[Kley Kley News] - សម្តេច ហ៊ុន សែន ប្រកាសគម្រោងសាងសង់ផ្លូវកាត់១ ពីបាត់ដំបង ទៅកោះកុង
2018-05-21
ទៅកាន់ទំព័រចុះផ្សាយក្នុង Kley Kley News
សម្តេចនាយករដ្ឋមន្រ្តី ហ៊ុន សែន បានប្រកាសគម្រោងសាងសង់ផ្លូវកាត់១ ចេញពីសំឡូត ខេត្តបាត់ដំបង កាត់ទៅថ្មដា ខេត្តពោធិ៍សាត់ រួចកាត់ទៅកាន់ខេត្តកោះកុងតែម្តង។ ការថ្លែងនេះ ធ្វើឡើងនៅក្នុងពិធីបើកការដ្ឋានសាងសង់កំណាត់ផ្លូវជាតិលេខ៥ ពីព្រែកក្តាម ទៅធ្លាម្អម នៅស្រុករលៀប្អៀរ ខេត្តកំពង់ឆ្នាំង នាព្រឹកថ្ងៃទី២១ ខែឧសភា ឆ្នាំ២០១៨។
សម្តេចបញ្ជាក់ថា ការសាងសង់ផ្លូវកាត់នេះ គឺដើម្បីកាត់បន្ថយពេលវេលានៃការដឹកជញ្ជូនទំនិញពីខេត្តបាត់ដំបង ឆ្ពោះទៅកាន់កំពង់ផែខេត្តព្រះសីហនុ ពោលគឺចំណេញចម្ងាយផ្លូវប្រមាណ ១០០គីឡូម៉ែត្រ។
សម្តេច ហ៊ុន សែន បានមានប្រសាសន៍ថា សម្តេចបានធ្វើដំណើរតាមផ្លូវគោកចម្ងាយប្រមាណ ៥ពាន់គីឡូម៉ែត្រ កាលពីឆ្នាំ២០១៦-២០១៧ ទៅកាន់តំបន់នានា។ ឥឡូវនេះ រាជរដ្ឋាភិបាល កំពុងស្វែងរកវិធីនានា ដើម្បីកាត់បន្ថយពេលវេលានៃការធ្វើដំណើរ និងដាក់ចូលទៅក្នុងផែនការអាទិភាព នូវគម្រោងសាងសង់ផ្លូវកាត់ខាងលើនេះ។
សូមរំលឹកដែរថា ជុំវិញគម្រោងសាងសង់ផ្លូវពីបាត់ដំបង-កោះកុងនេះ មន្រ្តីជាន់ខ្ពស់ក្រសួងសាធារណការ និងដឹកជញ្ជូន និងក្រុមជំនាញរបស់ក្រុមហ៊ុនចិន បានចុះពិនិត្យ និងសិក្សា នៅក្នុងទីតាំងខេត្តបាត់ដំបង រួចមកហើយ កាលពីថ្ងៃទី៩ ខែមីនា ឆ្នាំ២០១៨។
បើតាមការបញ្ជាក់ពីលោក ចាន់ សំបូរ អនុប្រធានមន្ទីរសាធារណការ និងដឹកជញ្ជូនខេត្តបាត់ដំបង បានឲ្យដឹងកាលពីព្រឹកថ្ងៃទី៩ ខែមីនា ឆ្នាំ២០១៨ថា ផ្លូវនេះ នឹងត្រូវស្ថាបនាចេញពីចំណុចអក្សរT ក្នុងភូមិព្រៃធំ ឃុំកំពង់ល្ពៅ ស្រុកសំឡូត ភ្ជាប់ទៅផ្លូវជាតិលេខ៥៥ ត្រង់ចំណុចប្រម៉ោយ ក្នុងស្រុកវាលវែង ខេត្តពោធិ៍សាត់ ហើយបន្តឆ្ពោះទៅកាន់ខេត្តកោះកុង។ ផ្លូវជាតិនេះ នឹងត្រូវសាងសង់តាមគន្លងចាស់ផង និងត្រូវឈូសឆាយថ្មីផង ដែលត្រូវឆ្លងកាត់តំបន់ព្រៃភ្នំ មានប្រវែងជាង ១៩០គីឡូម៉ែត្រ៕
