ភ្នំពេញ៖ ​ គម្រោងទីលានចាក់សំរាមតម្លៃ ៦.២៨៣.៧៤៧ លានដុល្លារអាម៉េរិក នៅខេត្តបាត់ដំបង ត្រូវបានប្រគល់ជូនអាជ្ញាធរខេត្ត និងសម្ពោធដាក់ឲ្យប្រើប្រាស់ជាផ្លូវការ ដើម្បីចូលរួមការអភិវឌ្ឍអនាម័យក្នុងខេត្តបាត់ដំបង។ ​​ ពិធីនេះធ្វើឡើងនៅថ្ងៃទី២០ ខែមីនា ឆ្នាំ២០២៣ ដោយមានការចូលរួមពី លោកស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ​ព្រមទាំងអ្នកពាក់ព័ន្ធជាច្រើនទៀត។ គម្រោងនេះស្ថិតនៅក្នុងភូមិប៉ោយស្វាយ ឃុំតាគ្រាម ស្រុកបាណន់ ខេត្តបាត់ដំបង ដោយត្រូវបានសាងសង់ឡើងរយៈ​ពេល ១២ខែ នៅលើផ្ទៃដីសរុបទំហំ ២០,៨០ ហិកតា ដោយក្រុមហ៊ុន ហេង សម្បត្តិ អាហរ័ណ នីហរ័ណ ដឹកជញ្ជូន និងសំណង់ ត្រួតពិនិត្យ​បច្ចេកទេសដោយក្រុមហ៊ុន RAMBOLL DANMARKA/S សហការជាមួយក្រុមហ៊ុនOriental Consultant Global Co., Ltd. ក្រុមហ៊ុនSCE និងក្រុមហ៊ុន Tancons (Cambodia) Co., Ltd.។​ ក្រសួងសាធារណការ បានឲ្យដឹងថា ​ក្រុមហ៊ុនបានសាងសង់ហេដ្ឋារចនាសម្ព័ន្ធផ្សេងៗរួមមាន ផ្លូវចូល រណ្តៅកប់សំរាម រណ្តៅប្រព្រឹត្តកម្ម អគារដ្ឋបាល អគារស្នាក់នៅ អគារញែកសំរាម អគារផ្គត់ផ្គង់ អគារទុកដាក់កាកសំណល់គ្រោះថ្នាក់ ប៉ុស្តិ៍យាម រោងជាង ចំណតរថយន្ត កន្លែងលាងរថយន្ត ស្ថានីយថ្លឹងរថយន្ត បណ្តាញអគ្គិសនី របង និងដាំដើមឈើជាដើម។ ក្រសួងឲ្យដឹងទៀតថា ទីលានចាកសំរាមថ្មីនេះ គ្រោងឲ្យប្រើប្រាស់នៅដំណាក់កាលដំបូងនៅរណ្ដៅទី១ មានទំហំ ២,៩៤ហិក​តា ហើយមានសមត្ថភាពអាចផ្ទុកសំរាមបាន ៣១៣​.៧០៣ ម៉ែត្រគុប សម្រាប់រយៈពេល ១០ឆ្នាំ (២០២២ រហូតដល់ ២០៣២) សម្រាប់ប្រជាជន ក្នុងក្រុងបាត់ដំបង និងស្រុកដែលនៅក្បែរទីលានទុកដាក់សំរាម។ តាមការរំពឹងទុក ប្រជាជនប្រមាណ ៦០% ដែលត្រូវជា ១២៦.០០០នាក់ នឹង​ទទួលបានសេវាកម្មផ្នែកអនាម័យ​បរិ​ស្ថា​នពីទីលានចាក់សំរាមមួយនេះ។ សូមជម្រាបថាគម្រោងទីលានចាក់សំរាមនេះ ស្ថិតក្រោមគម្រោងកែលម្អគ្រប់គ្រងបរិស្ថានក្រុងជុំវិញបឹងទន្លេសាប ជំហានទី២ ប្រើប្រាស់ថវិកាកម្ចីឥណទានធនាគារអភិវឌ្ឍន៍អាស៊ី។ ដោយឡែក ថ្មីៗនេះ រាជរដ្ឋាភិបាលក៏បានសម្ពោធដាក់ឲ្យប្រើប្រាស់ទីលានទុកដាក់សំរាម ក្រុងកំពង់ឆ្នាំង និងក្រុងពោធិ៍សាត់ នៃគម្រោងកែលម្អគ្រប់គ្រងបរិស្ថានក្រុងជុំវិញបឹងទន្លេសាប ជំហានទី១ ផង៕