ប្រេសិតពិសេសអង្គការសហប្រជាជាតិ ឯកឧត្តម ជីន ថូត (Jean Todt) ទទួលបន្ទុកសុវត្ថិភាពចរាចរណ៍ ពិភាក្សាផ្លាស់ប្តូរយោបល់ ជាមួយ ឯកឧត្តមទេសរដ្ឋមន្ត្រី ស៊ុន ចាន់ថុល សំដៅលើកកម្ពស់គុណភាពសុវត្ថិភាពចរាចរណ៍នៅកម្ពុជា ទីស្តីការក្រសួង៖ ថ្ងៃព្រហស្បតិ៍ ១កើត ខែមិគសិរ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៤ ខែវិច្ឆិកា ឆ្នាំ២០២២ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ទទួលជួបពិភាក្សាការងារជាមួយគណៈប្រតិភូអង្គការសហប្រជាជាតិ ដឹកនាំដោយ ឯកឧត្តម ជីន ថូត (Jean Todt) ប្រេសិតពិសេសអង្គការសហប្រជាជាតិ ទទួលបន្ទុកសុវត្ថិភាពចរាចរណ៍ និងមានការចូលរួមពីថ្នាក់ដឹកនាំក្រសួង និងមន្ត្រីជំនាញពាក់ព័ន្ធ។ ជាកិច្ចចាប់ផ្តើម ឯកឧត្តមទេសរដ្ឋមន្ត្រី បានសម្តែងនូវសេចក្តីសោមនស្សរីករាយ និងការស្វាគមន៍យ៉ាងកក់ក្តៅ ចំពោះវត្តមានឯកឧត្តម ជីន ថូត ដែលអញ្ជើញមកបំពេញបេសកកម្មនៅព្រះរាជាណាចក្រកម្ពុជានាឱកាសនេះ និងបន្តដោយការបង្ហាញពីការផ្លាស់ប្តូរផ្សេងៗ និងទិន្នន័យព័ត៌មានដែលទាក់ទងនឹងវិស័យដឹកជញ្ជូន និងសុវត្ថិភាពចរាចរណ៍នៅកម្ពុជា ដែលរួមមាន៖ កំណើននៃការប្រើប្រាស់យានជំនិះ គ្រោះថ្នាក់ចរាចរណ៍ ការជំរុញយុទ្ធនាការសុវត្ថិភាពចរាចរណ៍ (ការចែកមួកសុវត្ថិភាព និងបន្ទះចំណាំងផ្លាត) ការជំរុញលើកទឹកចិត្តការប្រើប្រាស់រថយន្តដែលប្រើប្រាស់ថាមពលអគ្គិសនី ការបង្កើត និងដាក់ឱ្យប្រើប្រាស់នូវទំនើបកម្មបច្ចេកវិទ្យា(Driving Rules App, Point Deduction) និងការផ្សព្វផ្សាយបញ្ជ្រាបការយល់ដឹងអំពីសុវត្ថិភាពចរាចរណ៍តាមរយៈបណ្តាញផ្សព្វផ្សាយផ្សេងៗ។ ដែលទាំងអស់នេះសបញ្ជាក់ឱ្យឃើញពីការខិតខំប្រឹងប្រែងយកចិត្តទុកដាក់របស់រាជរដ្ឋាភិបាលកម្ពុជា តាមរយៈក្រសួងសាធារណការ និងដឹកជញ្ជូន ដែលជាសេនាធិការជំនាញ។ ឯកឧត្តមប្រេសិតពិសេស បានសម្តែងនូវចំណាប់អារម្មណ៍ និងការវាយតម្លៃខ្ពស់ចំពោះទិន្នន័យព័ត៌មានទាំងអស់នោះ ហើយលោកបានសង្កត់ធ្ងន់ទៅលើចំណុចសុវត្ថិភាពចរាចរណ៍តាមដងផ្លូវ ដោយសាររូបលោកផ្ទាល់គឺជាបេសកជនពិសេសរបស់អង្គការសហប្រជាជាតិទទួលបន្ទុកលើវិស័យនេះ។ លោកបានបញ្ជាក់ថា សុវត្ថិភាពចរាចរណ៍គឺជាអ្វីដែលមនុស្សគ្រប់រូបត្រូវតែចូលរួម មិនមែនអនុវត្តតែក្នុងកម្រិតថ្នាក់ដឹកនាំនោះទេ ហើយចំណុចចម្បងៗគួរយកចិត្តទុកដាក់ ដែលលោកបានលើកឡើងរួមមាន៖ ការបញ្ជ្រាបអំពីសុវត្ថិភាពចរាចរណ៍តាមវិស័យអប់រំ ការបំពាក់នូវកាមរ៉ាចាប់ល្បឿនតាមដងផ្លូវ រឹតបន្តឹងការប្រលងយកបណ្ណបើកបរ ការត្រួតពិនិត្យគុណភាពមួកសុវត្ថិភាព និងការពង្រឹងការអនុវត្តច្បាប់ចរាចរណ៍ ជាពិសេសទាក់ទងនឹងការប្រើប្រាស់ទូរស័ព្ទ និងការបើកបរក្រោមឥទ្ធិពលគ្រឿងស្រវឹង។ល។ បន្ទាប់ពីបញ្ចប់កិច្ចពិភាក្សាការងារ ឯកឧត្តមទេសរដ្ឋមន្ត្រី បានរៀបចំអាហារពេលល្ងាចជូនដល់គណៈប្រតិភូ ជាកិច្ចស្វាគមន៍ផងដែរ៕