗគ្នា។ ឯកឧត្តមទេសរដ្ឋមន្ត្រី បានក្រើនរំលឹកឱ្យក្មួយៗធ្វើខ្លួនជាកូនល្អ សិស្សល្អ មិត្តល្អ ប្រកបដោយភាព ឧស្សាហ៍ព្យាយាមចៀសឱ្យផុតពីគ្រឿងញៀន និងអំពើពាលាអាវ៉ាសែ ក្មេងទំនើង ដើម្បីក្លាយជាពលរដ្ឋ ដែលជាធនធានដ៏ពូកែ មានកម្លាំងកាយ និងប្រាជ្ញាសម្រាប់ការអភិវឌ្ឍសេដ្ឋកិច្ច និងសង្គមកម្ពុជាយ៉ាង ពិតប្រាកដ។ ជាមួយគ្នានេះផងដែរ ឯកឧត្តមទេសរដ្ឋមន្ត្រី ស៊ុន ចាន់ថុល ក៏បាននាំមកនូវអំណោយដែលជាសម្ភារៈ សិក្សា និងថវិកាមួយចំនួនចែកជូនដល់ក្មួយៗទាំងអស់ផងដែរ។