កិច្ចប្រជុំស្តីពីវិធានការកែលម្អប្រព័ន្ធរំដោះទឹកភ្លៀងតាមបណ្តោយផ្លូវជាតិលេខ៤ សិ្ថតក្នុងភូមិសាស្ត្រ រាជធានីភ្នំពេញ ខេត្តកណ្តាល និងខេត្តកំពង់ស្ពឺ ទីស្តីការក្រសួង៖ ថ្ងៃសុក្រ ១២រោច ខែមាឃ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី១៧ ខែកុម្ភៈ ឆ្នាំ២០២៣ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន និងឯកឧត្តម យិត ប៊ុណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជាសហប្រធានដឹកនាំកិច្ចប្រជុំ ស្តីពីវិធានការកែលម្អប្រព័ន្ធរំដោះទឹកភ្លៀងតាមបណ្តោយផ្លូវជាតិលេខ៤ សិ្ថតក្នុងភូមិសាស្ត្ររាជធានីភ្នំពេញ ខេត្តកណ្តាល និងខេត្តកំពង់ស្ពឺ ដោយមានការអញ្ជើញចូលរួមពីថ្នាក់ដឹកនាំក្រសួងទទួលបន្ទុក ឯកឧត្តម សួន ភារិទ្ធ អគ្គនាយក នៃអគ្គនាយកដ្ឋានប្រព័ន្ធចម្រោះទឹកកខ្វក់ តំណាងអគ្គនាយកដ្ឋានសាធារណការ តំណាងអគ្គនាយកដ្ឋានបច្ចេកទេស និងក្រុមការងារបច្ចេកទេសផ្លូវថ្នល់ និងប្រព័ន្ធរំដោះទឹកភ្លៀង-ទឹកកខ្វក់ផងដែរ។ អង្គប្រជុំបានពិភាក្សាអំពីលទ្ធផលនៃការសិក្សាបឋមទាក់ទងនឹងគំនូសប្លង់បច្ចេកទេស ទំហំការងារ និងវិធីសាស្ត្រសាងសង់សម្រាប់គម្រោងកែលម្អប្រព័ន្ធរំដោះទឹកភ្លៀង និងទឹកកខ្វក់ និងការជួសជុលលើកកម្ពស់កម្រិតគុណភាពកំណាត់ផ្លូវជាតិលេខ៤ ស្ថិតក្នុងភូមិសាស្ត្ររាជធានីភ្នំពេញ។ ថ្លែងទៅកាន់អង្គប្រជុំនាឱកាសនោះ ឯកឧត្តមសហប្រធានបានថ្លែងអំណរគុណដល់ក្រុមការងារបច្ចេកទេសផ្លូវថ្នល់ និងប្រព័ន្ធរំដោះទឹកភ្លៀង-ទឹកកខ្វក់ ដែលបានខិតខំប្រឹងប្រែង និងប្តេជ្ញាចិត្តខ្ពស់ក្នុងការអនុវត្តការសិក្សាគម្រោងខាងលើបានឆាប់រហ័សប្រកបដោយការទទួលខុសត្រូវខ្ពស់ រហូតសម្រេចបានលទ្ធផលបឋម អាចយកមកពិភាក្សាបន្ថែម ដើម្បីសម្រេចផែនការដែលបានគ្រោងទុក។ ជាទីបញ្ចប់ ឯកឧត្តមសហប្រធាន បានជំរុញលើកទឹកចិត្តឱ្យក្រុមការងារពន្លឿនការសាងសង់ហេដ្ឋារចនាសម្ព័ន្ធប្រព័ន្ធរំដោះទឹកភ្លៀង-ទឹកកខ្វក់ និងហេដ្ឋារចនាសម្ព័ន្ធផ្លូវថ្នល់ឱ្យបានឆាប់រហ័ស និងមានភាពល្អប្រសើរ ដើម្បីឆ្លើយតបនឹងការអភិវឌ្ឍយ៉ាងឆាប់រហ័សរបស់ប្រទេសកម្ពុជា និងបានសំណូមពរឱ្យគ្រប់ អង្គភាពពាក់ព័ន្ធបន្តរួបរួមបំពេញកាតព្វកិច្ចការងារប្រកបដោយការទទួលខុសត្រូវច្បាស់លាស់ ដើម្បីសម្រេចគោលដៅ ដែលបានព្រមព្រៀងក្នុងផែនការរំពឹងទុក ធានាបានប្រសិទ្ធភាព និងប្រកបដោយចីរភាពផងដែរ៕