ពិធីសំណេះសំណាលជាមួយសមាជិក សមាជិកា ក្រុមអាជីវកម្ម នៃក្រុមការងារ ស.ស.យ.ក វិស័យសាធារណការ និងដឹកជញ្ជូន ភ្នំពេញ៖ ថ្ងៃអង្គារ ៥រោច ខែមិគសិរ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៣ ខែធ្នូ ឆ្នាំ២០២២ លោក ឈួន វិន ប្រធានក្រុមការងារ ស.យ.ក.យ វិស័យសាធារណការ និងដឹកជញ្ជូន អញ្ជើញសំណេះសំណាលជាមួយ សមាជិក សមាជិកា តាមបណ្ដាផែនចំណុះ របស់ក្រុមអាជីវកម្ម នៃក្រុមការងារ ស.ស.យ.ក ក្នុងវិស័យ ចំនួនប្រមាណជាង៤០រូប ក្នុងនោះដែរក៏មានការអញ្ជើញចូលរួមដោយ លោក លោកស្រី ជាអនុប្រធានក្រុមការងារក្នុងវិស័យផងដែរ។ ពិធីនេះធ្វើឡើងក្នុងគោលបំណងដើម្បីផ្សព្វផ្សាយ និងចែករំលែកលទ្ធផលការងារ ដែលបានអនុវត្តកន្លងទៅ និងដើម្បីបង្កើននូវភាពស្និតស្នាល រវាងថ្នាក់ដឹកនាំ ជាមួយសមាជិក សមាជិកា។ ថ្លែងសំណេះសំណាលក្នុងពិធីនោះ លោកប្រធានក្រុមការងារ បានកោតសរសើរ និងថ្លែងអំណរគុណដល់សមាជិក សមាជិកា នៃក្រុមអាជីវកម្មដែលបានអនុវត្តការងាររបស់ខ្លួនដោយស្មារតីទទួលខុសត្រូវខ្ពស់ ជាពិសេសបានលះបង់ពេលវេលាជួបជុំគ្រួសារ និងថ្ងៃឈប់សម្រាកដើម្បីចូលរួមក្នុងសកម្មភាពសង្គមនានា។ ក្នុងនោះដែរលោកប្រធានក្រុមការងារក្នុងវិស័យសាធារណការ និងដឹកជញ្ជូន បានគូសបញ្ជាក់អំពីភាពជោគជ័យនៃការគ្រប់គ្រងជំងឺCovid-19 ដែលបានបើកឱកាសឱ្យមានការជួបជុំគ្នានាពេលនេះដោយគ្មានការព្រួយបារម្ភឡើយ។ លោកប្រធានក្រុមការងារក៏បានណែនាំឱ្យបន្ដជំរុញយុវជនចូលជាសមាជិក ស.ស.យ.ក គ្រប់ៗគ្នា និងមានការចែកជូនលិខិតសរសើរដល់ថ្នាក់ដឹកនាំក្រុម និងតាមផែនចំណុះនៃក្រុមអាជីវកម្មផងដែរ៕