ឯកឧត្តមទេសរដ្ឋមន្ត្រី ស៊ុន ចាន់ថុល អញ្ជើញជាអធិបតីភាពក្នុងពិធីចុះហត្ថលេខា លើកិច្ចព្រមព្រៀងសេវាទីប្រឹក្សាហិរញ្ញវត្ថុ រវាង ក្រសួងសាធារណការ និងដឹកជញ្ជូន និងសាជីវកម្មហិរញ្ញវត្ថុអន្តរជាតិ ក្នុងការសិក្សាសមិទ្ធិលទ្ធភាព គម្រោងមជ្ឈមណ្ឌលភ័ស្តុភារកម្មក្រុងព្រះសីហនុ នៅទីស្តីការក្រសួង ព្រឹកថ្ងៃទី១៩ ខែមេសា ឆ្នាំ២០២៣ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីភាពក្នុងពិធីចុះហត្ថលេខា លើកិច្ចព្រមព្រៀងសេវាទីប្រឹក្សាហិរញ្ញវត្ថុ រវាង ក្រសួងសាធារណការ និងដឹកជញ្ជូន និងសាជីវកម្មហិរញ្ញវត្ថុអន្តរជាតិ ក្នុងការសិក្សាសមិទ្ធិលទ្ធភាព គម្រោងមជ្ឈមណ្ឌលភ័ស្តុភារកម្មក្រុងព្រះសីហនុ។ គម្រោងអភិវឌ្ឍន៍មជ្ឈមណ្ឌលភ័ស្តុភារកម្មក្រុងព្រះសីហនុ SHV-LC (Sihanoukville Logistics | Complex) ត្រូវបានកំណត់នៅក្នុងផែនការមេភ័ស្តុភារកម្ម របស់ក្រសួងសាធារណការ និងដឹកជញ្ជូន (MPWT) ហើយគម្រោងនេះ ត្រូវបានគណៈកម្មាធិការអន្តរក្រសួងស្តីពីភាពជាដៃគូរវាងរដ្ឋ និងឯកជន បានឯកភាពឱ្យធ្វើការអភិវឌ្ឍតាមទម្រង់ជាដៃគូរវាងរដ្ឋ និងឯកជន PPP (Public Private Partnership)។ ការសិក្សាបុរេសមិទ្ធិលទ្ធភាព (Pre-Feasibility Study) ត្រូវបានធ្វើឡើងដោយសាជីវកម្មហិរញ្ញវត្ថុ អន្តរជាតិ IFC (International Finance Corporation) នៃធនាគារពិភពលោក ហើយលទ្ធផល នៃការសិក្សានេះបានបង្ហាញថា ការអភិវឌ្ឍគម្រោង SHV-LC គឺមានប្រាក់ចំណេញក្នុងការវិនិយោគ (Commercially viable) សម្រាប់ជំរុញការអភិវឌ្ឍវិស័យដឹកជញ្ជូន និងភ័ស្តុភារកម្ម។ ដោយមើលឃើញអំពីសារៈសំខាន់នៃគម្រោង SHV-LC ក្រសួងសេដ្ឋកិច្ច និងហិរញ្ញវត្ថុ (MEF) និង ក្រសួងសាធារណការ និងដឹកជញ្ជូន MPWT បានឯកភាពឱ្យ IFC ធ្វើការសិក្សាសមិទ្ធិលទ្ធភាពគម្រោង SHV-LC បន្តទៀត ដោយ IFC តម្រូវឱ្យមានកិច្ចព្រមព្រៀងសេវាទីប្រឹក្សាហិរញ្ញវត្ថុ (FAS (Financial Advisory ServicesAgreement) រវាង MPWT និង IFC។ ក្រុមការងារក្រសួងសាធារណការ និងដឹកជញ្ជូន, ក្រសួងសេដ្ឋកិច្ច និងហិរញ្ញវត្ថុ និង IFC បានប្រើ ប្រាស់ពេលវេលាចំនួន១២ខែ ដើម្បីបញ្ចប់ការចរចានៃកិច្ចព្រមព្រៀងនេះ នាដើមខែធ្នូ ឆ្នាំ២០២២ នេះ។ IFC នឹងធ្វើការសិក្សាសមិទ្ធិលទ្ធភាពគម្រោង SHV-LC ក្នុងទម្រង់ PPP ស្របតាមគោល នយោបាយ និងក្របខណ្ឌគតិយុត្ត នៃភាពជាដៃគូរវាងរដ្ឋ និងឯកជន របស់កម្ពុជា។ ការសិក្សានេះ គប្បីបញ្ជាក់អំពីប្រភេទនៃការវិនិយោគ (PPP, BOT, BOO,…) និងបើកទូលាយឱ្យមានការចូលរួមពី ផ្នែកឯកជន (Private Sector Participant) ក្នុងការរចនា, ការសាងសង់, ការធ្វើហិរញ្ញប្បទាន, ការប្រតិបត្តិ និងការថែទាំនៅក្នុងគម្រោង SHV-LC។ IFC អាចជ្រើសរើសទីប្រឹក្សារបស់ខ្លួនផ្ទាល់ ឬ ជួលទីប្រឹក្សាពីខាងក្រៅ ដើម្បីជួយរៀបចំធ្វើការសិក្សា ហើយធានាថា ការសិក្សានេះគឺប្រព្រឹត្តទៅតាម ពេលវេលា និងផែនការដែលបានគ្រោងទុក ដោយមានការឯកភាពគ្នារវាង MPWT និង IFC។ សេវាកម្មសំខាន់ៗ របស់ IFC រួមមាន៖ រៀបចំការសិក្សាសមិទ្ធិលទ្ធភាព, វាយតម្លៃភាពទាក់ទាញ របស់ទីផ្សារ (Market sounding), រៀបចំឯកសារគម្រោង (រួមមានកិច្ចព្រមព្រៀងសម្បទាន, កិច្ចសន្យា PPP និងឯកសារពាក់ព័ន្ធដទៃទៀត) និងដាក់ដេញថ្លៃគម្រោង SHV-LC។ ក្រសួងសាធារណការ និងដឹកជញ្ជូន និងស្ថាប័នពាក់ព័ន្ធ ត្រូវសហការជាមួយ IFC ក្នុងការផ្តល់ ព័ត៌មាន, ទិន្នន័យ និងឯកសារពាក់ព័ន្ធ, និងអនុញ្ញាតឱ្យតំណាងរបស់ IFC បានចូលជួបធ្វើការ ជាមួយមន្ត្រីពាក់ព័ន្ធគ្រប់ជាន់ថ្នាក់ ក្នុងការរៀបចំការសិក្សានេះ។ ក្រសួងសេដ្ឋកិច្ច និងហិរញ្ញវត្ថុ មាន កាតព្វកិច្ច ក្នុងការទូទាត់កម្រៃសេវាទៅតាមដំណាក់កាលនីមួយៗ ដែលបានកំណត់ដោយភាគី ទាំងពីរ MEF និង IFC នៅក្នុងកិច្ចព្រមព្រៀង។ ថវិកាចំនួន $2,500,000 ដុល្លារ រាជរដ្ឋាភិបាលត្រូវបង់កម្រៃសេវាជូន IFC ទៅតាមដំណាក់កាលនីមួយៗ ប៉ុន្តែថវិកានេះនឹងត្រូវបង្វែរសងមករាជរដ្ឋាភិបាលវិញ ដោយក្រុមហ៊ុនដែលទទួលបានជ័យជម្នះក្នុងការដេញថ្លៃជាសាធារណៈ នៃគម្រោង SHV-LC។ គម្រោងអភិវឌ្ឍន៍មជ្ឈមណ្ឌលភ័ស្តុភារកម្មក្រុងព្រះសីហនុ (SHV-LC )នឹងជួយជំរុញរំហូរទំនិញ និងសេវាកម្មនៅច្រករបៀងដឹកជញ្ជូនសេដ្ឋកិច្ចដ៏ សំខាន់ នៃខេត្តព្រះសីហនុ ព្រមទាំងអាចជួយកាត់បន្ថយតម្លៃដឹកជញ្ជូន និងភ័ស្តុភារកម្ម ព្រមទាំង បង្កើនភាពប្រកួតប្រជែង ផ្តល់ពិពិធកម្មសេវាផ្នែកដឹកជញ្ជូន និងភ័ស្តុភារកម្ម ដល់វិស័យឯកជន ថែមទៀតផង៕