[BTV] - ដើមខែមីនាក្រសួងសាធារណការរៀបចំពិព័រណ៍រថយន្ត និងលក់ដេញថ្លៃលេខពិសេសផ្ទាល់ខ្លួន
2023-02-25
ទៅកាន់ទំព័រចុះផ្សាយក្នុង BTV
ភ្នំពេញ៖ ថ្ងៃទី៧ និងទី៨ ខែមីនាខាងមុខនេះក្រសួងសាធារណការ និងដឹកជញ្ជូននឹងមានរៀបចំពិព័រណ៍រថយន្ត និងលក់ដេញថ្លៃលេខពិសេសផ្ទាល់ខ្លួន ដើម្បីកៀរគរថវិកាជួយដល់មន្ទីរពេទ្យគន្ធបុប្ផា និងមន្ទីរពេទ្យកុមារជាតិ។
មន្ត្រីក្រសួងសាធារណការ និងដឹកជញ្ជូនបានឱ្យដឹងថា នៅថ្ងៃទី៧ និងទី៨ ខែមីនា ឆ្នាំ២០២៣ ក្រសួងនឹងរៀបចំព្រឹត្តិការណ៍ដ៏អស្ចារ្យមួយដើម្បីអបអរសាទរខួប ៣ឆ្នាំលេខពិសេសផ្ទាល់ខ្លួន ព្រមទាំងមានការតាំងពិព័រណ៍ផ្លាកលេខ និងរថយន្ត ដោយមានការលក់ និងដេញថ្លៃលេខពិសេសផ្ទាល់ខ្លួនផងដែរ ដើម្បីកៀរគរថវិកាជួយដល់មន្ទីរពេទ្យគន្ធបុប្ផា និងមន្ទីរពេទ្យកុមារជាតិ។ ក្រសួងសាធារណការឱ្យដឹងដែរថា ព្រឹត្តិការណ៍នេះរៀបចំធ្វើឡើងនៅសួនច្បារវត្តបទុមវតី រាជធានីភ្នំពេញ ដោយចាប់ផ្ដើមម៉ោង ៨ព្រឹកដល់ម៉ោង ៩យប់។ កម្មវិធីនេះក៏មានការប្រគំតន្ដ្រីដែលផ្សារភ្ជាប់ទៅនឹងការផ្សព្វផ្សាយសុវត្ថិភាពចរាចរណ៍ និងលេងល្បែងកម្សាន្តផ្សេងៗដើម្បីទទួលបានវត្ថុអនុស្សាវរីយ ដោយសេរី និងឥតគិតថ្លៃ។
បើយោងតាមរបាយការណ៍ពីក្រសួងសាធារណការបានឱ្យថា នៅក្នុងឆ្នាំ២០២២ ការចុះបញ្ជីផ្លាកលេខពិសេសផ្ទាល់ខ្លួនមានចំនួន ៧.១២៥ផ្លាក ដោយបានចំណូល ៤៤ប៊ីលានរៀល និងការចុះបញ្ជីផ្លាកលេខពិសេសថ្នាក់រាជធានី-ខេត្តបាន ៣១.៧៥៦ផ្លាក និងបានចំណូលជាង ៤០ប៊ីលានរៀល។ ចាប់តាំងពីបើកដំណើរការចុះបញ្ជីផ្លាកលេខពិសេសផ្ទាល់ខ្លួនតាមប្រព័ន្ធស្វ័យប្រវត្តិកម្មនៅថ្ងៃទី០៧ ខែមករា ឆ្នាំ២០២០ មកដល់ដំណាច់ខែធ្នូ ឆ្នាំ២០២២ កន្លងទៅនេះ គណៈកម្មការអន្តរក្រសួងចុះបញ្ជីបាន ១៦.១៣២ផ្លាក និងទទួលបានចំណូលជាង ១១៤ប៊ីលានរៀល៕
