[Phnom Penh Post] - លោកនាយករដ្ឋមន្ត្រី ហ៊ុន សែន ស្នើក្រុមហ៊ុនចិនសិក្សាពីគម្រោងវិនិយោគផ្លូវល្បឿនលឿន ពីភ្នំពេញទៅអាកាសយានដ្ឋានអន្តរជាតិភ្នំពេញថ្មី
2023-02-10
ទៅកាន់ទំព័រចុះផ្សាយក្នុង Phnom Penh Post
ភ្នំពេញៈ លោកនាយករដ្ឋមន្ត្រី ហ៊ុន សែន ស្នើក្រុមហ៊ុនចិនសិក្សាពីគម្រោងវិនិយោគផ្លូវល្បឿនលឿនធន់ស្រាល ពីរាជធានីភ្នំពេញទៅកាន់អាកាសយានដ្ឋានអន្តរជាតិភ្នំពេញថ្មី និងផ្លូវរថភ្លើងល្បឿនលឿនធន់ស្រាលក្នុងរាជធានីភ្នំពេញ។
លោកស្នើដូច្នេះក្នុងជំនួបជាមួយតំណាងក្រុមហ៊ុនធំៗចំនួន ៣ របស់ប្រទេសចិន ដែលរួមមាន ក្រុមហ៊ុនសាជីវកម្មស្ពានថ្នល់ចិន ក្រុមហ៊ុន Beijing Urban Construction Group និងក្រុមហ៊ុន China Metro Group កាលពីថ្ងៃទី ៩ ខែកុម្ភៈ ក្នុងឱកាសលោកបំពេញទស្សនកិច្ចនៅទីក្រុងប៉េកាំងចំនួន ៣ ថ្ងៃពីថ្ងៃទី ៩-១១ ខែកុម្ភៈ។
គេហទំព័រលោកនាយករដ្ឋមន្ត្រី ហ៊ុន សែន បញ្ជាក់នាថ្ងៃទី ៩ ខែកុម្ភៈថា ក្រុមហ៊ុនទាំង ៣ បានចាប់អារម្មណ៍បន្តវិនិយោគលើការសាងសង់ហេដ្ឋារចនាសម្ព័ន្ធគមនាគមន៍នៅក្នុងប្រទេសកម្ពុជា បន្ទាប់ពីក្រុមហ៊ុនទាំងនោះបានវិនិយោគលើការសាងសង់ផ្លូវស្ពានប្រមាណជាង ២ ពាន់គីឡូម៉ែត្រ ក្នុងប្រទេសកម្ពុជា នារយៈពេលកន្លងមក។
គេហទំព័រដដែលបញ្ជាក់ថា៖ «ទាក់ទិនទៅនឹងការវិនិយោគផ្លូវរថភ្លើងល្បឿនលឿនធន់ស្រាល សម្តេចតេជោនាយករដ្ឋមន្ត្រីបានស្នើឱ្យក្រុមហ៊ុន China Metro Group Limited សិក្សាពីគម្រោងវិនិយោគផ្លូវល្បឿនលឿនធន់ស្រាល ពីរាជធានីភ្នំពេញទៅកាន់អាកាសយានដ្ឋានអន្តរជាតិភ្នំពេញថ្មី និងផ្លូវរថភ្លើងល្បឿនលឿនធន់ស្រាលក្នុងរាជធានីភ្នំពេញ ដែលកំពុងមានចរាចរណ៍យ៉ាងមមាញឹក»។
ប្រភពដដែលបន្តថា ក្រុមហ៊ុនវិនិយោគទាំង ៣ របស់ប្រទេសចិន ក៏បានប្រាប់លោក ហ៊ុន សែន ពីគម្រោងសិក្សាលើលទ្ធភាពវិនិយោគថ្មីៗ ក្នុងប្រទេសកម្ពុជាសម្រាប់ពេលខាងមុខ ពិសេសក្រោយដំណើរទស្សនកិច្ចរបស់លោកទៅកាន់ទីក្រុងប៉េកាំងនេះ។
ក្រុមហ៊ុនចិនទាំង ៣ ក៏បានជម្រាបប្រាប់លោក ហ៊ុន សែន ថា ការសាងសង់ និងដាក់ឱ្យប្រតិបត្តិផ្លូវល្បឿនលឿន ភ្នំពេញ-ក្រុងបាវិត ខេត្តស្វាយរៀង ត្រូវបានរៀបចំឡើងក្រោមកិច្ចសន្យាភាពជាដៃគូ រវាងរដ្ឋ និងឯកជន (PPP) ដើម្បីឈានទៅអនុវត្តគម្រោងសាងសង់ផ្លូវល្បឿនលឿនភ្នំពេញ-ក្រុងបាវិត នៅពាក់កណ្តាលឆ្នាំ ២០២៣ និងគ្រោងបញ្ចប់នៅឆ្នាំ ២០២៧។
