កិច្ចប្រជុំពិនិត្យ និងពិភាក្សាអំពីវឌ្ឍនភាពគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ ស្ថិតក្រោមឥណទានសម្បទានរបស់ធនាគារពិភពលោក គម្រោងមួយចំនួនរបស់ដៃគូអភិវឌ្ឍន៍នានាដែលបាននិងកំពុងអនុវត្ត និងបទបង្ហាញអំពីលទ្ធផលការសិក្សាសមិទ្ធលទ្ធភាពលើការអភិវឌ្ឍប្រព័ន្ធទឹកកខ្វក់ក្នុងក្រុងសៀមរាប ខេត្តសៀមរាប សៀមរាប៖ ថ្ងៃអង្គារ ១១ រោច ខែបុស្ស ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី១៧ ខែមករា ឆ្នាំ២០២៣ ឯកឧត្ដម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ ឯកឧត្តមទេសរដ្ឋមន្ត្រី ស៊ុន ចាន់ថុល និងឯកឧត្ដម ពិន ប្រាកដ តំណាងដ៏ខ្ពង់ខ្ពស់ឯកឧត្តមអភិបាល នៃគណៈអភិបាលខេត្តសៀមរាប និងជាអភិបាលរង បានអញ្ជើញជាសហប្រធានដឹកនាំកិច្ចប្រជុំពិនិត្យ និងពិភាក្សាអំពីវឌ្ឍនភាពគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ ស្ថិតក្រោមឥណទានសម្បទានរបស់ធនាគារពិភពលោក គម្រោងមួយចំនួនរបស់ដៃគូអភិវឌ្ឍន៍នានាដែលបាននិងកំពុងអនុវត្ត និងបទបង្ហាញអំពីលទ្ធផលការសិក្សាសមិទ្ធលទ្ធភាពលើការអភិវឌ្ឍប្រព័ន្ធទឹកកខ្វក់ក្នុងក្រុងសៀមរាប ខេត្តសៀមរាប ពីដៃគូអភិវឌ្ឍន៍មួយចំនួនរួមមាន៖ ក្រសួងដែនដី ហេដ្ឋារចនាសម្ព័ន្ធ និង ដឹកជញ្ជូន ជប៉ុន(MLIT Japan) ធនាគារអភិវឌ្ឍន៍អាស៊ី និងមូលនិធិEDCF Korea ដែលកំពុងអនុវត្ត និងសិក្សា ដោយមានការអញ្ជើញចូលរួមពីថ្នាក់ដឹកនាំក្រសួង នាយកគម្រោង ប្រធាន-អនុប្រធានមន្ទីរ អង្គភាពពាក់ព័ន្ធ លោក-លោកស្រីចៅសង្កាត់ តំណាងក្រុមហ៊ុនសាងសង់ និងក្រុមហ៊ុនទីប្រឹក្សាបច្ចេកទេស សរុបប្រមាណជាង ៥០រូប។ បទបង្ហាញរបស់តំណាងអង្គភាពគ្រប់គ្រងគម្រោងនីមួយៗរបស់ក្រសួងសាធារណការ និងដឹកជញ្ជូន បានផ្តោតជាសំខាន់លើការចែករំលែកព័ត៌មាន សាវតា ទំហំការងារ វឌ្ឍនភាពនៃការសិក្សា និងការអភិវឌ្ឍគម្រោង ព្រមទាំងចំនុចខ្វះខាត បញ្ហាប្រឈមមួយចំនួន និងមានការចូលរួមសួរ-ឆ្លើយ ផ្តល់មតិយោបល់យ៉ាងផុសផុល។ ថ្លែងក្នុងឱកាសនោះ ឯកឧត្តមប្រធានអង្គប្រជុំ បានវាយតម្លៃខ្ពស់ចំពោះកិច្ចសហការល្អ និងការគាំទ្រពី រដ្ឋបាលខេត្ត និងអាជ្ញាធរពាក់ព័ន្ធ ទៅតាមដំណាក់កាលវដ្តនៃគម្រោង និងអង្គភាពគ្រប់គ្រងគម្រោង និងបានផ្តល់អនុសាសន៍ណែនាំឱ្យក្រុមការងារពាក់ព័ន្ធទាំងអស់សហការគ្នាឱ្យបានជិតស្និទ្ធបន្ថែមទៀត ជាពិសេស ចែករំលែកផែនការគម្រោងអភិវឌ្ឍន៍នៃអង្គភាពគ្រប់គ្រងគម្រោងឱ្យគ្នាទៅវិញទៅមក ដើម្បី។ កាត់បន្ថយនូវចំនុចឆកល្វែង និងភាពមិនច្បាស់លាស់ ព្រមទាំងគ្រប់គ្រងគម្រោងនីមួយៗឱ្យបានល្អ ដើម្បីធានាដល់ការអនុវត្តគម្រោងប្រព្រឹត្តទៅដោយរលូន។ បន្ថែមពីលើនេះ ឯកឧត្តមក៏បានណែនាំឱ្យ អង្គភាពគ្រប់គ្រងគម្រោងចុះពិនិត្យដល់ទីតាំងគម្រោងដែលមានបញ្ហា និងពិភាក្សាជាមួយភាគីពាក់ព័ន្ធ ដើម្បីឈានដល់ការសម្រេចគោលបំណងគម្រោង។ ជាមួយគ្នានោះ ឯកឧត្ដមរដ្ឋលេខាធិការប្រធានអង្គប្រជុំ បានជំរុញលើកទឹកចិត្តឱ្យភាគីពាក់ព័ន្ធទាំងអស់ ខិតខំប្រឹងប្រែងបំពេញការងារឱ្យអស់ពីសមត្ថភាព ប្រកបដោយប្រសិទ្ធភាព និងតម្លាភាព និងរិះរកគ្រប់មធ្យោបាយ និងយុទ្ធសាស្ត្រ ដើម្បីបន្តអនុវត្តវឌ្ឍនភាពគម្រោង ដែលកំពុងមានភាពល្អប្រសើរ និងឯកភាព ដោយគ្រប់ភាគីពាក់ព័ន្ធ៕