" កម្ពុជាមានសន្តិភាពពេញលេញ ហេតុនេះយើងទាំងអស់គ្នាត្រូវរួបរួមថែរក្សាការពារឱ្យបានគង់វង់ស្ថិតស្ថេរ " ប្រសាសន៍ ឯកឧត្តមទេសរដ្ឋមន្ត្រី ស៊ុន ចាន់ថុល ក្នុងពិធីអបអរសាទរខួបអនុស្សាវរីយ៍លើកទី៤៤ នៃទិវាជ័យជម្នះ ៧ មករា (៧.មករា.១៩៧៩-៧.មករា.២០២៣) នៅស្រុកកោះធំ ខេត្តកណ្តាល ព្រឹកថ្ងៃអាទិត្យ ២រោច ខែបុស្ស ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី ៨ ខែ មករា ឆ្នាំ ២០២៣ ឯកឧត្តមទេសរដ្ឋមន្ត្រី​ ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងជាសមាជិកគណៈកម្មាធិការកណ្តាលគណបក្សប្រជាជនកម្ពុជា ព្រមទាំងជាប្រធានគណៈអចិន្ត្រៃយ៍ក្រុមការងារគណបក្សចុះមូលដ្ឋានស្រុកកោះធំ បានអញ្ជើញជាអធិបតីក្នុងពិធី អបអរសាទរខួបអនុស្សាវរីយ៍លើកទី៤៤ នៃទិវាជ័យជម្នះ ៧ មករា (៧.មករា.១៩៧៩-៧.មករា.២០២៣) ដែលធ្វើឡើងនៅសាលាស្រុកកោះធំ ខេត្តកណ្តាល ដោយមានការចូលរួមពីថ្នាក់ដឹកនាំ មន្ត្រីរាជការ សមាជិក សមាជិការក្រុមការងារគណបក្ស ចុះមូលដ្ឋានស្រុកកោះធំ អាជ្ញាធរមានសមត្ថកិច្ចក្នុងមូលដ្ឋានស្រុក លោកគ្រូអ្នកគ្រូ សិស្សានុសិស្ស និងបងប្អូនប្រជាពលរដ្ឋ សរុបប្រមាណ ៦០៩នាក់។ ថ្លែងនៅក្នុងពិធីនោះ ឯកឧត្ដមទេសរដ្ឋមន្ត្រី បានរំលឹកឡើងវិញ នូវរបបកម្ពុជាប្រជាធិបតេយ្យ (របបប៉ុលពត) ដែលបានធ្វើទារុណកម្ម និងកាប់សម្លាប់ប្រជាជនខ្មែរអស់រាប់លាននាក់ ព្រមទាំងបានបំផ្លិចបំផ្លាញហេដ្ឋារចនាសម្ព័ន្ធសង្គម ដោយបានប្រែក្លាយទីវត្តអារាម សាលារៀន និងមន្ទីរពេទ្យទៅជាមន្ទីរឃុំឃាំង ព្រមទាំងបានធ្វើឱ្យខឿនសេដ្ឋកិច្ចជាតិទាំងមូល ត្រូវធ្លាក់ចុះយ៉ាងខ្លាំង ក្នុងរបប ៣ឆ្នាំ ៨ខែ ២០ថ្ងៃ គឺដល់ចំណុចសូន្យ ។ ឯកឧត្ដមទេសរដ្ឋមន្ត្រី ក៏បានគូសបញ្ជាក់ផងដែរថា៖ កម្ពុជាយើងសព្វថ្ងៃបានទទួលសុខសន្តិភាព និងស្ថិរភាពនយោបាយពេញលេញហើយ ដោយយើងទាំងអស់គ្នាបានចាប់ផ្តើមធ្វេីឱ្យមានការអភិវឌ្ឍឡើងវិញចាប់តាំងពីបាតដៃទទេររហូតមកដល់ពេលឥឡូវនេះ មានការរីកចម្រើនគ្រប់វិស័យ ពិសេសសមិទ្ធផលវិស័យហេដ្ឋរចនាសម្ព័ន្ធផ្លូវថ្នល់ ស្ពាន តួយ៉ាងមានស្ពានឆ្លងកាត់ទន្លេនៅស្រុកកោះធំ ស្ពានព្រែកជ្រៃ ផ្លូវជាតិលេខ២១ ផ្លូវបេតុងរាប់សិបខ្សែក្នុងភូមិឃុំ ការដាក់អំពូលភ្លើងបំភ្លឺតាមភូមិរាប់ពាន់ដើមនៅស្រុកកោះធំនេះ និងថ្មីៗនេះទៀតបានកំពុងសាងសង់នូវអគារមន្ទីរពេទ្យតេជោសែនកោះធំ ដ៏ស្កឹមស្កៃបែបស្តង់ដារអន្តជាតិ ដែលកំពុងលេចចេញជារូបរាងឡើង បូករួមទាំងបណ្តាញផ្លូវជាតិ ផ្លូវខេត្ត ផ្លូវល្បឿនលឿន តាមបណ្តាស្រុក ខេត្តផ្សេងៗទៀត ។ល។ ជាមួយនោះក៏បានបង្កើតការងារធ្វើជូនប្រជាពលរដ្ឋទៅតាមចំណេះ ជំនាញ នេះជាសមិទ្ធផលកើតឡើង ដោយសារការខិតខំរបស់គណបក្សប្រជាជនកម្ពុជា ក្រោមការដឹកនាំដ៏ឈ្លាសវៃរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ នាឱកាសនោះ ឯកឧត្ដមទេសរដ្ឋមន្ត្រី បានផ្ដាំផ្ញើឱ្យបងប្អូនប្រជាពលរដ្ឋគ្រប់រូបនាំគ្នាទៅ បោះឆ្នោតឱ្យបានគ្រប់ៗគ្នា និងជួយពន្យល់បន្តដល់បងប្អូន ឪពុកម្ដាយ សាច់ញាតិ មិត្តភក្ដិរបស់ខ្លួននៅស្រុកកោះធំ ឱ្យបោះឆ្នោតជូនគណបក្សប្រជាជនកម្ពុជា ដើម្បីការអភិវឌ្ឍប្រកបដោយចិរភាព ក៏ដូចជាបង្ហាញអន្តរជាតិឱ្យឃើញពីការរួបរួមជាតិ ប្រជាធិបតេយ្យ សេរីពហុបក្ស និងការគោរពសិទ្ធិមនុស្សនៅកម្ពុជា ផងដែរ។ ជាចុងក្រោយ ឯកឧត្ដមទេសរដ្ឋមន្រី បានអំពាវនាវឱ្យប្រជាពលរដ្ឋទាំងអស់រួបរួម សាមគ្គីគ្នាជាធ្លុងមួយ កុំជឿតាមការញុះញង់ពីសំណាក់ពួកជនអគតិ គ្មានសីលធម៌ ដែលតែងតែបំភិតបំភ័យ និងភូតភរ គ្រប់រូបភាព។ ទន្ទឹមនោះ ឯកឧត្តម បានសំណូមពរឱ្យប្រជាពលរដ្ឋនៅស្រុកកោះធំ ក៏ដូចជាប្រជាពលរដ្ឋទូទាំងប្រទេសសូមនាំគ្នាទៅបោះឆ្នោតជ្រើសតាំងតំណាងរាស្ត្រនីតិកាល៧ ដែលនឹងប្រព្រឹត្តទៅនាថ្ងៃទី២៣ ខែកក្កដា ឆ្នាំ២០២៣ ឱ្យបានគ្រប់ៗគ្នា កុំបីខានហើយនៅពេលអញ្ជើញទៅបោះឆ្នោតបងប្អូនត្រូវពិចារណាឱ្យបានច្បាស់លាស់ ត្រូវដឹងថាគណបក្សណាដែលធ្វើឱ្យកម្ពុជាមានសន្តិភាពដូចសព្វថ្ងៃ គណបក្សណាបានធ្វើឱ្យមានការអភិវឌ្ឍរីកចម្រើន ដោយបានសាងសង់នូវហេដ្ឋារចនាសម្ព័ន្ធផ្លូវថ្នល់ ស្ពាន សាលារៀន វត្តអារាម មន្ទីរពេទ្យ ជាប្រយោជន៍ជូនបងប្អូនរាល់ថ្ងៃ និងបានជូនពរដល់អ្នកចូលរួមក្នុងអង្គពិធី ឱ្យទទួលបានសេចក្តីសុខ សុវត្ថិភាពក្នុងការធ្វើដំណើរជិតឆ្ងាយ ដោយត្រូវចូលរួមគោរពច្បាប់ចរាចរណ៍ឱ្យបានគ្រប់ៗគ្នា និងបានសមប្រកបជួបនូវពុទ្ធពរទាំង៤ ប្រការគឺ ៖ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ៕