រហូតមកទល់ពេលនេះ សាងសង់ស្ពានបេតុងខ្សែកាប ដែលតភ្ជាប់ពីកោះពេជ្រ ឆ្លងកាត់ទន្លេបាសាក់ ទៅគម្រោងអភិវឌ្ឍន៍កោះនរា សម្រេចការសាងសង់បានជាង ៥០ ភាគរយហើយ។ អគ្គនាយករងក្រុមហ៊ុន OCIC លោក ទូច សំណាង បានថ្លែងប្រាប់ទស្សនាវដ្តីសំណង់និងអចលនទ្រព្យនាព្រឹកថ្ងៃទី០៦ ខែកុម្ភះ ឆ្នាំ ២០២៣ ថាការសាងសង់ស្ពានភ្ជាប់ពីកោះពេជ្រទៅកាន់កោះនរាកំពុងដំណើរការយ៉ាងរលូនទៅតាមផែនការ​ដែលបានគ្រោងទុក ដោយគិតរហូតមកទល់នឹងពេលនេះ គម្រោងនេះសម្រេចបានប្រហែលជា ៥០ ភាគរយហើយ ដោយការងារធំៗ និងពិបាកៗត្រូវបានបញ្ចប់ និងដោះស្រាយរួចរាល់ហើយ នៅតែបន្តការងារមួយចំនួនផ្សេងទៀតតែប៉ុណ្ណោះ។ ស្ពានមួយនេះ មានទីតាំងស្ថិតនៅក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ ក្រោមទុនវិនិយោគតម្លៃ ៣៨លានដុល្លារអាមេរិក និងត្រូវបានសាងសង់ដោយក្រុមហ៊ុនវិនិយោគទុនអណិកជនកម្ពុជា (OCIC) ក្រោមការគ្រប់គ្រងរបស់រដ្ឋបាលរាជធានីភ្នំពេញ។