ស្ទឹងត្រែង: កាលពីព្រឹកថ្ងៃទី២០ ខែមីនា ឆ្នាំ២០២៣ លោក ចៅ មុន្នីរ៉ា អភិបាលរងខេត្តស្ទឹងត្រែង និងលោកអភិបាលស្រុកសេសាន បានចុះជួប និងជំរុញដល់ អាជ្ញាធរឃុំស្រែគ និងឃុំតាឡាត ស្រុកសេសាន ធ្វើការជួសជុល តភ្ជាប់ឡើងវិញ នូវផ្លូវ១ខ្សែ មានប្រវែង ៣០ គីឡម៉ែត្រ។ លោក ចៅ មុន្នីរ៉ា បានលើកឡើងថាៈ​ ផ្លូវ១ខ្សែនេះ ពិតជាមានសារៈសំខាន់ខ្លាំង ណាស់ សម្រាប់ប្រជាពលរដ្ឋ ទាំងពីរឃុំ។ ការជួសជុលផ្លូវនេះ និងអាចសម្រួលដល់ ប្រជាពលរដ្ឋ ឲ្យកាន់តែមានភាពងាយស្រួល ក្នុងការធ្វើដំណើរ ឆ្លងកាត់ទៅមករវាង ឃុំស្រែគ និងឃុំតាឡាត ការដឹកកសិផល និងការធ្វើដំណើរប្រកបការងារផ្សេងៗ។ លោកអភិបាលរងខេត្ត បានជំរុញដល់ក្រុមការងារ ការដ្ឋានជួសជុលផ្លូវ ១ខ្សែ ពន្លឿនការងារជួសជុលនេះ ឲ្យបានលឿន និងមានគុណភាព សម្រាប់ជាប្រយោជន៍ ដល់ប្រជាពលរដ្ឋ ក្នុងការប្រើប្រាស់បានលឿន។ លោក សុវណ្ណ ពិសេដ្ឋ អភិបាលស្រុកសេសាន បាននិយាយថាៈ ផ្លូវ១ខ្សែនេះ គឺជាផ្លូវ ប្រភេទក្រាលក្រួសក្រហម មានទទឹង ៦ ម៉ែត្រ ប្រវែង ៣០ គីឡូម៉ែត្រ ត្រូវបានសាង សង់ឡើង រយៈពេល ៦ ឆ្នាំកន្លងមកហើយ តែត្រូវខូចខាត ដោយគ្រោះធម្មជាតិ និងការប្រើប្រាស់របស់ប្រជាពលរដ្ឋ៕