ក្រសួងសាធារណការ ប្រជុំពិនិត្យវឌ្ឍនភាពការងារគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) Water Supply and Sanitation Improvement Project នៅថ្ងៃចន្ទ ៣កើត ខែជេស្ឋ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី២២ ខែឧសភា ឆ្នាំ២០២៣ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំ កិច្ចប្រជុំពិនិត្យវឌ្ឍនភាពការងារគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) ដោយ មានការចូលរួមពីថ្នាក់ដឹកនាំក្រសួងទទួលបន្ទុក និងមន្រ្តីបច្ចេកទេសជាច្រើនរូប។ កិច្ចប្រជុំនេះត្រូវបានរៀបចំឡើងក្នុងគោលបំណង ដើម្បីប្រមូលមតិយោបល់ និងធាតុចូលពីអ្នកជំនាញ ឱ្យបានគ្រប់ជ្រុងជ្រោយ សំដៅធ្វើយ៉ាងណាអនុវត្តគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP)នេះ ឱ្យមានប្រសិទ្ធភាពនិងប្រសិទ្ធផលខ្ពស់ តាមដែលអាចធ្វើទៅបាន និងធានាបាននូវការអនុវត្តប្រកបដោយភាពរលូនពីគ្រប់ភាគីពាក់ព័ន្ធដើម្បីចូលរួមចំណែកក្នុងការអភិវឌ្ឍវិស័យនេះឱ្យកាន់តែមានការរីកចម្រើន។ ឯកឧត្តមរដ្ឋលេខាធិការប្រធានអង្គប្រជុំ បានជំរុញលើកទឹកចិត្តឱ្យមន្ត្រីជំនាញបច្ចេកទេសពាក់ព័ន្ធទាំងអស់ ពិភាក្សាផ្លាស់ប្តូរគំនិតយោបល់ឱ្យបានផុសផុល បំពេញបន្ថែម ចំណុចខ្វះខាត ដើម្បីពង្រឹងការគ្រប់គ្រង និងអនុវត្តគម្រោងនេះឱ្យកាន់តែមានប្រសិទ្ធភាព ទទួលបានជោគជ័យ៕