នៅថ្ងៃទី៧ ខែមីនា ឆ្នាំ២០២៣ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីភាពបើកកម្មវិធី «អបអរសាទរ ខួប៣ឆ្នាំ លេខពិសេសផ្ទាល់ខ្លួន» នៅសួនច្បារវត្តបទុមវតី រាជធានីភ្នំពេញ។ ព្រឹត្តិការណ៍ដ៏អស្ចារ្យនេះ បានប្រារព្ធឡើងរយៈពេលពីរថ្ងៃ ចាប់ពីថ្ងៃទី០៧ ខែមីនា ដល់ថ្ងៃទី០៨ ខែមីនា ឆ្នាំ២០២៣ ដោយមានរៀបចំការតាំងពិព័រណ៍ផ្លាកលេខ និងរថយន្ត, ការដាក់តាំងលក់ និងដេញថ្លៃ លេខពិសេស ដើម្បីកៀរគរថវិកាជួយដល់មូលនិធិគន្ធបុប្ផា និងមន្ទីរពេទ្យកុមារជាតិ។ លើសពីនេះ នៅល្ងាចថ្ងៃទី០៨ ក៏មានការប្រគំតន្ត្រី ដោយចូលរួមពីសំណាក់សិល្បករ សិល្បការិនីល្បីៗ ក្នុងន័យបញ្ជ្រាបការយល់ដឹងអំពី សុវត្ថិភាពចរាចរណ៍ផ្លូវគោក ទៅកាន់សាធារណជន។ ក្រសួងសាធារណការ និងដឹកជញ្ជូន សូមគោរពអញ្ជើញបងប្អូនចូលរួមក្នុងព្រឹត្តិការណ៍ដ៏ធំនេះ ឱ្យបានច្រើនកុះករទាំងអស់គ្នា។ ទស្សនាស្តង់ពិព័រណ៍ និងការប្រគំតន្ត្រីដោយសេរី និងឥតគិតថ្លៃ ព្រមទាំងមានឱកាសក្នុងការទទួលបានរង្វាន់អនុស្សាវរីយ៍ ដោយការលេងល្បែងកំសាន្តនៅតាមស្តង់នានាផងដែរ។