ក្រុមហ៊ុនវិនិយោគចិនទាំងនោះប្រាប់លោក ហ៊ុន សែន អំពីការវិនិយោគលើការដឹកជញ្ជូនផ្លូវទឹកសាប ការវិនិយោគលើការចម្រាញ់ទឹកកខ្វក់នៅខេត្តព្រះសីហនុ និងការសិក្សាពីផ្លូវរថភ្លើងល្បឿនលឿនភ្នំពេញ-ប៉ោយប៉ែត ខេត្តបន្ទាយមានជ័យ និងគម្រោងនៃការវិនិយោគផ្លូវរថភ្លើងល្បឿនលឿនធន់ស្រាល ពីខេត្តសៀមរាបទៅកាន់អាកាសយានដ្ឋានអន្តរជាតិថ្មី នៅជីក្រែង ក្នុងខេត្តសៀមរាប។
ក្រុមហ៊ុនចិន បន្តប្រាប់លោក ហ៊ុន សែន អំពីការបញ្ចប់ការសិក្សាសមិទ្ធិលទ្ធភាពគម្រោងសាងសង់ផ្លូវរថភ្លើងក្រោមដី នៅរាជធានីភ្នំពេញ និងបានដាក់បញ្ចូននូវរបាយការណ៍សិក្សាជូនក្រសួងសាធារណការ និងដឹកជញ្ជូន ដើម្បីពិនិត្យ និងពិភាក្សាបន្ត។
ក្រុមហ៊ុនចិនក៏បានប្រាប់លោកទៀតអំពីគម្រោងដឹកជញ្ជូនផ្លូវទឹក និងកំពង់ផែ ដែលក្នុងនោះក្រុមហ៊ុនបានបញ្ចប់ការសិក្សាបឋមគម្រោងស្តារផ្លូវទឹកទន្លេសាប ភ្នំពេញ-សៀមរាប ដែលបានប្រគល់ជូនក្រសួងសាធារណការ និងដឹកជញ្ជូនរួចរាល់។
ក្រុមហ៊ុនក៏បានប្រាប់លោក ហ៊ុន សែន អំពីគម្រោងអភិវឌ្ឍន៍ប្រព័ន្ធទឹកកខ្វក់ ក្នុងនោះបាននិងកំពុងសិក្សាផែនការមេ និងលទ្ធភាពដំបូង សម្រាប់អភិវឌ្ឍន៍ហេដ្ឋារចនាសម្ព័ន្ធបណ្តាញលូសំណង់ស្ថានីយប្រព្រឹត្តិកម្មទឹកកខ្វក់ នៅក្រុងខេមរភូមិន្ទ ខេត្តកោះកុង ក្រុងបាត់ដំបង ខេត្តបាត់ដំបង និងក្រុងកំពង់ចាម ខេត្តកំពង់ចាម។
ក្រុមហ៊ុនទាំង ៣ ក៏បានប្រាប់លោកទៀត អំពីការជួយសាងសង់អគារ «វិទ្យាស្ថានសម្តេចតេជោសែន សាធារណការ និងដឹកជញ្ជូន» ១ ខ្នង កម្ពស់ ៤ ជាន់ ដែលរួមមានបន្ទប់សិក្សា ការិយាល័យរដ្ឋបាល មន្ទីរពិសោធន៍ និងការបំពាក់សម្ភារសិក្សា និងឧបករណ៍បច្ចេកទេសពិសោធន៍ទំនើបៗ ដែលបានចំណាយថវិកាសរុបប្រមាណ ២,៥ លានដុល្លាអាមេរិក។
គេហទំព័រដដែលបញ្ជាក់ថា ក្រុមហ៊ុនសាជីវកម្មស្ពាន និងថ្នល់ចិន ក៏បានផ្តល់ថវិកាប្រមាណ ២ លានដុល្លាអាមេរិក ដើម្បីជួយសាងសង់អគារ «មន្ទីរពេទ្យតេជោសែន កោះធំ» ស្រុកកោះធំ ខេត្តកណ្តាល។ ក្រុមហ៊ុនចិនទាំង ៣ ក៏បានសុំការគាំទ្រពីលោក ហ៊ុន សែន ចំពោះការវិនិយោគលើហេដ្ឋារចនាសម្ព័ន្ធដែលក្រុមហ៊ុនបានសិក្សារួច ដើម្បីឱ្យគម្រោងទាំងនោះប្រព្រឹត្តទៅដោយជោគជ័យបំផុត៕
