កិច្ចប្រជុំលើកទី៤ គណៈកម្មាធិការដឹកនាំ (Steering Committee) នៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ ក្រោមឥណទានសម្បទានរបស់ធនាគារពិភពលោក (World Bank) ទីស្តីការក្រសួង៖ នារសៀលថ្ងៃចន្ទ ៨កើត ខែផល្គុន ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៧ ខែកុម្ភៈ ឆ្នាំ២០២៣ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ចូន រួមជាមួយ ឯកឧត្តម ស៊ឹម ស៊ីថា រដ្ឋលេខាធិការ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានអញ្ជើញជាសហអធិបតី ដឹកនាំកិច្ចប្រជុំលើកទី៤ គណៈកម្មាធិការដឹកនាំ (Steering Committee) នៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ ក្រោមឥណទានសម្បទានរបស់ធនាគារពិភពលោក (World Bank) ដោយមានការអញ្ជើញចូលរួមផងដែរពីសំណាក់ថ្នាក់ដឹកនាំ មន្ត្រីបច្ចេកទេសពាក់ព័ន្ធ និងសមាជិក សមាជិកានៃគណៈកម្មាធិការដឹកនាំ (Steering Committee)។ កិច្ចប្រជុំនាឱកាសនេះ ត្រូវបានរៀបចំឡើងក្នុងគោលបំណង ដើម្បីផ្តល់ឱកាសជូនអង្គភាពពាក់ព័ន្ធរាយការណ៍អំពីវឌ្ឍនភាពការងារ បញ្ហាប្រឈមនានា និងការពិភាក្សាកម្រិតគោលនយោបាយនៃការអនុវត្តគម្រោង ដែលជារួមមានដូចជា៖ (១)វឌ្ឍនភាព និងបញ្ហាប្រឈមរបស់អង្គភាពគ្រប់គ្រងសមាសភាគគម្រោង-១ (CMU-1) និង អង្គភាពគ្រប់គ្រងសមាសភាគគម្រោង-២ (CMU-2) (២) វឌ្ឍនភាពនៃការធ្វើបច្ចុប្បន្នភាពគោលនយោបាយជាតិស្តីពីការផ្គត់ផ្គង់ទឹកស្អាត និងអនាម័យ (៣) វឌ្ឍនភាពនៃការសិក្សាកំណត់តម្លៃសេវាទឹកកខ្វក់ (៤) កិច្ចពិភាក្សាលើកិច្ច និងដំណើរការរៀបចំការបញ្ចូលតម្លៃសេវាទឹកកខ្វក់ ទៅក្នុងវិក្កយបត្រទឹកស្អាត និង (៥) ការប្រើប្រាស់យន្តការគណៈកម្មាធិការដឹកនាំ (Steering Comittee) ដំណើរការអនុវត្តគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSIPP) សម្រាប់គម្រោងពន្លឿនការផ្គត់ផ្គង់ទឹកស្អាត និងអនាម័យក្នុងប្រទេសកម្ពុជា (WASAC)។ ជាលទ្ធផល អង្គភាពគ្រប់គ្រងគម្រោងរបស់ក្រសួងសាធារណការ និងដឹកជញ្ជូន រួមជាមួយ ក្រសួងសេដ្ឋកិច្ច និងហិរញ្ញវត្ថុ បានធ្វើបទបង្ហាញពីវឌ្ឍនភាពនៃការអនុវត្តគម្រោងនាពេលកន្លងមក និងឃើញថា ដោយកត្តាមូលហេតុជាច្រើន បានបណ្តាលឱ្យការអនុវត្តគម្រោងមានការយឺតយ៉ាវ ដែលត្រូវស្នើសុំពន្យារពេលអនុវត្តគម្រោងបន្ថែម។ ទន្ទឹមនឹងនេះ ផ្អែកតាមផែនការសកម្មភាពដែលបានធ្វើបច្ចុប្បន្នភាព យើងសង្ឃឹមថា ការអនុវត្តគម្រោងនឹងសម្រេចបានតាមគោលដៅដែលបានគ្រោងទុក។ អង្គប្រជុំយល់ស្របក្នុងការប្រើប្រាស់យន្តការគណៈកម្មាធិការដឹកនាំ (Steering Committee) របស់គម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) សម្រាប់ការអនុវត្តគម្រោងជំរុញការផ្គត់ផ្គង់ទឹកស្អាតនិងអនាម័យ (WASAC) ផងដែរ។ ចំពោះសំណូមពរលើកឡើងដោយតំណាងក្រសួងអភិវឌ្ឍន៍ជនបទ ស្តីពីការផ្គត់ផ្គង់ទឹកស្អាតជនបទក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ នឹងបន្តកិច្ចសហការ និងពិភាក្សាលើកិច្ចការងារនេះក្នុងចេតនារួមគ្នាដើម្បីសម្រេចបានគោលដៅរបស់រាជរដ្ឋាភិបាល នៅឆ្នាំ២០២៥ និងគោលដៅអភិវឌ្ឍន៍ដោយចីរភាព ឆ្នាំ២០៣០។ ក្នុងនាមក្រសួងសាធារណការ និងដឹកជញ្ជូន ដែលជាអង្គភាពកំពុងអនុវត្តគម្រោង WaSSIP ឯកឧត្តមរដ្ឋលេខាធិការ ប្រធានអង្គប្រជុំ បានថ្លែងអំណរគុណដល់ ឯកឧត្តម លោកជំទាវ លោក លោកស្រី សមាជិក សមាជិកាគណៈកម្មាធិការដឹកនាំគម្រោង ដែលបានចំណាយពេលវេលាចូលរួមក្នុងកិច្ចប្រជុំពិភាក្សានេះ ក៏ដូចជាបានចូលរួមផ្តល់មតិ និងអនុសាសន៍នានា ដ៏មានសារសំខាន់សម្រាប់ជួយគាំទ្រ និងជំរុញការអនុវត្តគម្រោងឱ្យកាន់តែមានប្រសិទ្ធភាព ចូលរួមដល់ការអភិវឌ្ឍវិស័យទឹកស្អាត និងអនាម័យ នៅកម្ពុជាឱ្យកាន់តែមានសន្ទុះទៅមុខ ដើម្បីឆ្លើយតបទៅនឹងតម្រូវការ និងស្ថានភាពអភិវឌ្ឍន៍របស់ប្រទេសជាតិ។ ទន្ទឹមនឹងនេះ ឯកឧត្តមរដ្ឋលេខាធិការ បានថ្លែងអំណរគុណដល់ធនាគារពិភពលោក ចំពោះការផ្តល់ហិរញ្ញប្បទានសម្រាប់ការអនុវត្តគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ និងសូមអរគុណដល់ ក្រសួងសេដ្ឋកិច្ច និងហិរញ្ញវត្ថុ ដែលបានគាំទ្រដល់ការអនុវត្តគម្រោងយ៉ាងពេញទំហឹងផងដែរ៕