(ភ្នំពេញ)៖ អ្នកសារព័ត៌មានជាតិជាតិ-អន្តរជាតិ និងអ្នកជំនាញចំនួន៥០រូប មកពីប្រទេសចំនួន៦ បានចូលជួបសម្តែងការគួរសម និងស្វែងយល់ពីកិច្ចការងារចម្បងៗលើវិស័យបរិស្ថាន ជាមួយលោក សាយ សំអាល់ រដ្ឋមន្ត្រីក្រសួងបរិស្ថាន ព្រមទាំងបន្តចុះសិក្សាស្វែងយល់ពីកំពង់ផែទន្លេ និងខ្សែសង្វាក់ផ្គត់ផ្គង់ថ្មី របស់កំពង់ផែស្វយ័តភ្នំពេញ។ អ្នកសារព័ត៌មាន និងអ្នកជំនាញទាំង៥០រូបនេះ មកពីប្រទេសកម្ពុជា ចិន ថៃ ឡាវ មីយ៉ាន់ម៉ា វៀតណាម និងអូស្ត្រាលី។ សកម្មភាពនេះបានធ្វើឡើងនាថ្ងៃទី២៧ ខែមេសា ឆ្នាំ២០២៣ ដោយមានការសម្របសម្រួលពីសំណាក់លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃកម្ពុជា នៃរាជបណ្ឌិត្យសភាកម្ពុជា។ តាមរយៈជំនួបសម្តែងការគួរសមនេះលោក សាយ សំអាល់ រដ្ឋមន្ត្រីក្រសួងបរិស្ថាន និងលោកស្រី ហ៉ឺ ផានិន អគ្គនាយករងកំពង់ផែស្វយ័ត បានធ្វើឱ្យអ្នកសារព័ត៌មាននៅតាមបណ្តោយដងទន្លេមេគង្គ បានយល់ដឹងកាន់តែច្រើនពាក់ព័ន្ធនឹងបញ្ហាតំបន់មេគង្គទាំងទិដ្ឋភាពនយោបាយ សេដ្ឋកិច្ច ជាពិសេសពាក់ព័ន្ធនឹងបញ្ហាបរិស្ថាន និងធនធានធម្មជាតិ និងការប្រើប្រាស់ទឹកដើម្បីនាធានានូវនិរន្តភាព ការរក្សាគុណភាពទឹក ក្នុងការរួមចំណែកលើកកម្ពស់ជីវភាពប្រជាពលរដ្ឋនៅតាមដងទន្លេមេគង្គ។ សូមជម្រាបថា វិទ្យាស្ថានទំនាក់ទំនងអន្តរជាតិនៃកម្ពុជា នៃរាជបណ្ឌិត្យសភាកម្ពុជា និងក្លិបអ្នកកាសែតកម្ពុជា បានបើកសិក្ខាសាលាបណ្តុះបណ្តាលសារព័ត៌មានតំបន់ទន្លេមេគង្គលើកទី២ ក្រោមប្រធានបទ «ការចូលរួមរបស់ប្រព័ន្ធផ្សព្វផ្សាយ ដើម្បីតំបន់ទន្លេមេគង្គសន្តិភា ស្ថិរភាព និងវិបុលភាព» ដោយប្រព្រឹត្តទៅរយៈពេល៣ថ្ងៃ គឺចាប់ថ្ងៃទី២៦ ដល់ថ្ងៃទី២៨ ខែមេសា ឆ្នាំ២០២៣៕