ឯកសារគណបក្សសំខាន់ៗចំនួន៣ ត្រូវបានលើកក្នុងកិច្ចប្រជុំពេញអង្គ នៃគណៈកម្មាធិការគណបក្សក្រសួងសាធារណការ និងដឹកជញ្ជូន ភ្នំពេញ៖ ថ្ងៃចន្ទ ៥រោច ខែមាឃ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី១០ ខែកុម្ភៈ ឆ្នាំ២០២៣ ឯកឧត្តម តូច ចាន់កុសល អនុប្រធានគណៈកម្មាធិការគណបក្សក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ ឯកឧត្តមទេសរដ្ឋមន្ត្រី ស៊ុន ចាន់ថុល ប្រធានគណៈកម្មាធិការគណបក្សក្រសួង បានដឹកនាំកិច្ចប្រជុំពេញអង្គ នៃគណៈកម្មាធិការគណបក្សក្រសួងសាធារណការ និងដឹកជញ្ជូន ដោយមានការអញ្ជើញចូលរួមពី ថ្នាក់ដឹកនាំជាសមាជិក នៃគណៈកម្មាធិការគណបក្សក្រសួង។ អង្គប្រជុំ បានពិភាក្សាលើដំណោះស្រាយ និង សំណូមពរនានាទាក់ទងនឹងអត្តសញ្ញាណបណ្ណរបស់ប្រជាពលរដ្ឋមានឈ្មោះបោះឆ្នោតនៅមូលដ្ឋាន និងការប្រកាសសុពលភាពសមាសភាពបន្ថែមគណៈចលនាមហាជន ពិនិត្យនិងអនុម័តលើការបង្កើត និងតែងតាំងគណៈកម្មាធិការគណបក្សមូលដ្ឋានថ្មី និងការផ្សព្វផ្សាយការងារឃោសនាអប់រំប្រចាំខែរួមមាន ១) របាយការណ៍ស្តីពីលទ្ធផលនៃការអនុវត្តកម្មវិធីនយោបាយរបស់គណបក្សពីឆ្នាំ២០១៨ ដល់ឆ្នាំ២០២២ និងទិសដៅឆ្នាំ២០២៣ ២) កម្មវិធីនយោបាយរបស់គណបក្សប្រជាជនកម្ពុជាសម្រាប់ការកសាង និងការពារមាតុភូមិឆ្នាំ២០២៣-២០២៨ ៣) គណបក្ស ប្រជាជនកម្ពុជាការពារ និងលើកស្ទួយផលប្រយោជន៍របស់ប្រជាជន។ ថ្លែងទៅកាន់អង្គប្រជុំនាឱកាសនោះ ឯកឧត្តមប្រធានអង្គប្រជុំ បានគូសបញ្ជាក់ថា៖ ដើម្បីទទួលបានជោគជ័យក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៧ នៃរដ្ឋសភា នៅថ្ងៃទី២៣ ខែកក្កដា ឆ្នាំ២០២៣ ខាងមុខ ក្រុមការងារគណបក្សចុះមូលដ្ឋានស្រុក ឃុំ សង្កាត់ទាំងអស់ត្រូវប្រជុំជាទៀងទាត់ ដើម្បីក្ដាប់បាននូវបញ្ហាប្រឈម សំណូមពរ ក្តីកង្វល់នានា និងរកដំណោះស្រាយឱ្យបានទាន់ពេលវេលា ពិសេសត្រូវជួយសម្រួលបញ្ហាអត្តសញ្ញាណប្រជាពលរដ្ឋដែលមានឈ្មោះបោះឆ្នោត។ ឯកឧត្តមប្រធានអង្គប្រជុំ ក៏បានណែនាំផងដែរឱ្យផ្សព្វផ្សាយឯកសារគណបក្ស ចំនួន៣ រួមមាន៖ ១) របាយការណ៍ស្តីពីលទ្ធផលនៃការអនុវត្តកម្មវិធីនយោបាយរបស់គណបក្សពីឆ្នាំ២០១៨ ដល់ឆ្នាំ២០២២ និងទិសដៅឆ្នាំ២០២៣។ ២) កម្មវិធីនយោបាយរបស់គណបក្សប្រជាជនកម្ពុជាសម្រាប់ការកសាង និងការពារមាតុភូមិឆ្នាំ២០២៣-២០២៨ ៣) គណបក្សប្រជាជនកម្ពុជា ការពារ និងលើកស្ទួយផលប្រយោជន៍របស់ប្រជាជន។ ឆ្លៀតក្នុងឱកាសនោះដែរ ឯកឧត្តម បានថ្លែងអំណរគុណយ៉ាងជ្រាលជ្រៅចំពោះ ថ្នាក់ដឹកនាំជាសមាជិក ក្រុមការងារ ដែលបានចូលរួមក្នុងកិច្ចប្រជុំនេះ និងបានស្នើឱ្យមានការប្រជុំទៀងទាត់ដើម្បីទទួលបានព័ត៌មានថ្មីៗរបស់បក្សសម្រាប់ផ្សព្វផ្សាយបន្តឱ្យបានទូលំទូលាយថែមទៀត។ ជាមួយគ្នានោះផងដែរ អង្គប្រជុំបានអនុម័តបង្កើត និងតែងតាំងសមាសភាពគណៈកម្មាធិការគណបក្សមូលដ្ឋាន នៃអគ្គនាយកដ្ឋានបច្ចេវិទ្យា និងទំនាក់ទំនងសាធារណៈ៕